Потпретседателката на Бугарија Илијана Јотова истакна дека во преговарачката рамка договорена во 2022 година, врз основа на францускиот предлог, нема бугарски барања, туку европски критериуми за членство, од кои главен е заштитата на човековите права.

Потпретседателката на Бугарија Илијана Јотова денеска ја критикуваше идејата да се укине ветото при проширувањето на Европската Унија, што ја заговара идниот германски канцелар Фридрих Мерц.

На форумот „Европската Унија се среќава со Балканот“ таа рече дека билатералните односи на Софија и Скопје не се проблем за Македонија да почне преговори за членство со ЕУ.

Јотова ги критикуваше плановите во ЕУ проблемот со гласањето при проширувањето да се реши со квалификувано мнозинство, наместо со консензус.

– Има некои држави кои сакаат да го променат европското законодавство и начинот на донесување одлуки. Не можам да се согласам со обидите за промена на едногласноста во одлучувањето, особено за прашањето за проширувањето – рече Јотова.

Според неа, не може да има компромиси со условите за проширување.

Јотова додаде дека барањата за Македонија се дел од преговарачкиот процес со Европската Унија, а не се билатерални прашања.

– Бугарија не наметнува дополнителни услови за процесот и преговорите на Република Северна Македонија на нејзиниот пат кон Европа. Билатералните односи меѓу двете земји не се проблем за неотпочнување на преговорите на Северна Македонија, тоа е теза на политичарите од РСМ, како и на некои европски политичари и експерти. Она што Бугарија го сака е да се почитуваат европските критериуми, како што секоја земја која тргна на патот кон вистинско членство во ЕУ ги почитува овие критериуми по цена на многу тешки одлуки и компромиси. И натаму веруваме дека правата на Бугарите во Република Северна Македонија не се заштитени – рече Јотова.

Таа истакна дека во преговарачката рамка договорена во 2022 година, врз основа на францускиот предлог, нема бугарски барања, туку европски критериуми за членство, од кои главен е заштитата на човековите права. Јотова кажа дека договорената рамка е европски документ што мора да се почитува  да се имплементира и дека не може да се додава, брише, менува или да се става „во втор план“.

Според Јотова, запирањето или замрзнувањето на процесот на проширување на ЕУ ќе донесе уште поголема нестабилност, конфликти и влијание на други непријателски сили во регионот.

– Потребен е јасен одговор на прашањето дали ЕУ сака земјите од Западен Балкан, како и Украина, Грузија и Молдавија да имаат блиска и вистинска европска перспектива – рече потпретседателката на Бугарија.

На борумот во Софија учествуваше и заменик-министерот за надворешни работи на Македонија, Зоран Димитровски, кој истакна дека за Скопје не е проблем промената на Уставот, туку поставените барања за историјата на Македонија и за идентитетот на Македонците.

Ружа Рајчева, бугарска новинарка и политичка аналитичарка од Софија, со позитивни впечатоци по враќањето од Македонија.

„Во Македонија не помнам дека сум видела ниту една реклама за коцкање (само за брзи кредити). Се враќаме во Бугарија и нè преплавуваат огласи за коцкање, кои ни кажуваат дека сме најбогати во Европа, мора некаде да ги трошиме парите… нешто и некаков закон божем донесоа за неговото ограничување, а тоа дури и се засили.

И уште нешто – патиштата во Македонија, која е надвор од ЕУ, се драстично подобри и почисти од Бугарија“, коментира Рајчева на Фејсбук.

Францускиот министер: Наркокартелите стојат зад нападите врз затворите – обвинителството за тероризам ја презеде истрагата

По серијата координирани напади врз затвори низ повеќе градови во Франција, министерот за внатрешни работи, Бруно Ретајо, изјави дека Националното обвинителство за борба против тероризмот веќе презема активности и располага со потребните ресурси за справување со ситуацијата.

Ретајо, во изјава за RTL, нагласи дека зад нападите најверојатно стои нарко-мафијата. „Моето цврсто убедување, кое го делат и повеќе агенти од Министерството за внатрешни работи, е дека имаме работа со таканаречениот ‘нарко-олош’. Тие можеби не ни објавија војна, но ние ним – да, преку законите за борба против трговијата со дрога“, рече тој.

Од неделата досега, нападнати се околу десет затвори, но изминатата ноќ поминала мирно. Министерот истакна дека сторителите ќе бидат пронајдени, потсетувајќи на апсењето на бегалецот Мохамед Амра во Романија.

Иако засега нема уапсени, истрагата не ја исклучува можноста за вмешаност и на екстремната левица, како ни на странски фактори. Сепак, Ретајо смета дека најверојатна е поврзаноста со криминални наркоструктури.

„Се работи за луѓе без капацитет – им било наредено да ги палат автомобилите на чуварите, а тие запалиле возила на затвореници“, изјави тој со доза на иронија.

Француското обвинителство за борба против тероризмот официјално отвори истрага во вторникот, откако изминатите денови беа извршени напади на затвори во неколку градови. Првиот инцидент се случи во неделата во Ажен, каде беа запалени седум возила пред Националното училиште за кадри во затворската служба (ENAP).

Во ноќта меѓу понеделник и вторник, напади беа регистрирани и во Тулон, каде се пукаше кон затворската ограда со автоматско оружје, како и во Нантер, Марсеј и Ним, каде беа запалени возила на затворски паркинзи.

Извори блиски до истрагата посочуваат дека нападите биле координирани и претставуваат реакција на заострувањето на затворскиот систем, односно воведувањето на затвори со највисоко ниво на безбедност и новата стратегија на Министерството за правда во борбата против трговијата со дрога.