Инфо +

Жените треба да излегуваат со пријателки барем двапати неделно ако сакаат да бидат здрави

Жените сега имаат одличен изговор за да излезат со своите пријателки. Според едно ново истражување, жeните треба да излегуваат со пријателките барем двапати неделно за да си го подобрат здравјето. Ако уживате во излегувањето со женско друштво, правете го тоа почесто зашто така дефинитивно ќе бидете посреќни и поздрави.

Истражувањето го спроведе група истражувачи од Универзитетот Оксфорд. Истражувањето ги откри неопходните чекори за една жена да биде среќна во сите аспекти од животот и ги постави основите за жените да се чувствуваат слободни да излегуваат со пријателките.

Робин Данмар, психолог и одговорен за истражувањето, вели дека општото здравје на жените се подобрува кога се среќаваат со најдобрите пријателки двапати неделно и на тие средби прават што сакаат. Според истражувањето, меѓу активностите кои ги прават се пиење пиво, трачарење и разговарање за нивните ривали. Така тие се социјализираат, пијат и се смеат заедно.

Меѓу бенефитите по здравјето доколку практикувате вакви излегувања се побрзо закрепнување од болест, посилен имунолошки систем, намалена анксиозност и поголема дарежливост. Истражувачите, исто така, забележаа дека само 2 од 5 жени излегуваат со пријателките еднаш неделно, а некои и многу поретко ако имаат семејства за кои треба да се грижат.

Истражувањето се фокусирало и на квалитетот на интеракцијата меѓу пријателките, според времето поминато надвор и бројот на луѓе. Во просек, жените издвојуваат помалку од половина од своето време за негување на тие пријателства. Понатаму, истражувачите дознале дека жените најдобро комуницираат со смешни и зајадливи коментари, шеги и разговор за работи кои ги засмеваат, но бројот на луѓе во групата исто е битен фактор.

Смеењето во помали групи е позастапено, но кога на средбата има повеќе од пет жени, веројатноста за заразно смеење и покачен ендорфин е помала. Затоа се препорачува да се среќавате со максимум три пријателки одеднаш. Според резултатите, жените имаат поголема потреба од одржување на тие конекции, а тоа им станува се побитно како што созреваат и стареат. „Позафатени сме, имаме повеќе одговорности, а средбите со пријателките прават да се чувствуваме негувани и ценети” велат истражувачите.

Реалноста е дека ни треба време за себе, да избегаме од секојдневната рутина, да се релаксираме и да ги видиме блиските пријатели во живо. Тие средби не регенерираат. Застанете и размислете кога последен пат сте излегле со најдобрите пријателки?

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.