Во Мелник и Рожен, на 27 април 2025 година, беше свечено одбележана 110-годишнината од убиството на Јане Сандански, големиот македонски револуционер познат како „царот на Пиринот“. Настанот беше организиран од повеќе македонски организации, меѓу кои ОМО „Илинден“-ПИРИН, ОМО „Илинден“, Друштвото на репресираните Македонци во Бугарија и Македонското меѓународно движење за човекови права.

И покрај заплашувачката кампања која се водеше преку бугарските социјални мрежи и медиуми, како и проблемите на границата со забраната за влез на Тихомир Стојановски, на соборот се собраа многу Македонци од Пиринска Македонија, Република Македонија, Егејска Македонија, Бугарија и дијаспората. Присуствуваа бројни делегации, меѓу кои претставници на ВМРО-ДПМНЕ, ИНТЕГРА, Друштвото на Македонците од Егејска Македонија и македонската амбасада.

Панихида на гробот на Сандански одржа отец Никодим Царкњас, а со поздравен говор настапи претседателот на ОМО „Илинден“ Кирил Тилев. Соборот го отвори ко-претседателот на ОМО „Илинден“-ПИРИН, Стојко Стојков, кој порача дека како и Јане некогаш, така и денес македонското малцинство во Бугарија се спротивставува на шовинизмот и негирањето на македонскиот идентитет.

Настанот беше збогатен со настапи на ансамблите „Јане Сандански“ од Ново Село и „Пирински Глас“ од Разлог, како и настапи на Круме Спасовски, Василија Петрова и оркестарот на Панчо Иванов. Се пееја македонски песни, се играа македонски ора и се вееја македонски знамиња.

Организаторите упатија благодарност до сите кои ја дадоа својата поддршка со пораката дека следната година ќе бидат уште побројни.

Со голема радост и достоинство, жителите на Мала Преспа, село Шулин, го прославија најголемиот христијански празник – Велигден. Во дворот на црквата Св. Ѓорѓија се одржа торжествена прослава која беше овековечена со дронска снимка, прикажувајќи ја величествената атмосфера.

Настанот беше збогатен со традиционални македонски ора и песни, носејќи го духот на вековната култура и вера. Многубројните верници и гости со заедничка радост го честитаа празникот, испраќајќи желби за мир, здравје и благосостојба.

Видеото може да го погледнете тука

Под силно полициско обезебдување во Мелник се одбележаа 110 години од убиството на Царот на Пиринот Јане Сандански. 

На семакедонски традиционален собир во негов спомен присуствуваа и пратениците од ВМРО-ДПМНЕ, Сајковски, Ковачки и Мицевски, кои на фејсбук објавија:

„Македонски национален херој, војвода и водич на Македонската револуционерна организација, кој до крајот на својот живот останал да се бори за самостојна Македонска држава“. 

Но, не секој што сакал да присуствува на собирот, успеал да помине граница. Професорот на Факултетот за драмски уметности во Скопје, Тихомир Стојановски тргнал за Мелник, ама стигнал само до граница. Тврди дека Бугарите му забраниле влез со објаснување дека претставувал закана за безбедноста на државата. 

Им порача на бугарските политичари да ги признаат Македонците.

Инаку, бугарските медиуми изминатите денови пишуваа дека на Фејсбук се шири масовна кампања за присуство на Македонц во Мелник. НОВА.БГ сподели дека се очекувало во Мелник за чествувањето на Јане Сандански да пристигнат неколку автобуси, со како што пишуваат, антибугарски настроени Македонци. 

„Тежок пристапот до соборот Мелник под блокада на бугарската полиција. Проверка од чувари на коли и на документи“, предупреди вчера и Атанас Кираков, претседател на градскиот комитет на Илинден во Благоевград. 

Но, сепак денешниот собир помина без провокации