Идниот германски канцелар Мерц предупредува: Трговската политика на Трамп може да ја забрза новата финансиска криза.

Идниот германски канцелар, Фридрих Мерц, го изрази своето силно загрижување дека трговските политики на американскиот претседател Доналд Трамп значително го зголемуваат ризикот од нова глобална финансиска криза. Во интервју за германскиот економски дневен весник Handelsblatt, Мерц изјави дека „следната финансиска криза сигурно ќе дојде — само не знаеме кога и зошто“, пренесе Politico.

Според Мерц, агресивниот протекционизам што го води Вашингтон може да биде катализатор за криза која ќе се појави многу порано од очекуваното.

Мерц, лидер на десноцентристичката Христијанско-демократска унија (CDU), минатата недела постигна договор за формирање коалициска влада со левицата – Социјалдемократската партија (SPD), која треба да започне со работа на 6 мај. Формирањето на новата германска влада доаѓа во момент на растечки економски тензии меѓу ЕУ и САД.

Канцеларот во најавa го истакна и своето залагање за нов трансатлантски договор за слободна трговија без царини, со цел да се ублажат последиците од американските мерки. Истовремено, најави дека Германија ќе работи на нови трговски договори со земји како Канада, Јужна Кореја и Индија.

Жалејќи за неуспешниот обид за склучување на Трансатлантско трговско и инвестициско партнерство меѓу ЕУ и САД во текот на 2010-тите, Мерц додаде дека Германија е отворена за увоз на американски течен природен гас.

„Европа мора да настапи единствено пред САД и да ја искористи шансата за напредок во клучните реформи“, нагласи Мерц, посочувајќи го обединувањето на пазарот на капитал како приоритет во наредните месеци. Овие ставови ги изнесе по разговорите со францускиот претседател Емануел Макрон, полскиот премиер Доналд Туск и британскиот премиер Кир Стармер.

Мерц, исто така, делумно се согласи со ставовите на Трамп за трошоците за одбрана, истакнувајќи: „Бевме бесплатни корисници на американската поддршка“.

Американскиот претседател Доналд Трамп неодамна најави 90-дневна суспензија на новите „реципрочни“ царини до 50 проценти, воведени претходно за речиси сите земји, вклучително и Европската унија. Тој посочи дека е можно да разгледа исклучоци и за 10-процентните царини за земјите подготвени да преговараат за нови трговски договори. Како одговор, Европската комисија соопшти дека и таа ќе ги суспендира своите контрамерки за истиот период.

Индија одобри набавка на 26 борбени авиони „Рафал“ од Франција за својата морнарица.

Индија ја одобри набавката на 26 борбени авиони „Рафал“ од Франција за потребите на својата морнарица, соопштија извори запознаени со одлуката, кои побараа анонимност поради неовластеност за јавна комуникација, пренесе агенцијата Ројтерс.

Според информациите, договорот треба да биде потпишан во наредните недели, а францускиот министер за одбрана Себастиен Лекорну планира посета на Индија пред официјалната ратификација.

Планираната набавка вклучува 22 едноседи и четири двоседи авиони од типот „Рафал-М“, кои ги произведува француската компанија „Дасо Авијација“.

Проценетата вредност на договорот изнесува околу седум милијарди долари.

Индиското Министерство за одбрана засега не издаде официјален коментар во врска со договорот.

Инаку, индиското воено воздухопловство веќе користи 36 авиони „Рафал“, додека морнарицата сè уште во најголем дел се потпира на руските авиони МиГ-29.

Очекувањата се дека новите француски авиони ќе ја зајакнат оперативната способност на индиската морнарица, особено во светло на зголемените геополитички тензии во Индо-Пацификот.

Се заоструваат односите меѓу САД и Мексико: Вашингтон обвинува за „кражба на вода“, Мексико ветува помош.

По обвинувањата од американскиот претседател Доналд Трамп дека Мексико го прекршува договорот за вода и дека наводно ја „краде водата од фармерите во Тексас“, мексиканската страна реагираше со најава за итна испорака на вода.

На прес-конференција во Мексико Сити, мексиканската претседателка Клаудија Шејнбаум изјави дека нејзината земја ќе испрати вода на американските земјоделци во Тексас, но не прецизираше количина, посочувајќи дека тоа ќе зависи од достапните резерви.

Шејнбаум истакна дека Мексико активно бара алтернативни решенија за да ги исполни обврските од договорот за вода со САД, кој датира од 1944 година. Таа потсети дека земјата се соочува со сериозна суша која трае веќе три и пол години, што го отежнува исполнувањето на обврските.

Американскиот претседател Трамп претходно на својата мрежа Truth Social објави дека Мексико ѝ должи на американската сојузна држава Тексас 1,6 милијарди кубни метри вода согласно договорот за распределба на вода од 1944 година.

„Мексико ја прекршува својата договорена обврска. Ова е многу неправедно и им нанесува голема штета на земјоделците во јужен Тексас“, напиша Трамп, предупредувајќи дека ќе следуваат „засилени последици“, вклучувајќи нови царини и можни санкции, доколку Мексико не го исполни договорот.

Во наредните денови се очекуваат дипломатски консултации за да се избегне понатамошна ескалација на ситуацијата.