Од денес достапни за граѓаните. Почнува реализацијата на проектот за набавка на 100 нови амбулантни возила во македонското здравство – објави премиерот Христијан Мицкоски на својот фејсбук-профил.

Како што е најавено, премиерот денеска ќе присуствува на промоција на проектот за набавка на 100 нови амбулантни возила на паркингот на СЦ „Борис Трајковски“.

Од владината прес-служба информираат дека е предвидено премиерот да даде изјава за медиумите.

…

Новиот мобилен оператор „Оне Македонија“, дел од унгарската групација „4иГ“, планира да ја користи сателитската мрежа Starlink на компанијата „Спејсекс“. Ова го најави вицепремиерот и министер за транспорт Александар Николоски во интервју за „360 степени“.

Според Николоски, Македонија и Црна Гора ќе бидат меѓу првите земји во регионот во кои ќе се воведе директно сателитско поврзување на мобилните телефони.

„Кога ќе заврши тестирањето, одат директно на Starlink, односно на сателитите на Илон Маск“, изјави тој.

Николоски посочи дека новиот оператор има обврска до март 2027 година да обезбеди покриеност на најмалку еден град, а до крајот на годината услугите да бидат достапни низ целата држава. Овие рокови се однесуваат на покриеноста на операторот, додека воведувањето на сателитското поврзување е поврзано со завршувањето на тестирањата.

Иако операторот можел сам да избере каде ќе започне со работа, го одбрал Скопје.

„Тие го одбраа градот Скопје, што значи дека сериозно влегуваат на пазарот“, рече Николоски.

Според објавените информации за соработката меѓу „4иГ“ и „Спејсекс“, технологијата Starlink Mobile V2 е предвидена за Македонија, Црна Гора, Албанија и Унгарија. Таа треба да овозможи директно поврзување на компатибилни телефони со сателити, особено во подрачја со ограничена покриеност од земјените мобилни мрежи.

Сателитската услуга е предвидена како дополнување на постојната телекомуникациска инфраструктура.

Николоски очекува третиот мобилен оператор да ја засили конкуренцијата и да придонесе за пониски цени. Според неговите информации, компанијата планира понуди со значително пониски цени од оние на двата постојни оператори.

…

Ракот би можел да добие одговор што долго го чека, Стрелецот ќе има можност да остави добар деловен впечаток, а Рибите ќе откријат колку чинат малите секојдневни задоволства. За овие три знаци, 20 октомври носи интересни разговори за заработката и трошењето.

Рак — Конечно одговор за парите што ги очекувате

Телефонски повик или порака може да придвижи прашање поврзано со задоцнета исплата. Иако парите можеби нема веднаш да пристигнат, појасниот рок ќе ви помогне полесно да ги испланирате обврските. Можно е и лице со кое претходно сте соработувале повторно да ви се обрати со конкретно барање. Ќе ви годи што се сетило на вас, особено ако овојпат понуди подобри услови.

Стрелец — Препорака што отвора нова врата

Некој би можел да го спомене вашето име пред потенцијален клиент или работодавец. Она што за вас било добро завршена задача сега може да стане ваша најсилна препорака. Ќе посакате веднаш да покажете што умеете, но разговорот ќе стане особено интересен кога ќе се отвори темата за надоместот. Денешното изненадување може да биде сознанието дека вашиот труд оставил поголем впечаток отколку што мислите.

Риби — Ситните купувања прават голема сума

Кафе, достава, неколку онлајн нарачки — секој трошок одделно ќе изгледа мал, сè додека не го погледнете вкупниот износ. Можно е токму денес да се запрашате каде исчезнал дел од буџетот. Сепак, денот носи и повесела можност: некој може да покаже интерес да купи нешто што го изработувате или да побара ваша креативна услуга. Хобито одеднаш ќе добие и цена.

Хороскопот е забавна содржина.

…

Административните службеници кои две години по ред ќе добијат оценка „1 – не задоволува“ ќе останат без работа по сила на закон. Ова е една од новините предвидени со законските измени што Собранието ги усвои по скратена постапка, а кои ги опфаќаат оценувањето, унапредувањето и дисциплинската одговорност во администрацијата.

Со измените се укинува можноста за унапредување без објавување интерен оглас. Целта е да се обезбедат еднакви можности за службениците и напредување врз основа на заслуги и резултати.

Од власта оценуваат дека законските решенија ги отстрануваат претходните пропусти и овозможуваат поефикасна примена на прописите. Опозициската СДСМ, пак, предупредува дека дел од одредбите може да создадат простор за политички притисоци врз административните службеници.

Предвидени се и решенија за побрзо и поекономично спроведување на постапките, без неоправдано одолговлекување, со задржување на правото на жалба.

Законските измени го уредуваат и статусот на вработените во Службата на Собранието и во регулаторните тела, со цел усогласување со статусот на другите посебни државни службеници.

…

ВМРО-ДПМНЕ убедливо победи во Брвеница со огромен резултат, ова е значајна победа за ВМРО-ДПМНЕ во Полошкиот регион.

Ова денеска го изјави премиерот и претседател на ВМРО-ДПМНЕ, Христијан Мицкоски прашан за коментар за вчерашните локални избори во Брвеница.

-Имаме предност од 800 гласа во однос на кандидатот на ДУИ. Во однос на политичкиот конкурент СДСМ, победивме со разлика поголема од 4:1. Очекуваме во овој втор круг уште поголемо консолидирање и уште поголема победа за да ја заокружиме целосно победата, вели тој.

Мицкоски изрази благодарност до граѓаните на Брвеница кои излегле да гласаат на изборите и ја поддржале победата на ВМРО-ДПМНЕ со околу 3.000 гласа.

-Очекувам таа бројка после вториот круг да се искачи на рекордни над 4.000 гласа. Верувам во конечна победа, нагласи Мицкоски.

Во Општина Брвеница ќе се одржи втор круг од изборите за градоначалник, откако ниту еден од кандидатите не освои доволно гласови за победа во првиот круг.

Според податоците објавени на официјалната страница на Државната изборна комисија (ДИК), кндидатот на ВМРО-ДПМНЕ освои 38,90 отсто од гласовите, додека кандидатот на НАИ доби поддршка од 28,45 проценти од гласачите.

Во вториот круг за градоначалничката функција ќе се соочат Стојанчо Радичевски и Аркин Јахји.

…

Вкупно 689 килограми храна и 15 килограми хигиенски производи беа собрани во хуманитарната акција „Тегла+ – Херои на солидарноста“, одржана на 14 и 15 октомври во Веро Центар – Џамбо и Веро 2 – Тафталиџе. Според податоците што ги објави здружението „Љубезност“, собраната храна ќе овозможи подготовка на пакети за приближно 58 семејства во социјален ризик.

Во дводневната акција беа вклучени 45 волонтери, а на двата пункта беа евидентирани 396 посетители и донатори. Со донирање прехранбени и хигиенски производи, граѓаните придонесоа за обезбедување основни потреби за семејствата на кои им е потребна помош.

Од „Љубезност“ упатија благодарност до сите учесници, со посебно признание за ангажманот на волонтерите. Одзивот на граѓаните покажа како заедничкото учество во една локална акција може да донесе конкретна поддршка за повеќе семејства.

Иницијативата ја реализира здружението „Љубезност“ заедно со партнерските организации GoGreen, SIEC, MISLA и SOLEM. Проектот е поддржан преку донација од dm drogerie markt.

…

Никола Андреевски, еден од истакнатите македонски претприемачи во Соединетите Американски Држави и добитник на признанието „Бизнис елит – 40 под 40“, присуствуваше на вечера на имотот Мар-а-Лаго во Флорида, каде што лично се сретна со американскиот претседател Доналд Трамп.

Андреевски, кој потекнува од Велес, а повеќе од една деценија живее и работи во САД, беше меѓу гостите на вечерата одржана во петокот навечер. За време на настанот имаше можност да се поздрави и да размени неколку зборови со американскиот претседател.

Средбата претставува уште еден значаен момент во професионалниот пат на македонскиот бизнисмен, кој во изминатите години изгради успешна кариера во американската транспортна и логистичка индустрија.

Андреевски меѓу добитниците на признанието „40 под 40“

Никола Андреевски е извршен директор на „МДН Фрејт“, транспортна и логистичка компанија со седиште во Чикаго, која работи на американскиот пазар и развива капацитети за соработка со големи клиенти.

Неговиот професионален пат започнал со работа во основните сегменти на транспортната индустрија, каде што стекнувал практично искуство и постепено напредувал до раководна позиција. Денес, како извршен директор, работи на проширување на капацитетите на компанијата, подобрување на оперативната ефикасност и воспоставување долгорочни деловни партнерства.

Во јуни годинава, Андреевски се најде меѓу добитниците на признанието „Бизнис елит – 40 под 40“ во Њујорк, кое им се доделува на млади претприемачи и деловни лидери за постигнатите резултати во нивните индустрии.

Покрај работата во транспортната и логистичката индустрија, тој е и еден од основачите на Американскиот балкански трговски центар, иницијатива чија цел е да ги поврзе американските и балканските компании и да создаде услови за нови инвестиции и деловни партнерства.

Со оваа иницијатива, Андреевски го проширува својот професионален ангажман и надвор од транспортниот сектор, насочувајќи дел од своите активности кон развојот на економската соработка меѓу САД и земјите од Балканот.

Средби со влијателни американски политички претставници

Ова не е првпат Андреевски да присуствува на настан во Мар-а-Лаго. Во март годинава тој беше дел од донаторска средба посветена на Џо Мичел, кандидат за американскиот Конгрес од Ајова, на која присуствуваа повеќе претставници на американскиот политички и деловен живот.

Меѓу нив беа Том Емер, еден од водечките републиканци во Претставничкиот дом на САД, и Џејсон Смит, претседател на Комитетот за начини и средства, кој има надлежности во областа на даночната и трговската политика.

На истиот настан присуствуваше и Ерик Бранстад, син на Тери Бранстад, поранешен гувернер на Ајова и поранешен американски амбасадор во Кина.

Андреевски учествувал на слична донаторска средба во Мар-а-Лаго и во мај 2025 година, заедно со други претставници на балканската бизнис-заедница во САД и поранешниот гувернер на Илиноис, Род Благојевиќ.

Професионалната приказна на Никола Андреевски е еден од примерите за успехот на македонските иселеници во САД. Иако повеќе од десет години живее во Америка, тој ја одржува поврзаноста со своите македонски корени, а преку деловните активности настојува да придонесе за посилни економски врски меѓу американските и балканските компании.

…

Храната и безалкохолните пијалаци во Македонија се 25,2% под просекот на Европската Унија. Најголема разлика има кај овошјето и јаткастите плодови, лебот и житарките, додека цените на маслата и мастите се најблиску до европскиот просек.

Новинарска анализа | 19 октомври 2026 година

Македонија има најнизок индекс на цени на храната и безалкохолните пијалаци меѓу 36 европски држави опфатени во анализата на Евростат за 2025 година. Со индекс 74,8, при просек на Европската Унија поставен на 100, земјата е пред Турција и Романија на долниот крај од европската ценовна скала. Анализата ги опфаќа 27 членки на ЕУ, Швајцарија, Исланд и Норвешка, како и шест земји кандидати.

Резултатот значи дека за споредлив обем храна и безалкохолни пијалаци, кој според просечните цени во ЕУ би чинел 100 евра, соодветното ценовно ниво во Македонија е околу 74,8 евра. Ова е илустрација на индексот, а не цена на конкретна потрошувачка кошница.

Позицијата на Македонија е особено изразена во регионалната споредба. Додека македонското ценовно ниво е приближно една четвртина под европскиот просек, Србија се доближува до него, а Албанија, Грција и Хрватска го надминуваат.

Табела 1. Храна и безалкохолни пијалаци: Македонија и избрани европски земји

Пресметано од овие индекси, храната и безалкохолните пијалаци во Македонија имаат ценовно ниво приближно 23% пониско од Србија, 28% пониско од Албанија и 29% пониско од Грција. Процентите се однесуваат на целата статистичка група; разликите кај одделни производи можат да бидат поголеми или помали.

Евростат посебно ја издвојува Македонија во делот за земјите кандидати: само Македонија и Турција имаат пониско ценовно ниво на храната од сите членки на ЕУ. Македонија има и пониско ниво на цените на безалкохолните пијалаци од сите земји членки.

Најголемата разлика е кај овошјето и лебот

Подеталните табели покажуваат дека македонската позиција произлегува од особено ниските индекси во неколку големи прехранбени категории.

Табела 2. Ценовно ниво на храната во Македонија по категории

Овошјето и јаткастите плодови се категоријата со најголема оддалеченост од европските цени. Македонскиот индекс од 52,4 е речиси половина од просекот на ЕУ и најнизок во опфатената група држави. За споредба, Романија има индекс 65,5, Босна и Херцеговина 71,2, Црна Гора 77,9, а Србија 95,9.

И кај лебот и житарките, Македонија има најниска објавена вредност меѓу опфатените земји. Индексот од 65,9 ја поставува под Романија со 68,4 и Турција со 71,4. Оваа категорија опфаќа поширока група производи: ориз, брашно, леб, други пекарски производи и тестенини.

Кај рибата, македонскиот индекс е 80,5, непосредно под романскиот од 81,1. Разликата е мала, па најсоодветно е да се зборува за многу слично ниско ценовно ниво. И самиот Евростат предупредува дека тесните разлики меѓу индексите не треба да се претвораат во категорични рангирања.

Кај зеленчукот, Македонија со индекс 72,0 е под сите членки на ЕУ, но над Турција, чиј индекс изнесува 51,7. Оттука, македонската позиција е многу поволна во европската споредба, иако во оваа категорија постои значително поевтин пазар меѓу опфатените земји.

Млечните производи и маслата се поблиску до европските цени

Резултатите се поинакви кај млекото, сирењето и јајцата. Македонскиот индекс од 89,6 е под европскиот просек, но разликата е значително помала отколку кај овошјето, лебот или зеленчукот. Словачка има нешто пониска вредност, 88,0.

Сепак, Македонија останува поевтина во оваа група од соседните и блиските пазари прикажани во табелата: Црна Гора има индекс 95,0, Србија 107,1, Бугарија 126,2, Грција 129,9, а Албанија 135,6.

Најблиску до европскиот просек се маслата и мастите, со македонски индекс 95,0. Ова е важна нијанса во анализата: Македонија има најнизок вкупен индекс за храна, но не е најевтина во секоја поединечна категорија. Кај маслата и мастите, пониски индекси имаат, на пример, Шпанија со 73,2, Италија со 93,0 и Полска со 94,3.

И месото, со индекс 77,6, е значително под европскиот просек, но не ја повторува водечката позиција на лебот и овошјето. Пониски вредности се забележани во Турција, Словачка, Романија, Црна Гора, Бугарија и Унгарија.

Овие разлики ја прават македонската слика појасна: нискиот вкупен индекс е придружен со различен степен на ценовна предност по категории. Најголемата предност е концентрирана кај овошјето и јаткастите плодови, лебот и житарките и зеленчукот.

Безалкохолните пијалаци се околу 20% под европскиот просек

Кај безалкохолните пијалаци, Македонија има индекс 79,9, најнизок меѓу опфатените држави. Категоријата вклучува кафе, чај, какао, минерални води, освежителни пијалаци и сокови.

Кај алкохолните пијалаци, меѓутоа, македонскиот индекс е 99,0, речиси на нивото на европскиот просек. Кај тутунот е 38,1, значително под него. Така, трите групи имаат јасно различни ценовни позиции: ниски цени на безалкохолните пијалаци, алкохол блиску до европскиот просек и многу пониско ценовно ниво на тутунот.

На спротивниот крај на заедничката скала за храна и безалкохолни пијалаци се Швајцарија со индекс 155,9 и Исланд со 155,8. Меѓу членките на ЕУ, највисок индекс има Луксембург, 122,4. Пресметката покажува дека швајцарското ценовно ниво е нешто повеќе од двојно повисоко од македонското.

Методологијата е важна за правилно читање на резултатите. Евростат користи годишни национални просечни цени, а споредбата се заснова на вкупно 508 производи. За ова издание, цените собрани во пролетта 2024 година се пренесени на 2025 година со користење детални индекси на потрошувачките цени. Затоа податоците ја опишуваат споредбената позиција за 2025 година, а не тековните цени во октомври 2026 година.

Најзначајното откритие за Македонија е ширината на нејзината ценовна предност: таа има најнизок вкупен индекс, а кај повеќе важни групи производи е под сите членки на ЕУ. Истовремено, деталните табели прецизно покажуваат каде таа предност е најголема и каде цените се приближуваат до европското ниво.

Извори

Евростат: Comparative price levels for food, beverages and tobacco. Податоци од 17 јуни 2026 година за референтната 2025 година. Изворен сет: prc_ppp_ind_1.

Оригинална анализа на Евростат

Изворни табели на Евростат во Excel

…

ВМРО-ДПМНЕ оствари убедлива победа во првиот круг од локалните избори во Брвеница, изјави вечерва премиерот и лидер на партијата, Христијан Мицкоски, оценувајќи дека резултатот претставува потврда за поддршката на граѓаните за политиките на партијата и Владата.

Мицкоски оцени дека резултатот претставува важна политичка порака и потврда за поддршката на политиките на ВМРО-ДПМНЕ и Владата.

-Иако само пред неколку дена раководството на СДСМ најавуваше убедлива победа во Брвеница, сепак СДСМ е декласиран од граѓаните и тоа е важна порака од граѓаните до нивното раководство, изјави Мицкоски.

Според анализите што ги презентираше лидерот на ВМРО-ДПМНЕ, второто место го освоил кандидатот на ДУИ со нешто повеќе од 2.100 гласа, трет е кандидатот на ВЛЕН, додека четврти е кандидатот на СДСМ. Независниот кандидат поддржан од Левица, според Мицкоски, освоил околу 50 гласа.

Тој посочи дека поради учеството на повеќе кандидати, најверојатно ќе има втор круг на гласање, кој е закажан за 1 ноември.

Мицкоски им се заблагодари на граѓаните што го оствариле своето право на глас, како и на сите учесници во организацијата и спроведувањето на изборниот процес. Тој нагласи дека волјата на граѓаните мора да се почитува и дека победата носи и голема одговорност.

-Владата ќе продолжи да вложува во развојот на општините. Во патишта, водоводи, училишта, комунална инфраструктура и во создавање подобри услови за живот. Тоа важи и, се разбира, за Брвеница, порача премиерот.

Тој најави дека партијата ќе побара поддршка од сите граѓани на Брвеница во вториот круг, со ветување за нови инвестиции, подобра инфраструктура, решавање на комуналните проблеми и создавање повеќе можности за младите.

Мицкоски истакна дека идниот градоначалник треба да работи за сите граѓани, независно од нивната национална припадност, верска определба или политичка ориентација.

-Победата е огромна, но и нашите обврски за оваа општина се огромни. Со конкретни проекти, со одговорност, со почит кон секој човек. За една Брвеница за сите, порача Мицкоски.

…

Од иницијативата повикуваат јавната дебата за рударството да се темели на факти, стручност и одговорно разгледување на економските можности и еколошките стандарди.

Европската Унија ги интензивира напорите за обезбедување критични минерални суровини, а Европската комисија најавува нов повик за стратешки проекти до крајот на 2026 година. Во рамките на европската Директива за критични суровини, за стратешките проекти се предвидени поедноставени и попредвидливи постапки за издавање дозволи, со рокови до 27 месеци за експлоатација и до 15 месеци за проекти за преработка и рециклирање.

Овие европски чекори покажуваат дека критичните минерали добиваат сè поголемо значење за индустријата, енергетската транзиција и економската конкурентност на Европа.

Во овој контекст, иницијативата „И Здравје и Работа“ смета дека и во Македонија е потребна сериозна, аргументирана и одговорна дебата за потенцијалот на домашните минерални ресурси, вклучително и за проектот „Иловица – Штука“.

„Европа ја препознава важноста на критичните минерали и презема конкретни чекори за да ги развива своите капацитети. Македонија треба внимателно да ги разгледува можностите што ги има, врз основа на стручни анализи, законски процедури и јасни критериуми за заштита на животната средина и здравјето на граѓаните. Развојот и одговорноста не треба да се поставуваат како меѓусебно исклучиви цели“, порачуваат од иницијативата.

Проектот „Иловица – Штука“ е една од инвестициите во критични минерали во земјава за која се води долготрајна јавна дебата. Дозволата за геолошки истражувања е издадена во 2004 година, а подоцнежните истражувања укажуваат на потенцијал за просечно годишно производство до 16.000 тони бакар. Предвидениот животен век на рудникот е 23 години.

Од „И Здравје и Работа“ посочуваат дека дискусијата за ваквите проекти треба да ги опфати сите релевантни прашања: можностите за инвестиции и вработување, придобивките за локалната економија, заштитата на водите и земјиштето, здравјето на населението и примената на современи технологии и стандарди.

„На граѓаните им се потребни точни информации, проверливи податоци и можност да ги разберат и потенцијалните придобивки и ризиците. Одлуките за вакви проекти треба да се носат врз основа на стручни процени, со почитување на законите и со соодветна институционална контрола. Само така може да се води дебата што придонесува за информирано одлучување и долгорочниот интерес на државата и граѓаните“, наведуваат од иницијативата.

„И Здравје и Работа“ останува на ставот дека иднината на рударството во Македонија треба да се разгледува низ призмата на знаењето, одговорноста, заштитата на здравјето и животната средина и можностите за одржлив економски развој.

…