Република

Експертите открија: Вака ќе изгледа идната гондола на Пелистер

Странски експерти од Словенија и Франција денес пред битолчани ги претставија првичните предлози од физибилити студијата за изградба на гондола кон Пелистер, која би стартувала од Дихово, Ротино или Цапари и би се искачувала до високите предели на планината, со можност конечната станица да биде врвот Антена на 2.601 метри надморска височина.

Според експертот Франц Фурлан од Словенија, Пелистер има огромен потенцијал да стане туристички бисер за сите четири сезони, доколку се развие со еко-инфраструктура каква што се применува ширум светот. Тој нагласи дека современите трендови се насочени кон авантуристички туризам и ограничување на возилата на планината, додека гондолите овозможуваат пристап и за оние кои досега тешко стигнувале до високите зони.

Градоначалникот Тони Коњановски истакна дека ова е почеток на долг процес, но дека студијата ќе ја насочи Општината кон најдобрата траса. Тој посочи дека меѓустаницата се разгледува да биде кај Копанки или Молика, каде веќе постои инфраструктура и активности.

Советникот Иван Чулакоски, кој ја иницираше идејата во 2023 година, предложи почетната станица да биде помеѓу Битола и Дихово, со меѓустаница кај Инфоцентарот, а наместо Антена – завршната станица да биде на месноста Седло, која според него е попогодна и безбедна. Таму би се предвидел мал објект за одмор, без сместувачки капацитети, а во следна фаза би се развивале патеки кон Широка и скијачки терени со минимални интервенции.

Директорот на Националниот парк „Пелистер“, Иванчо Тошевски, предупреди дека при секој план мора да се води сметка за заштитата на моликовата шума и зоните под строг режим. Како најсоодветна појдовна точка ја посочи Цапари, а истакна дека постојните патеки од фронтовата линија на Баба Планина овозможуваат развој со минимални зафати.

Студијата продолжува, а конечната траса ќе зависи од усогласувањето меѓу туристичкиот потенцијал и строгите правила за заштита на природата.

Република

Битола подготвена за снегот: Обезбедени 17 милиони денари за зимско одржување

Општина Битола ќе вложи 17 милиони денари за функционирање на зимската служба во претстојната сезона. Од вкупната сума, 15 милиони денари се наменети за градежна оператива, додека два милиони денари ќе бидат искористени за индустриска сол, песок-ризла и ладна асфалтна маса.

Зимската служба ќе се реализира преку капацитетите на локалните јавни претпријатија, со можност за ангажирање дополнителна оператива доколку временските услови го наложат тоа.

Советот на Општина Битола утврди листа на приоритетни сообраќајници: 50 улици и 14 пристапни патишта до клучни институции се класифицирани како сообраќајници од прв приоритет, а 38 улици како втор приоритет. Посебно внимание е посветено на локалните патишта во руралните делови на општината.

Координативното тело за зимска служба најавува дека, доколку има потреба, од граѓаните ќе се бара соработка, а комуникацијата ќе ја води инженерот задолжен за надзор и реализација на програмата.

Република

Земјотрес го погоди западниот дел на Македонија

Рано утрово во 1:23 часот е регистриран слаб земјотрес во западниот дел на земјава, поточно во околината на Кичево, објави Европскиот медитерански сеизмолошки центар (ЕМСЦ).

Земјотресот, со јачина од 2 степени според Рихтер, се случил на длабочина од 15 километри. Според ЕМСЦ, епицентарот бил лоциран 15 километри југозападно од Кичево, додека Институтот за геолошки науки во Тирана наведува дека земјотресот бил во Општина Дебрца.

Засега нема пријавено материјални штети или други последици од земјотресот.

Република

Забрзана изградба на автопатот Тетово–Гостивар: Николоски објави ново видео од терен

Вицепремиерот и министер за транспорт и врски Александар Николовски објави ново видео на својот Фејсбук-профил, со кое информира за интензивните градежни активности на автопатот Тетово–Гостивар, дел од Коридорот 8.

Во објавата, Николовски наведува дека работата се одвива со силно темпо и дека се прават сериозни чекори кон комплетирање на автопатското решение на овој стратешки коридор.

„Интензивно се работи на автопатот Тетово – Гостивар. Силна динамика во комплетирањето на автопатското решение на Коридорот 8. Ја градиме Македонија“, напиша министерот, додавајќи видео снимки од градежните машини и текот на работите.

Инфраструктурниот проект е еден од клучните сегменти во модернизацијата на патната мрежа во земјата и значајно ќе го подобри движењето меѓу Полошкиот регион и западниот дел на Македонија.