Претседателката на Република Македонија, Гордана Сиљановска-Давкова, во своето новогодишно обраќање испрати порака на надеж, единство и стремеж кон правдата, моралот и достоинствениот живот за сите граѓани.

„Денес е денот кога оставаме зад нас сè што било и ја земаме со себе надежта за поубава година,“ порача Сиљановска-Давкова, истакнувајќи ја важноста од заедничка борба за право, правда и еколошка одговорност.

Таа ги повика граѓаните да го чуваат заедничкиот дом, да создадат општество каде секој има шанса за подобар живот, а младите се инспирирани за иднината. Претседателката посвети внимание на потребата од еколошка правда, потенцирајќи дека односот со природата треба да биде предуслов за стабилна и извесна иднина.

„Посакувам 2025-та година да биде година на успеси, стабилност, радост и остварени соништа. Да живееме во мир, спокој и хармонија со оние што ги сакаме,“ заврши Сиљановска-Давкова, испраќајќи искрени желби за среќна Нова година.

Видео: https://www.facebook.com/share/v/14eYGAJnpW/?mibextid=wwXIfr

Претседателката Гордана Сиљановска Давкова во својот кабинет во вилата Водно пред Нова година прими дечиња на кои им подари новогодишни пакетчиња.

Таа по приемот на дечињата вели дека должност на Македонија да се создадат услови овие дечиња да останат во својата земја.

,,🎁👫 Целосно ме разоружаа искрените детски прегратки, што со љубов ми го окупираа срцето додека им ги врачував новогодишните пакетчиња.

Од нивните насмеани очиња и зацрвенети обравчиња им се читаше возбуда и љубопитност да ѕирнат во празничното пакетче, кое секое од нив го доби непосредно пред новогодишната ноќ.

Детскиот и мелодичен џагор ни го разубави и развесели Кабинетот, каде што вредно работат нивните родители. 

Нема поголема среќа од тоа да ја споделам празничната магија со нив, да ги видам нивните насмевки и радост додека уживаа во прекрасната новогодишна претстава.

Должност ни е да им обезбедиме организирана, праведна и просперитетна татковина, од која нема да се нестрпливи да заминат”, објави претседателката.

Градоначалникот на Битола, Тони Коњановски, денес направи увид во завршните активности од првата фаза на изградбата на новиот противпожарен дом, кој претставува еден од најзначајните капитални проекти на општината.

Новата зграда, со површина од 1600 м², е дизајнирана според современите стандарди и прописи, обезбедувајќи оптимални услови за функционирање на противпожарната единица што ги покрива општините Битола, Новаци и Могила. Ова ќе значи значителни подобрувања во работните услови за пожарникарите од најстарата противпожарна единица на Балканот.

„Овој проект е доказ за нашата посветеност кон унапредување на инфраструктурата и безбедноста во регионот. Идната градежна сезона продолжуваме со активностите од втората фаза, со цел комплетно завршување на објектот,“ изјави Коњановски.

Новата зграда ќе претставува важен чекор кон подобрување на безбедноста и ефикасноста на противпожарната служба, овозможувајќи им на пожарникарите услови какви што заслужуваат.