Започна реконструкцијата на водоводната мрежа на улицата „Димитар Тодоровски“ во Битола. Зафатот предвидува целосна замена на постојната водоводна линија, вклучително и сите приклучоци до крајните потрошувачи, информираат од ЈКП „Водовод“ – Битола.

Дотраената мрежа, изградена од лиено-железни цевки пред повеќе од 40 години, ќе биде заменета со нови полиетиленски цевки. Од претпријатието посочуваат дека замената треба да обезбеди поголема трајност на мрежата и посигурно и поефикасно водоснабдување.

Реконструкцијата е дел од активностите на ЈКП „Водовод“ – Битола за обновување и модернизација на водоводната инфраструктура. Целта, според претпријатието, е намалување на загубите на вода и обезбедување квалитетно и одржливо водоснабдување за граѓаните.

…

Инфраструктурата, образованието, спортот, културата и социјалната заштита беа меѓу областите за кои битолчани предложија проекти на денешната прва сесија од Буџетскиот форум за подготовка на општинскиот буџет за 2027 година.

Општина Битола петта година по ред го организира форумот, преку кој граѓаните имаат можност директно да ги посочат потребите и да учествуваат во утврдувањето на приоритетите за следната година.

Градоначалникот Тони Коњановски во своето обраќање истакна дека буџетот не е само финансиски документ, туку одраз на потребите на граѓаните и на визијата за развој на Битола.

„Форумот не е обична јавна расправа, туку место каде граѓаните активно учествуваат во предлагањето решенија и утврдувањето приоритети. Со ова ја потврдуваме нашата транспарентност и отчетност, преку отворена дебата за тоа како се планираат и трошат јавните средства“, рече Коњановски.

Меѓу предлозите беа надвозник кај ОУ „Коле Канински“, асфалтирање улици, уредување на просторот околу факултетите во поранешната касарна и изградба на спортски терени за студентите. Граѓаните предложија и водоснабдување и пречистителна станица за Нижеполе, како и реновирање на салата за гимнастички спортови.

Во областа на културата и образованието беа изнесени идеи за Битолска градска куќа, обезбедување објект за државното музичко училиште, формирање средно уметничко училиште и професионален фолклорен ансамбл. Беше побарано и обезбедување простор за дневен центар за деца со аутистичен спектар.

На форумот се разговараше и за изградбата на спортската сала во Долно Оризари, текот на работите на пливачкиот базен во ОУ „Даме Груев“ и потребата од реновирање на училиштето во Буковски Ливади.

Предлозите ги забележаа раководителите на надлежните општински сектори, а на сесијата присуствуваа и претседателот на Советот, Бојан Бојкоски, и советници.

Коњановски посочи дека по завршувањето на административните фази, предлог-буџетот ќе биде разгледан на комисиска расправа, а потоа и на седница на Советот на Општина Битола.

…

Стојанчо Радичевски од ВМРО-ДПМНЕ и коалицијата „Твоја Македонија“ освои најмногу гласови на предвремените избори за градоначалник на Општина Брвеница. Според првичните резултати по обработката на сите 24 избирачки места, тој доби 2.943 гласа, односно 38,90 отсто.

Во вториот круг негов противкандидат ќе биде Аркин Јахиј од Националната алијанса за интеграција, кој освои 2.152 гласа, односно 28,45 отсто. Разликата меѓу двајцата кандидати изнесува 791 глас.

На третото место е Јакуп Хусеини од ВЛЕН со 1.528 гласа, односно 20,20 отсто, додека Јовица Радески од СДСМ доби 706 гласа, или 9,33 отсто.

Кандидатот предложен од група избирачи, Душан Богдановски, освои 55 гласа, односно 0,73 отсто, а Арифе Идризи доби 21 глас, или 0,28 отсто.

Според последниот податок за излезноста до 18:30 часот, гласале 7.241 граѓанин, односно 44,57 отсто. Овој податок се однесува на периодот пред затворањето на избирачките места и не претставува конечна излезност.

Резултатите, ажурирани во 21:27 часот, се означени како првични. Радичевски и Јахиј ја продолжуваат трката за градоначалничката функција во вториот круг, а конечните резултати ќе следуваат по завршувањето на изборните постапки.

Над 1.100 учесници беа дел од годинашното издание на спортската манифестација „ЧЕ ТРЧАМЕ“ во Прилеп. Градоначалникот Дејан Проданоски упати честитки до учесниците и организаторите, оценувајќи дека настанот поминал во атмосфера исполнета со спортски дух, позитивна енергија и заедништво.

„Над 1.100 учесници денеска беа дел од оваа прекрасна спортска приказна, потврдувајќи дека Прилеп е град со големо спортско срце и силен натпреварувачки дух“, истакна Проданоски.

Тој изрази особено задоволство од учеството на голем број деца и млади, нагласувајќи дека ваквите манифестации придонесуваат за прифаќање здрави навики и развивање љубов кон спортот.

Проданоски им се заблагодари на организаторите, волонтерите, спонзорите, институциите и сите што придонеле за реализацијата на настанот, а на учесниците им честиташе за упорноста и покажаниот спортски дух.

Градоначалникот најави дека ќе продолжи поддршката за спортските манифестации и иницијативите што го промовираат Прилеп и придонесуваат за поздрав живот на граѓаните.

„Продолжуваме заедно да создаваме убави приказни! Се гледаме на ‘ЧЕ ТРЧАМЕ 2027’!“, порача Проданоски.

…

До 17 часот на предвремените избори за градоначалник на Општина Брвеница гласале 6.392 избирачи, односно 39,34 отсто, покажуваат податоците на Државната изборна комисија.

Во последните два часа, од 15 до 17 часот, на гласање излегле дополнителни 1.328 граѓани, со што излезноста се зголемила за 8,17 процентни поени. На претходниот пресек, до 15 часот, гласале 5.064 избирачи, а излезноста изнесувала 31,17 отсто.

Податоците откриваат големи разлики меѓу избирачките места. Највисока излезност е регистрирана на избирачкото место 2032 – 70,21 отсто, каде што гласале 462 избирачи. Следува избирачкото место 2044 со 65,38 отсто, додека на избирачкото место 2033 излезноста достигнала 59,96 отсто.

Најниска излезност до 17 часот е забележана на избирачкото место 2036/1 – 15,27 отсто, со 129 гласачи.

Пресекот ги опфаќа сите 24 избирачки места, а податоците на страницата на ДИК се ажурирани во 17:42 часот. Во Избирачкиот список за Општина Брвеница се запишани вкупно 16.256 избирачи.

..

До 15 часот на предвремените избори за градоначалник на Општина Брвеница гласале 5.064 избирачи, а излезноста достигнала 31,17 отсто, покажуваат податоците објавени од Државната изборна комисија.

Само во периодот од 13 до 15 часот своето избирачко право го искористиле уште 1.733 граѓани. Со тоа, излезноста се зголемила за 10,67 процентни поени во однос на пресекот во 13 часот, кога изнесувала 20,50 отсто.

Утринскиот пресек во 9 часот покажувал излезност од 2,46 отсто, односно 400 гласачи, додека до 11 часот гласале 1.480 избирачи, или 9,11 отсто.

Зад општинскиот просек се кријат значителни разлики меѓу избирачките места. Највисока излезност до 15 часот е забележана на избирачкото место 2044 – 59,62 отсто, а најниска на избирачкото место 2036/1 – 12,43 отсто.

Податоците за пресекот до 15 часот ги опфаќаат сите 24 избирачки места. Во Избирачкиот список за Општина Брвеница се запишани вкупно 16.256 избирачи.

…

На предвремените избори за градоначалник на Општина Брвеница, до 13 часот гласале 3.331 избирач, односно излезноста изнесува 20,5 отсто, според податоците на Државната изборна комисија.

Податоците се доставени од сите 24 избирачки места во општината.

Според претходните пресеци, до 9 часот гласале 400 граѓани, со излезност од 2,46 отсто, додека до 11 часот своето право на глас го искористиле 1.480 избирачи, односно 9,11 отсто.

Во Избирачкиот список се запишани вкупно 16.256 граѓани, меѓу кои девет лица што се во затвор или притвор. Процентот на излезност на платформата е пресметан врз основа на 16.247 избирачи.

…

Во Општина Брвеница денеска се одржуваат предвремени локални избори за градоначалник. Избирачките места се отворени во 7 часот, а граѓаните ќе можат да гласаат до 19 часот.

Во Избирачкиот список се запишани 16.256 граѓани од десетте населени места во општината. Од нив, 449 се на привремена работа во странство, додека девет се во затвор или притвор.

По затворањето на избирачките места ќе започне пребројувањето на гласовите. Државната изборна комисија сукцесивно ќе ги објавува првичните резултати добиени по електронски пат.

Општинската изборна комисија треба да ги објави првичните резултати во рок од седум часа по завршувањето на гласањето, врз основа на податоците од избирачките одбори. Резултатите ќе бидат истакнати и на општинската огласна табла и соопштени преку јавните гласила.

За избор на градоначалник во првиот круг, кандидатот треба да освои мнозинство од гласовите на избирачите што гласале, при излезност од најмалку една третина од вкупниот број запишани избирачи. Доколку не биде исполнет условот за излезност, изборната постапка се повторува.

Конечните резултати ги утврдува и објавува Државната изборна комисија во законски предвидените рокови.

…

Се рехабилитира локалниот пат што поминува низ Мажучиште и ги поврзува општините Прилеп и Долнени, во должина од околу два километра, информира градоначалникот на Прилеп, Дејан Проданоски.

Според него, делницата има значајна улога во секојдневното движење на граѓаните, а со рехабилитацијата се подобруваат условите за сообраќај и поврзаноста меѓу населените места.

„Вложуваме во инфраструктура што значи подобра поврзаност и поквалитетно секојдневие за граѓаните“, истакна Проданоски.

Градоначалникот нагласи дека квалитетната патна инфраструктура е важен дел од рамномерниот развој на општината и најави продолжување на инвестициите според потребите на жителите.

„Продолжуваме со инвестиции во проекти што одговараат на реалните потреби на граѓаните и носат конкретни подобрувања на терен“, порача Проданоски.

ВИДЕОТО МОЖЕ ДА ГО ПОГЛЕДНЕТЕ ТУКА

…

Дел од улицата „Никола Карев“ во Пробиштип се реконструира за да се обезбедат подобри услови за одвивање на сообраќајот, информира градоначалникот на Општина Пробиштип, Тони Тоневски.

Проектот предвидува целосно отстранување на стариот асфалт, поставување нова подлога и два слоја асфалт, како и изградба на потпорни ѕидови и нови тротоари.

Според најавата на Тоневски, доколку временските услови дозволат, новиот асфалт ќе биде поставен веќе следната недела. Паралелно со овие активности, предвидено е да се заврши и асфалтирањето на дел од улицата „Јаким Стојковски“.

„Продолжуваме посветено да работиме на подобрување на патната инфраструктура, зголемување на безбедноста во сообраќајот и создавање поквалитетни услови за живот на сите наши сограѓани“, порача Тоневски.

…