Министерот за дигитална трансформација Стефан Андоновски вели дека со законските измени со кои отсега печатената верзија на документот изваден по електронски пат преку порталот uslugi.gov.mk станува валидна, граѓаните нема да плаќаат двапати како досега кога поради неважење на печатената верзија беа принудени повторно да го вадат истиот документ на шалтерите и за истиот да плаќаат.

– Ново во законот е тоа што не се врши дополнителна проверка што претходно мораше да се направи за документот да биде валиден. Претходно можеше документот да се користи електронски, но неговата печатена верзија не важеше. Сега со измените, печатената верзија на електронскиот документ е целосно валидна, има времен жиг, електронски печат и потпис, појасни Андоновски во вечерашното гостување на телевизија Телма.

Во однос на порталот uslugi.gov.mk, Андоновски рече дека се дигитализирале услуги кои било најлесно да се дигитализираат и токму затоа има услуги што никогаш досега не се искористени или се користени два до три пати.

За дигитализацијата, рече дека наследил состојба во која овој процес бил оставен да пропаѓа, а наследил и три тужби од повеќе милиони евра од Македонската радио телевизија, Агенцијата за аудио и аудиовизуелни медиумски услуги и Радиодифузија.

Борбата за правда продолжува и се надевам дека ако не во кривична постапка, тогаш во граѓанска постапка ќе се утврди кој го вршел прислушувањето, напиша на својот фејсбук-профил Гордана Јанкуловска, поранешната министерка за внатрешни работи која беше обвинета во случајот „Тврдина“. Таа изјави дека е задоволна од денешната пресуда на Основниот кривичен суд.

„Календарски помина речиси една деценија, а како да поминаа три животи на некој што доживеал длабока старост. Само семејството и релативно мал круг блиски луѓе и пријатели знаат како изгледаа овие години.

Задоволна сум од денешната одлука на судот кој ги уважи нашите аргументи. Без оглед што во кривичната постапка не се утврди виновникот за масовното прислушување, што мене како една од најголемите жртви на овој монструозен чин и на моето семејство од корен ни ги промени животите и ни нанесе ненадоместлива штета, борбата за правда продолжува и се надевам дека ако не во кривична постапка, тогаш во граѓанска постапка ќе се утврди кој го вршел прислушувањето“, напиша Јанкуловска.

Ќе се истражат сите индиции за незаконско и непрофесионално работење во Агенцијата за национална безбедност (АНБ), вели директорот Бојан Христовски на прашање на Политика во врска со наводите за незаконското следење на премиерот Христијан Мицкоски и неговото семејство.

Христовски, токму во интерес на истрагата не е во можност да открие дополнителни информации во јавноста. Тој неодамна најави подобри услови за работа и професионализација на безбедносните служби за да бидат на рангот на меѓународната безбедносна заедница, но и да се спречат евентуални злоупотреби и незаконско работење на тајната полиција за што допрва ќе следат реформски потези.

Политика во неколку наврати пишувашеза злоупотреби од страна на тајна полиција чии оперативци во овој случај својата валкана работа ја потпишувале под кодно име „Џокер“ и „Цилиндер“ и кои пред четири години се обиделе да направат компромитирачко досие со измислени извештаи за тогашниот лидер на најголемата опозициска партија како водач на паравојска.

Јован Јовчески, доктор по кривично правни науки и поранешен вработен во ДБК, МВР и Оперативно техничката агенција (ОТА), во интервју за Политика изјави дека разузнавачката операција против Мицкоски, како лидер на најголемата опозициска партија,е иницирана и започната во Агенцијата за разузнавање (АР), легализирана во АНБ, а наредена од директорот на АНБ, како што е пропишано во членот 4 и 31 од Законот за АНБ.

Според него во случајов била злоупотребена одредбата, според која директорот може да одобри спроведување на мерки за тајно собирање на податоци и информации, користење на тајни соработници, користење лица со прикриен идентитет, таен откуп на предмети и документи и набљудување.

Тој вели дека мора да постојат во Агенцијата за разузнавање (АР) или во Агенцијата за национална безбедност (АНБ) некави пишани „траги“ наредба, службени белешки и извештаи за следењето на Мицкоски, што беше повод да разговараме со директорот на АНБ.

Инаку, Јавното обвинителство по допрен глас отвори истрага откако премиерот на собраниска седница обелодени дека  безбедносни служби, во периодот од 2020 до 2021 година, го следеле додека бил лидер на опозицијата, а со оглед на, како што нагласи Обвинителството, сензитивната природа на случајот потребна е внимателна и детална истрага.

С.М.