Унгарскиот премиер Виктор Орбан денес изјави дека ситуацијата на фронтот во Украина останала непроменета и дека верува дека повеќето европски лидери се за продолжување на војната.

Говорејќи пред новинарите по време на самитот на ЕУ во Брисел, Орбан истакна дека САД јасно ставиле до знаење дека ќе го намалат обемот на поддршка за Украина и дека во некои области ќе ја прекинат, па сега Европјаните се соочуваат со дилемата дали Украина треба да ја продолжи војната само со европска помош.

„Повеќето европски лидери се за продолжување на оваа војна. Украина мора да продолжи, и Европа не само што ќе го преземе товарот што досега го носеше, туку и финансискиот и воениот товар што Америка го носеше до сега“, изјави Орбан.

Тој на социјалната мрежа Х додаде дека „неговиот неодамнешен престој во Франција потврдил дека, иако може да има несогласувања во однос на начинот на постигнување мир, постои согласност дека одбранбените капацитети на европските нации треба да се зајакнат и дека тоа треба да го направат земјите-членки на ЕУ, а не бирократите од Брисел“.

„Некои луѓе заборавиле што се случи со Наполеон“, изјави рускиот претседател Владимир Путин, еден ден по изјавата на францускиот претседател Емануел Макрон, кој ја нарече Москва закана за Европа и зборуваше за заштита на другите европски земји со францускиот воен арсенал.

Наполеон беше запрен во своето освојување на Русија по влегувањето во Москва во 1812 година, но беше принуден да се повлече поради суровата зима, со големи загуби на животи.

„Сè уште има од оние кои сакаат да се вратат во времето на Наполеон, заборавајќи како тоа заврши“, рече Путин во телевизиско обраќање, без да го спомене директно Макрон.

Путин додаде дека Русија се залага за мир во Украина кој ќе ја обезбеди нејзината долгорочна безбедност и развој.

„Мораме да избереме мировна опција која ќе ни одговара и која ќе обезбеди траен мир за нашата земја“, им порача Путин на жените кои ги изгубија своите блиски во војната во Украина.

„Не ни треба ништо туѓо, но не го даваме ни тоа што е наше“, изјави Путин.

На прашањето од мајка на паднат војник дали Русија ќе се повлече, Путин одговори дека таква намера нема.

Додека европските лидери се собраа во Брисел во обид да покажат непоколеблива поддршка за Украина, Eлон Маск упати нова провокација кон украинскиот претседател Володимир Зеленски.

„Украина мора да одржи избори. Зеленски убедливо ќе ги изгуби“, напиша Маск на својата платформа Х.

Оваа провокација доаѓа по извештајот на Политико, кој објави дека блиски соработници на Доналд Трамп организирале тајни состаноци со политички опоненти на Зеленски, испитувајќи дали Украина може да организира брзи претседателски избори.

Сепак, анкетите покажуваат сосема различна слика од тврдењата на Маск. Најновите истражувања на јавното мислење укажуваат дека Зеленски убедливо би победил ако изборите се одржат сега.

34,2% од Украинците би гласале за сегашниот претседател, додека најблискиот противкандидат, поранешниот шеф на Генералштабот на Украинската армија и сегашен амбасадор во Велика Британија, Валери Залужни, има само 17,9% поддршка.

Поранешниот претседател и опозициски лидер со кого луѓето на Трамп се сретнале, Петро Порошенко, има само 8,2% поддршка. Поголема поддршка немаат ниту останатите опозиционери, како Јулија Тимошенко со 5,3% и поранешниот сопартиец на Зеленски, Дмитро Разумков, со 5%.