И покрај тоа што паркирањето во Битола било бесплатно по повод „Роденденска Битола“, 1.363 корисници испратиле вкупно 2.747 СМС-пораки за регулирање на паркинг-сесиите, соопштија од „Паркинзи Битола“.

Од јавното претпријатие најавија дека целиот приход од испратените пораки ќе биде префрлен во приходите од хуманитарните паркинзи. Во соопштението не е наведен износот на собраните средства.

…

Се рехабилитираат три километри од локалниот пат што ги поврзува Веселчани и Загорани со регионалниот пат Прилеп – Битола, соопшти градоначалникот на Прилеп, Дејан Проданоски.

Според Проданоски, делницата се обновува по 50 години. Со поставувањето нов асфалт ќе се подобрат условите за сообраќај и ќе се олесни пристапот на жителите на двете населени места до регионалниот пат.

„Продолжуваме со инвестиции во патната инфраструктура и подобрување на условите за живот во сите населени места“, порача Проданоски.

ВИДЕОТО МОЖЕ ДА ГО ПОГЛЕДНЕТЕ ТУКА

…

Жителите на Битола и околните населени места ги изнесоа своите предлози за општинскиот буџет за 2027 година на втората сесија од Буџетскиот форум. Меѓу темите беа инвестициите во Старата чаршија, санацијата на патиштата кон Долно Оризари и во Поешево и чистењето на каналите во населените места.

Граѓаните ја посочија и потребата од отворање центар за средно образование за лица со попреченост. На форумот се разговараше и за сообраќајната студија и за Генералниот урбанистички план на Битола, кој е во фаза на изработка.

Од Општина Битола велат дека форумот им овозможува на жителите да предлагаат решенија и да учествуваат во утврдувањето на приоритетите за трошење на јавните средства. По завршувањето на административните постапки, предлог-буџетот ќе оди на комисиска расправа, а потоа и на седница на Советот на Општина Битола.

Општината го организира Буџетскиот форум петта година по ред.

…

Премиерот Христијан Мицкоски побара МВР да реагира на нападите меѓу малолетници во Тетово, кои се снимаат и се објавуваат на ТикТок. Тој рече дека, согласно законот, треба да одговараат и малолетниците што ги извршиле нападите и нивните родители.

На новинарското прашање дали има информации за конкретните случаи и дали полицијата постапила, Мицкоски упати одговор да се побара од Министерството за внатрешни работи.

„Прашањето ќе го поставите до МВР, ќе ви дадат одговор. Инаку, апсолутно треба да реагираат не само со малолетниците што напаѓаат, туку и со нивните родители и согласно закон треба да одговараат“, рече Мицкоски

…

Копретседателот на ВЛЕН и градоначалник на Општина Чаир, Изет Меџити, посети три компании во Општина Боговиње, каде што со нивните раководства разговараше за предизвиците во производството и за условите што им се потребни за нови инвестиции. Посетите следуваа по обиколката на инфраструктурните проекти во општината.

Во „Фриготехника 2000“, Меџити се запозна со производството на опрема за ладење за трговскиот сектор, која се продава и на европските пазари. Во „БесаШоп – Фати 2000“ беше претставен процесот на рециклирање и преработка на инертни материјали што повторно се користат во градежништвото.

Последната посета беше во Камењане, во „Мултипарк Изаири / МПИ Копер“, каде што се произведуваат бакарни жици и полупроизводи од бакар за меѓународните пазари.

Меџити посочи дека и општината и централните институции имаат улога во создавањето услови за проширување на производството. Според него, подобрата инфраструктура и поедноставните процедури можат да им помогнат на локалните компании да инвестираат, да отворат нови работни места и да придонесат за економскиот развој на општините.

…

Вкупно 556 пензионери со платежни сметки во „АЛТА банка“ АД Битола, кои немаат платежни картички, подигнале средства на шалтерите во битолската филијала на 5 ноември, соопшти Народната банка.

Првично биле планирани околу 400 исплати, а граѓаните биле повикани преку СМС-пораки. Според Народната банка, на шалтерите биле услужени и граѓаните што немале оставено телефонски број за контакт и дошле без да добијат порака.

Корисниците можеле да подигнат до 20.000 денари, колку што изнесува максималниот дозволен износ за повлекување во период од две недели.

Министерството за социјална политика, демографија и млади ги уплатило средствата за социјална помош на сметките во банката. Со тоа, според Народната банка, исплатата за овие корисници може да почне во петок, 6 ноември.

Филијалата во Битола во петок ќе работи во две смени, а ќе биде отворена и во сабота, 7 ноември. Народната банка очекува по завршувањето на подготовките следната недела да се отворат шалтери и во други градови.

…

Пробиштип беше домаќин на Национален младински дијалог, на кој учествуваа млади од Пробиштип, Берово, Пехчево, Виница, Зрновци и Кавадарци, како и младински работници. На настанот присуствуваше и градоначалникот на Општина Пробиштип, Тони Тоневски, кој во интерактивна сесија разговараше со младите за нивните ставови, потреби и предлози.

Тоневски истакна дека прашањата и предлозите од надлежност на локалната самоуправа биле конкретни и детално образложени, а најголемиот дел од нив се совпаѓале со општинската стратегија и планот за развој.

„Ме радува што прашањата и предлозите кои се од надлежност на локалната самоуправа беа конкретни и детално образложени од младите, како и што најголемиот дел од нив се поклопуваат со нашата стратегија и план за развој на општината“, посочи Тоневски.

Тој информираше дека на последната седница на Советот на Општина Пробиштип бил усвоен Акцискиот план за млади за 2027/2028 година, кој предвидува конкретни активности за подобрување на условите и можностите за младите во општината.

Тоневски порача дека локалната самоуправа останува посветена на поддршката на младите и на создавањето можности за нивно активно учество, со цел нивните идеи и иницијативи да имаат вистинско значење во развојот на заедницата.

„Иднината се гради заедно со младите!“, нагласи тој.

…

Дел од корисниците во Тетово утре, 6 ноември 2026 година, ќе останат без електрична енергија поради планирани прекини во снабдувањето.

Од 09:00 до 14:00 часот, без струја ќе бидат објектите на патот за селото Требош.

Од 09:30 до 12:00 часот, прекин ќе има кај објектите во близина на Стариот катастар, како и на потегот од Стариот катастар до Горна чаршија.

Од 11:45 до 13:30 часот, без напојување ќе останат објектите зад стара „Тетовчанка“ и делови од улиците „Љ. Момировски“, „Мара Исаева“, „141“ и „142“.

…

Како да се подобрат здравствените и социјалните услуги на локално ниво е главната тема на меѓународната конференција „Health and Social Services – Challenges and Opportunities“, која се одржува во Прилеп. Настанот го организира Здружението „Центар за развој и едукација“ – Прилеп, во рамките на проектот ТРАНСАКТ.

На панел-дискусиите учествуваат претставници од Австрија, Србија, Албанија, Црна Гора и Македонија. Тие разговараат за законската и институционалната рамка, за предизвиците со кои се соочуваат општините и за можностите услугите да станат поквалитетни и подостапни.

Градоначалникот Дејан Проданоски ги поздрави учесниците и посочи дека Општина Прилеп, во соработка со институциите и граѓанските организации, работи на проширување на услугите за помош и нега во домот. Како приоритети ги издвои и поддршката за повозрасните лица, активното стареење и инклузијата на лицата на кои им е потребна дополнителна грижа.

„Верувам дека споделувањето на искуствата и добрите практики од другите држави може да ни помогне да ги надградиме постојните решенија и да отвориме нови можности за соработка“, истакна Проданоски.

Во рамките на посетата, градоначалникот во Општина Прилеп се сретна и со дел од странските гости, претставници на локални самоуправи и институции од земјите учеснички.

…

Општина Битола одржа работен состанок со претставниците на зимската служба за да ги усогласи активностите на надлежните претпријатија и институции пред почетокот на сезоната 2026/2027.

На состанокот присуствуваа градоначалникот Тони Коњановски и претседателот на Советот на Општина Битола, Бојан Бојкоски. Раководителката на Одделението за комунални дејности, Марјана Спасевска, ги претстави активностите предвидени со програмата за зимската сезона.

Коњановски ја нагласи важноста од ефикасно спроведување на програмата, за службите да можат навреме да интервенираат на терен. Програмата за сезоната 2026/2027 е веќе усвоена од Советот на Општина Битола.

…