Балкан

Дали Србија е во опасност да остане без нафта?

Нафтена индустрија на Србија (НИС) соопшти дека рафинеријата во Панчево започнува подготовки за прекин на работата поради недостиг на нафта за преработка, предизвикан од санкциите што Министерството за финансии на САД ги воведе врз компанијата.

Во првата фаза, постројките се ставени во „топла циркулација“, при што процесот се спроведува согласно законите на Србија, внатрешните правила на НИС и најстрогите еколошки и безбедносни стандарди. Компанијата истакнува дека ќе се врати во нормален режим штом ќе се обезбеди достапност на сирова нафта.

НИС исто така посочува дека продолжува со снабдување на домашниот пазар со нафтени деривати од претходно обезбедени резерви и нагласува дека не придонела за воведување санкции кои ја загрозуваат работата на компанијата и социјалната стабилност на над 13.500 вработени.

Народната банка на Србија денеска објави дека, доколку НИС не добие лиценца за работење во предвидениот рок, ќе ги прекине платните трансакции со компанијата за да се заштити стабилноста на домашниот финансиски систем. Гувернерката Јоргованка Табаковиќ посочи дека секундарните санкции би значеле целосно блокирање на сите плаќања, што е сценарио што банката се надева дека ќе се избегне.

Балкан

Земјотрес од 4,8 степени во Грција

Силен земјотрес со магнитуда од 4,8 степени ја погоди областа Калаврита во Грција во саботата вечер, соопшти Германскиот истражувачки центар за геонауки (GFZ). Епицентарот бил на длабочина од 10 километри, пренесува EMSC.

Првичните извештаи наведуваа магнитуда од 6,3 степени, но подоцна вредноста беше коригирана на 4,8.

Сведоци од областа пријавиле дека почувствувале силен татнеж, по што почнала да се тресе и нивната околина. „За среќа, плочките останаа на место. Епицентарот, изгледа, бил во селото Коутели кај Калаврита“, изјавиле локалните жители.

Засега нема информации за повредени или значителни материјални штети.

Балкан

Букурешт денеска гласа за нов градоначалник: 1,8 милиони избирачи на изборните места

Денеска граѓаните на Букурешт го остваруваат своето право на глас за избор на нов градоначалник. Се очекува речиси 1.800.000 луѓе да гласаат на 1.289 избирачки места и да го одредат лицето што ќе управува со најголемиот и најбогат романски град до 2028 година, со буџет од 11 милијарди леи.

Изборниот ден започна во 7 часот наутро и ќе трае до 21 часот по локално време. За позицијата, која остана празна по изборот на Никушор Дан за претседател на Романија, се натпреваруваат 15 кандидати, иако на гласачкото ливче се наведени 17 имиња поради повлекување на двајца кандидати во последен момент.

Најмладиот кандидат има 32 години, додека најстариот е 66-годишен. Победникот ќе стане 17-ти градоначалник на Букурешт од 1990 година наваму.

Балкан

Трагедија во Србија: Семјство од Босна и Херцеговина најдено мртво во куќата по неколку дена

Во семејната куќа во Чачак утрово беа пронајдени три тела на семејство од Босна и Херцеговина, но според неофицијални информации, трагичните настани се случиле неколку дена порано. Сè уште не е познат точниот датум на двојното убиство и, како што се претпоставува, самоубиството, јавува Radiosarajevo.ba.

Сомнежите упатуваат дека 47-годишниот В. Ч. ги убил своите родители, 72-годишната М. Ч. и 79-годишниот Н. Ч., а потоа, како што се претпоставува, си нанел смртоносни повреди на градите и вените. Според извори на „Блиц“, јавноста и полицијата за овој морничав случај дознале дури утрово.

Соседите се во шок, а нови информации за семејството продолжуваат да се појавуваат. Тие се преселиле во куќата од Босна и Херцеговина пред 26 години, на местото каде претходно живеело четиричлено семејство. За време на бомбардирањето на Србија, куќата била оштетена, а тогашниот сопственик извршил самоубиство во дневната соба.

Случајот е во тек на истрага, а полицијата се обидува да утврди сите околности околу трагичниот настан.