Системот „Безбеден град“ на 2 декември регистрирал повеќе од 50.000 сообраќајни прекршоци, покажуваат податоците на Министерството за внатрешни работи. Според МВР, ова претставува преполовување на бројката во однос на 1 декември, кога во првите 24 часа од тест периодот беа забележани над 110.000 прекршоци.
На 2 декември, вкупно биле регистрирани 50.652 прекршока. Од нив, дури 48.861 се однесувале на пречекорување на дозволената брзина, 1.366 на минување на црвено светло, а 425 на учество во сообраќај со нерегистрирани возила. Од МВР појаснуваат дека камерите не го снимаат целокупниот сообраќај, туку само возилата кои прават прекршок.
Излезот кон Тетово и Пластичарска – најризични делници
Во првите 12 часа од вчерашниот ден биле регистрирани нови 22.600 прекршоци, од кои речиси 95% се однесувале на пребрзо возење. Најмногу прекршоци се забележани на излезот од Скопје кон Тетово – вкупно 4.300 случаи. Веднаш зад него е булеварот Никола Карев, познат како Пластичарска улица, со 3.000 регистрирани прекршоци.
Кога станува збор за минување на црвено светло, најкритична точка е раскрсницата меѓу улиците Цветан Димов и Џон Кенеди, каде што камерите за еден ден регистрирале 45 прекршоци.
Возеле од 51 до 209 километри на час
Податоците за тест-периодот откриваат и екстремни случаи. Најниската брзина за која е изречена казна е 51 километар на час, додека највисоката измерена брзина достигнува 209 километри на час – што, како што оценуваат од МВР, претставува исклучително опасно однесување и сериозен ризик по безбедноста во сообраќајот.
Со оглед на бројките, МВР најавува продолжено следење на овие делници, кои веќе се потврдени како најударни точки за сообраќајни прекршоци во Скопје.
