Синоќа во 20.40 часот во Скопје, на подрачјето на Ѓорче Петров, полициски службеници од Единицата за интервентна полиција при СВР Скопје лишиле од слобода двајца малолетници од село Сарај, скопско.

Кај нив биле пронајдени и одземени два ножа и еден боксирач.

По целосно документирање на случајот ќе следува соодветен поднесок, соопшти полицијата.

По три децении запоставување, жителите на Кисела Вода и околните населени места конечно ќе добијат реконструирана патна делница Драчево – Пеленица. Градоначалникот Орце Ѓорѓиевски денес, заедно со премиерот Христијан Мицкоски, го означи почетокот на овој капитален проект, дел од серијата значајни инфраструктурни инвестиции во општината.

„Ова е историски момент за Кисела Вода. Патот Драчево-Пеленица, долг 3.370 метри, конечно ќе добие нов лик и значително ќе го подобри квалитетот на живот на жителите. Со оваа реконструкција, која чини 25 милиони денари, ја покажуваме нашата заедничка посветеност кон развојот и благосостојбата на регионот,“ изјави Ѓорѓиевски.

Проектот вклучува поставување нов асфалт, изградба на тротоар од едната страна – нешто што досега не постоело – како и модерен систем за одведување на атмосферските води. Оваа сообраќајница е од витално значење, бидејќи ја поврзува општина Кисела Вода со селата и соседната општина Студеничани.

„Инфраструктурниот бум во Кисела Вода продолжува. По изградбата на новата детска градинка и реконструкцијата на спортската сала ‘Расадник’, денес го започнуваме и овој капитален проект кој ја докажува нашата заложба за напредок. Заедно со Владата, создаваме подобри услови за живот и развој,“ додаде градоначалникот.

Премиерот Христијан Мицкоски ја истакна важноста на овие проекти, подвлекувајќи дека Владата останува фокусирана на капитални инвестиции што директно го подобруваат животот на граѓаните.

Очекувањата се реконструкцијата да заврши за осум месеци, поставувајќи нови стандарди за безбедност, функционалност и ефикасност на сообраќајот во регионот. „Ова е само почетокот на најдоброто што допрва доаѓа за нашиот народ,“ увери градоначалникот Ѓорѓиевски.

Одделот за внатрешна контрола, криминалистички истраги и професионални стандарди при МВР до надлежното Основно јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворска полиција, поднесе кривична пријава против полициските службеници А.А., на работно место во ПС од ОН Гази Баба, А.А. на работно место во ПО Арачиново, Б.Џ., на работно место во ПО Арачиново и В.С., на работно место во ПО Арачиново при СВР Скопје за кривично дело ,,злоупотреба на службената положба и овластувања“ по член 353 од КЗ и за едно кривично дело „измама во службата“ по член 355 став 1 од Кривичниот законик против полицискиот службеник Б.М., на работно место во ПС од ОН Гази Баба при СВР Скопје.

Првопријавениот, како заменик командир на ПС од ОН Гази Баба ја злоупотребил службената положба и овластување на начин што како раководител со несоодветно водење на евиденција за распоред на работа, спротивно на подзаконски пропис со кој се пропишува начинот на евидентирање на реализираните часови на вработените во Министерството за внатрешни работи на 12 полициски службеници- вработени во ПС од ОН Гази Баба им овозможил да се стекнат со право за исплата на бонус плата во 2023 година и без да ги исполнат условите утврдени со Законот за работните односи на секој поединечно им била исплатена бонус плата во износ од 36.614 денари или вкупно 439.368 денари, во кој износ го оштетил буџетот на Министерството за внатрешни работи.

Второпријавениот, како командир на ПО Арачиново, третопријавениот како инспектор во ПО Арачиново и четвртопријавениот како инспектор во ПО Арачиново со несоодветно водење на евиденција за распоред на работа, спротивно на подзаконски пропис со кој се пропишува начинот на евидентирање на реализирани часови на вработените во Министерството за внатрешни работи, ја злоупотребиле службената положба и овластување на начин што на седум полициски службеници вработени во ПО Арачиново им овозможиле да се стекнат со право за исплата на бонус плата во 2023 година и без да ги исполнат условите утврдени со Законот за работните односи на секој поединечно им била исплатена бонус плата во износ од 36.614 денари или вкупно 256.928 денари, во кој износ го оштетиле буџетот на Министерството за внатрешни работи.

Петтопријавениот како вработен во ПС од ОН Гази Баба како службено лице со намера за себе да прибави противправна имотна корист поднел своерачно потпишана изјава со лажна содржина, во која изјавил дека има остварено повеќе од 150 часа прекувремена работа и немал повеќе од 21 ден отсуство од работа во текот на 2023 година, по што му било изготвено решение за утврдено право за исплата на бонус плата во висина од една просечна нето плата во износ од 36.614 денари без да ги исполни предвидените услови утврдени со закон, во кој износ го оштетил буџетот на Министерството за внатрешни работи.

Одделот за внатрешна контрола, криминалистички истраги и професионални стандарди против именуваните полициски службеници ќе поднесе предлог за поведување на постапка за кршење на работниот ред и дисциплина и ќе изрече задолжителна мерка за отстранување на работно место-суспензија до завршување на дисциплинската постапка.