Американскиот претседател Доналд Трамп изјави дека знае што прави кога воведува високи царини на земјите ширум светот, по што се соочил со критики и загриженост на глобално ниво поради ваквите потези.

Трамп на вечерата на Националниот републикански конгресен комитет во Вашингтон во вторникот го пофали својот план за воведување царини, посочувајќи дека лидери од многу земји го контактираат и молат за договор во врска со тарифите, пренесе телевизијата ABC News.

Трамп повторил дека Соединетите Американски Држави биле „ограбени“ од странските царини во минатото и дека сега ставил крај на тоа.

Новите царини кои САД ги воведуваат на земјите ширум светот, вклучувајќи ги и оние од 104 проценти на увозот од Кина, стапија на сила денеска.

Покрај високите такси за Пекинг, САД воведоа царини и на увозот од десетици други земји, вклучувајќи 46 проценти за Виетнам, 32 проценти за Тајван, 25 проценти за Јужна Кореја, 24 проценти за увозот од Јапонија и 20 проценти за сите земји од Европската Унија.

Во трагична несреќа во Санто Доминго, главниот град на Доминиканската Република, најмалку 98 лица загинаа, а повеќе од 150 се повредени откако покривот на ноќниот клуб Џет Сет се урна. Несреќата се случила во раните утрински часови во вторникот, додека се одржувал концерт на популарниот меренге пејач Рубио Перез.

Меѓу загинатите е и гувернерот на покраината и поранешен бејзбол играч во САД, Октавио Дотел (51). На концертот имало околу стотина присутни, а голем број спасувачи продолжуваат да ги пребаруваат урнатините во надеж дека има преживеани под останките на покривот.

Спасувачките служби се уште се надеваат дека ќе успеат да извлечат живи луѓе од урнатините.

Телохранителот на американскиот државен секретар Марк Рубио е уапсен по судир со полицајци во Брисел.

Агентот на Дипломатската служба за безбедност (ДСС) беше врзан со лисици минатиот понеделник откако се разбесни кога персоналот во хотелот Амиго одби повторно да го отвори барот по работното време, објави Вашингтон Егзаминер.

Телохранителот потоа станал физички агресивен кога персоналот, вклучувајќи го и ноќниот менаџер на хотелот, се обидел да го убеди да се врати во својата соба, изјавиле извори за Вашингтон пост.

Кога била повикана полиција, агентот на ДСС се судрил со полицајците и бил уапсен.

Агентот беше ослободен подоцна во понеделникот по интервенција на американската амбасада во Брисел.

Рубио остана во хотелот минатата недела кога ја посети Белгија на конференцијата на лидерите на НАТО, но не беше таму во моментот на инцидентот.