Еве од кога ќе почнат да работаат камерите од „Безбеден град“ во Тетово и Куманово

Началничката на Секторот за сообраќајни работи при МВР, Маја Арсовска Манов, во гостување во „Топ Тема“ на Телма изјави дека електронскиот систем „Безбеден град“ во моментов функционира на целата територија на Град Скопје, а до крајот на декември ќе биде активиран и во Куманово и Тетово.

Таа појасни дека се работи за целосно активиран систем за автоматско детектирање на сообраќајни прекршоци, кој веќе дава резултати во Скопје.

„До крајот на месецов планираме да го ставиме во функција и во Куманово и Тетово, а од следната година истиот систем ќе биде имплементиран на територија на целата држава“, изјави Арсовска Манов.

Според МВР, опремата е поставена и на Коридорите 8 и 10, а во секој момент се очекува да започне автоматското регистрирање на сообраќајните прекршоци и на овие критични патни правци.