Американскиот милијардер Илон Маск повторно влезе во остар конфликт со Брисел, откако Европската комисија ја казни неговата платформа X со 120 милиони евра поради прекршување на правилата од Законот за дигитални услуги (DSA).

Како реакција, Маск изјави дека „Европската Унија треба да се укине“ и дека суверенитетот мора да се врати на поединечните земји, „за владите подобро да ги претставуваат своите народи“.

Казната, изречена на 5 декември, се однесува на неколку прекршувања: измамнички дизајн на т.н. „сино отчукување“, недоволна транспарентност во складиштето за реклами и оневозможување на истражувачите да пристапат до јавни податоци.

Ова не е прв судир меѓу Маск и ЕУ. Тој претходно го нарече изборниот процес за претседател на Европската комисија „недемократски“, а најновата казна предизвика критики и од високи американски претставници, кои го споредија однесувањето на Брисел со „цензура“.

Кина денеска испука три сигнални ракети кон филипински патролен авион кој летал над Јужното Кинеско Море, соопшти филипинската Крајбрежна стража. Ракетите биле испукани од гребенот Суби, кој се наоѓа под кинеска окупација, но авионот не бил оштетен.

Филипинските власти наведуваат дека државниот истражувачки авион легално патролирал над подрачје кое Манила го нарекува Западно Филипинско Море, со цел да ја следи состојбата на морската средина, рибните ресурси и безбедноста на филипинските рибари.

Пекинг често користи сигнални ракети како предупредување за странски авиони да се оддалечат од зоната што ја смета за своја.

За време на патролата, филипинскиот авион забележал кинески болнички брод, два брода на кинеската крајбрежна стража и уште 29 закотвени бродови на кинеската полиција и војска во близина на Суби. Гребенот е еден од седумте потопени рифови кои Кина во последната деценија ги претвори во силно утврдени воени бази со ракетни системи, според американски и филипински воени функционери.

Авинот продолжил да патролира и покрај предупредувањата и летал и во близина на шест други спорни вештачки острови. Крајбрежната стража соопшти дека мисијата е успешно завршена.

Украинскиот претседател Володимир Зеленски денес соопшти дека имал долг и значаен телефонски разговор со специјалниот претставник на САД, Стив Виткоф, и зетот на американскиот претседател Џаред Кушнер, посветен на прекин на војната во Украина.

Во разговорот учествувале и секретарот на Советот за национална безбедност и одбрана, Рустем Умеров, и началникот на Генералштабот на вооружените сили на Украина, Андреј Гнатов. Зеленски нагласи дека биле разгледани клучните чекори за гарантирање крај на крвопролевањето и отстранување на заканата од нова руска инвазија, како и ризикот Русија да не ги исполни своите ветувања.

„Украина е решена да продолжи со искрена соработка со Соединетите Американски Држави за вистински воспоставен мир. Се договоривме за следните чекори и формати за разговори со Америка. Благодарност до претседателот Доналд Трамп за интензивниот пристап кон преговорите“, изјави Зеленски на Телеграм.