Премиерот Христијан Мицкоски денеска потврди дека е добиена официјална потврда за билатерална средба меѓу министерот за надворешни работи Тимчо Муцунски и неговата бугарска колешка Велислава Петрова-Чамова, која треба да се одржи утре во Софија, на маргините на меѓународната конференција посветена на Коридорот 8. Средбата е потврдена и од бугарското Министерство за надворешни работи.

Мицкоски појасни дека точниот формат на разговорот дополнително ќе биде усогласен преку дипломатски канали. Можно е средбата да биде кратка билатерална средба на маргините на форумот или да се одржи во друг формат.

Премиерот порача дека главната порака од македонска страна ќе биде дека отворените прашања можат да се надминат единствено преку дијалог.

„Нашите пораки се јасни, дека само со дијалог можеме да дојдеме до решение од оваа состојба во којашто во моментот се наоѓаме“, рече Мицкоски.

Тој додаде дека Македонија се залага за добрососедски односи и сака што поскоро да ја реализира својата стратешка цел – членство во Европската Унија.

Средбата во Софија доаѓа по иницијативата од македонска страна, која уследи по посетата на претседателката на Европската комисија Урсула фон дер Лајен на Скопје. По нејзиниот совет, Мицкоски побара од Муцунски да испрати дипломатска нота со барање за средба со бугарската колешка.

Осврнувајќи се на неодамнешните пораки од бугарската претседателка Илијана Јотова, Мицкоски рече дека добро ги познава европските вредности и принципи, но оцени дека дел од земјите-членки ги заборавиле откако станале дел од Унијата.

„Јас во својата младост поминав многу години во самата Европска Унија и мене ми е многу јасна Европската Унија, јасни ми се вредностите на Аденауер, Шуман и Де Гаспери“, рече Мицкоски.

Конференцијата во Софија е посветена на развојот и стратешкото значење на Паневропскиот коридор 8, а на неа ќе учествува и Муцунски.

…

Една година по приклучувањето на Македонија кон СЕПА, граѓаните и компаниите имаат побрзи, поедноставни и поефикасни плаќања во евра, истакна министерката за финансии Гордана Димитриеска-Кочоска.

Таа посочува дека приклучувањето кон Единствената европска платежна област претставува значаен чекор во усогласувањето на земјата со европските стандарди во платежниот систем.

Според Димитриеска-Кочоска, Министерството за финансии ја спроведе клучната реформа со која Македонија се приклучи кон СЕПА, со што се создадоа услови за практична имплементација од страна на Народната банка и комерцијалните банки.

„СЕПА е пример дека реформите не се само промени во законите – туку конкретни придобивки за граѓаните и бизнисот“, посочува министерката.

Таа додава дека реформскиот процес продолжува, со цел дополнително унапредување на финансискиот систем и приближување на Македонија до европските стандарди.

…

На вториот регионален состанок во Белград, министерката за енергетика, рударство и минерални суровини Сања Божиновска со колегите од Србија, Грција и Бугарија разговараше за конкретни чекори за зајакнување на енергетската сигурност во регионот.

Во фокусот биле новите енергетски коридори и можностите за поголема диверзификација и регионално поврзување.

Според Божиновска, преку Вертикалниот гасен коридор Македонија добива нов правец за снабдување преку Грција, додека коридорот Исток–Запад отвора дополнителни можности за зајакнување на регионалните енергетски врски.

„Македонија станува важна енергетска врска во регионот“, порача Божиновска.

…

Градоначалникот на Општина Битола, Тони Коњановски, денеска го посети економското училиште „Јане Сандански“, каде е целосно реконструирана една училница и е набавен нов училишен мебел.

Инвестицијата е реализирана преку јавна набавка во вредност од 197.100 денари со вклучен ДДВ, со што се создадени подобри услови за учениците и наставниот кадар.

Во рамки на посетата, победничкиот тим од програмата „UPSHIFT“ го презентираше и своето дизајнерско решение за прочистувач на воздух за училници, „Airvia“.

Тимот „Eco friendly“, составен од Матеа Србиновска, Андреа Стојчевска, Марија Трпезановска и Леонардо Стојковски, го претстави производот како практично и функционално решение за подобрување на квалитетот на воздухот во училишните простории.

„UPSHIFT“ е програма за социјални иновации базирана на методологијата на дизајнерско размислување, наменета за млади кои развиваат решенија за конкретни проблеми поврзани со животната средина и климатските промени. Програмата ја спроведува организацијата „LEAD“ во соработка со Министерството за образование и наука и Бирото за развој на образованието.

Со поставувањето на прочистувачите во училниците, учениците и наставниците ќе имаат подобри услови за учење и работа, а воедно се поттикнуваат младите да креираат практични решенија за почиста и поздрава животна средина.

…

Министерката за енергетика, рударство и минерални суровини Сања Божиновска денеска учествува на Вториот министерски самит во Белград, каде со колегите од Србија, Грција и Бугарија разговара за конкретни чекори за зајакнување на регионалната енергетска сигурност и отпорност.

Како што посочува Божиновска, самитот го продолжува дијалогот започнат во Атина, но овојпат фокусот е ставен на конкретни активности за подобро поврзување на енергетските системи во регионот.

Меѓу темите на состанокот се Вертикалниот гасен коридор, пристапот до LNG капацитетите преку Александруполи, диверзификацијата на изворите и правците на снабдување, како и зајакнувањето на регионалната соработка во електроенергетиката.

Божиновска истакнува дека Македонија е активен дел од овие процеси и дека нејзината географска положба, заедно со инфраструктурните проекти што се развиваат, создава можност земјата да биде важна енергетска врска меѓу југот и северот на Европа.

Во рамки на посетата на Белград, Божиновска ќе оствари и билатерална средба со бугарскиот министер за енергетика, на која ќе се разговара за натамошно продлабочување на соработката.

„Енергетската сигурност не завршува во нашите граници. Колку повеќе ги поврзуваме нашите системи, толку посигурен и поотпорен станува целиот регион“, порача Божиновска.

…

Со арии од „Тоска“, „Вертер“ и „Турандот“, Ѓорѓи Цуцковски се претстави на две концертни вечери на меѓународниот фестивал „Due Siciliae“. Македонскиот тенор, според неговото сведоштво, на двата настапа беше награден со бурни овации и повикан на бис.

Македонскиот тенор Ѓорѓи Цуцковски оствари успешно гостување во Сицилија, каде што настапи на два концерта во рамките на меѓународниот музички фестивал „Due Siciliae“. Со изведби на популарни арии од „Тоска“ и „Турандот“ на Џакомо Пучини и „Вертер“ на Жил Масне, тој ѝ ја претстави на италијанската публика својата вокална и уметничка интерпретација на дел од најпознатиот оперски репертоар.

Концертите се одржаа на 2 и 3 октомври 2026 година, во завршниот викенд на второто фестивалско издание. Првата вечер Цуцковски настапи во аудиториумот „Анџело Муско“ во Гравина ди Катанија, а следната вечер во црквата „Сант’Андреа“ во Мило, во областа Катанија. Двата настапи беа проследени со бурни овации, а публиката го врати Цуцковски на бис на двете концертни вечери.

За Цуцковски, ваквиот прием има особено значење поради можноста да ја претстави Македонија пред публика со длабока оперска традиција.

„Среќен сум и задоволен од овие настапи. Приемот кај публиката ми даде чувство на признание и потврда за мојата работа пред европска публика со високи критериуми и длабоко познавање на операта. Секогаш е големо задоволство да ја претставуваш својата држава како уметник надвор од нејзините граници, особено кога настапуваш на престижни сцени и пред публика за која операта е дел од културниот идентитет, речиси како фолклорот. Кога за изведбата ќе бидеш награден со бурни овации, тоа е потврда дека македонските уметници се рамноправни со светските и дека навистина имаме со што да се гордееме“, вели Цуцковски.

На двете вечери македонскиот тенор настапи со оркестарот „Винченцо Сконтрино“, под диригентство на маестро Давиде Галаверна. Како солист во продукцијата учествуваше и саксофонистот Џанфранко Брундо. Концертниот концепт ги поврза оперскиот глас, оркестарскиот звук и изразните можности на саксофонот, внесувајќи различни музички бои во програмата.

Изборот на арии од Пучини и Масне отвори простор за претставување на лирската чувствителност и драмскиот израз на Цуцковски. Овој репертоар бара вокална сигурност, внимателно обликување на музичката фраза и силна интерпретација, преку која емоцијата на оперските ликови допира до слушателите и во концертна изведба.

Неговото гостување беше истакнато уште во фестивалските најави. Организаторите го претставија како еден од истакнатите солисти во Европа, нагласувајќи ги моќта и топлината на неговиот тенорски глас. Учество на македонскиот уметник беше најавено и во италијанските медиуми.

Второто издание на „Due Siciliae“ се одржа од 29 август до 4 октомври, во организација на „AreaSud“, под уметничко раководство на Кети Теријака и Џанфранко Брундо. Програмата опфати настапи во Гравина ди Катанија, Катанија и Мило, поврзувајќи класична и камерна музика, џез, традиционални звуци и современи жанровски спојувања.

Со двата настапа во Сицилија, Цуцковски ја продолжува својата меѓународна уметничка дејност и придонесува за видливоста на македонската оперска уметност надвор од државата. Приемот за кој сведочи уметникот е и лична радост и поттик за нови средби со европската оперска публика.

…

Потпретседателот на Собранието и член на Извршниот комитет на ВМРО-ДПМНЕ, Антонио Милошоски, во дебатната емисија „Топ тема“ на телевизија Телма оцени дека Македонија е блокирана од Бугарија во процесот на евроинтеграциите.

Милошоски ги коментираше ставовите на заменик-претседателката на СДСМ, Фани Каранфилова Пановска, која оцени дека Македонија е блокирана од самата себе и од премиерот Христијан Мицкоски.

Според Милошоски, ваквата позиција се совпаѓа со тезата што ја застапува бугарската влада.

„Бугарија веројатно нема потреба од амбасадор во Скопје. Бидејќи заменик-претседателот на СДСМ со пубертетски жар ја застапува и ја промовира тезата на владата во Софија, а тоа е дека Македонија сама се блокирала во процесот на евроинтеграциите. Жално, но вистинито“, рече Милошоски.

Тој посочи дека според него, наместо одговорноста за застојот во евроинтегративниот процес да се адресира кон Бугарија, од СДСМ вината се префрла врз Македонија и актуелната влада.

Видеото може да го погледнете тука

…

По повод 5 Октомври – Меѓународниот ден на учителот, градоначалникот на Општина Пробиштип, Тони Тоневски, упати благодарност до сите просветни работници за нивната посветеност во образованието и воспитувањето на децата.

Тоневски посочи дека наставничката професија носи голема одговорност и бара трпение, посветеност, флексибилност и љубов кон децата.

„Денес сакам да упатам една искрена благодарност за секој час, за секој совет, за секое охрабрување и за секој момент во кој сте му помогнале на едно дете да верува во себе“, порача Тоневски.

Во рамки на одбележувањето на Денот на учителот, биле доделени и признанија на учители кои во изминатата учебна година се издвоиле со својата работа и постигнати резултати и дале придонес во образованието и воспитувањето на учениците.

Тоневски упати честитки до наградените учители и им посака на сите просветни работници здравје, инспирација и успех во нивната работа.

„Децата нека ни бидат најголемиот мотив, а нивната иднина – нашата најголема заедничка цел“, порача градоначалникот на Пробиштип.

…

Од полноќ се намалуваат највисоките малопродажни цени на бензините, дизелот и екстра лесното масло за домаќинство.

Според новата одлука, цената на ЕУРОСУПЕР БС-95 се намалува за 1,50 денар за литар и ќе изнесува 98,50 денари.

ЕУРОСУПЕР БС-98 поевтинува за 1,50 денар, па новата цена ќе биде 100,50 денари за литар.

Најголемо намалување има кај дизелот. ЕУРОДИЗЕЛ (Д-Е V) поевтинува за 3 денари за литар и од полноќ ќе се продава по највисока малопродажна цена од 97 денари за литар.

За 3 денари по литар се намалува и цената на Екстра лесното масло за домаќинство (ЕЛ-1), која ќе изнесува 108,50 денари.

Намалување има и кај мазутот М-1 НС. Неговата цена се намалува за 0,285 денари за килограм и ќе изнесува 49,597 денари за килограм.

Новите цени стапуваат на сила од полноќ.

…

Ново исклучително археолошко откритие кај струшкото село Корошишта фрла дополнително светло врз животот и општествената структура на заедниците кои живееле во Охридско-струшкиот регион во VI век пред нашата ера.

На архајската некропола Расница археолозите откриле богато војничко погребување со комплетна воена опрема, меѓу која штит, шлем, копја и меч, како и вредни предмети изработени од злато, бронза и килибар.

Од Националниот археолошки музеј велат дека откритието дополнително го потврдува карактерот на локалитетот како значајна архајска некропола и отвора можност за нови сознанија за погребните обичаи, воената организација и општествената структура на тогашните заедници.

Расница привлече големо внимание во 2024 година, кога археолозите открија монументална гробна целина со исклучително богат материјал. Меѓу тогашните наоди биле бронзен шлем со златни апликации, бронзен штит, златен надградник, златни прстени и фолии, килибарни и стаклени мониста, сребрени игли и кантарос, како и повеќе бронзени садови.

Најновото војничко погребување, според музејот, овозможува попрецизно да се согледаат статусот, идентитетот и улогата на луѓето кои биле погребувани на овој простор.

Археолошките истражувања на локалитетот ги предводи д-р Перо Арџанлиев, кустос советник во Националниот археолошки музеј.

На денешната презентација на резултатите од истражувањата ќе присуствуваат и директорката на Националниот археолошки музеј Магдалена Манаскова и директорката на Управата за заштита на културното наследство Весела Честоева.

Архајскиот период опфаќа приближно од VIII до почетокот на V век пред нашата ера. Тоа е време на интензивен развој на градовите-држави, трговијата и културните контакти низ поширокиот медитерански простор.

Откритијата на Расница затоа имаат особено значење за проучувањето на заедниците кои во тој период живееле во Охридско-струшкиот регион и нивните контакти со поширокиот културен простор.

…