Инфо +

Тие што ќе работат во недела ќе добиваат и поголема дневница и слободен ден

На законското решение, недела да биде ден за неделен одмор како Министерство за труд и социјална политика работиме изминатите три месеци. Преку бројни средби, дебати, состаноци, разговаравме со синдикатите како претставници на работниците, коморите, организацијата на работодавачи, всушност со сите засегнати чинители во општеството, сериозно дебатиравме за сите слабости и предности на ова решение. Недела-слободен ден за работниците, да бидат заедно со своите семејства, да ги продолжат оние семејни традиции на кои што изминатиов период во трка со времето се запоставија, потенцираше министерката Шахпаска во утринската емисија на Сител ТВ, зборувајќи за измените во Законот за работни односи, со кои се предвидува недела да биде ден за неделен одмор.

Таа посочи дека ова законско решение мора да има исклучоци со цел за непречено функционирање на државата и онаму каде што техничко – технолошкиот процес мора да продолжи, снабдувањето на граѓаните со електрична енергија, водоснабдувањето, собирањето на комуналниот отпад, здравствената и социјална заштита, функционирањето на малите групни домови, медиумите, културните институции, угостителството. Ќе продолжат да функционираат сите оние дејности кои што претставуваат задоволување на елементарните потреби на секое семејство. Притоа, нагласи таа, сите што ќе работат во недела, ќе имаат надомест на плата согласно Закон и колективен договор, а дополнително овие работници ќе имаат и слободен ден за одмор.

Во однос на прашањето во врска со пакетите економска помош за ранливите категории на граѓани во време на пандемија министерката истакна дека од почеток два главните приоритети биле насочени кон зачувување на секое работно место и помошта и поддршката на ранливите категории на граѓани.

Во таа насока биле креирани мерки како субвенционирање на плати и бескаматни кредити со цел помош на компаниите, да не ги испуштаат работниците и да се зачува секое работно место. Истовремено, креирани биле и мерки за активните и пасивните баратели на работа, пензионерите со пониски пензии од 15.000 денари, примателите на државна социјална пензија, самохраните родители, примателите на социјална помош. Петтиот пакет економски мерки ги опфаќа сите оние граѓани кои имаат заостанати долгови кон јавните претпријатија, институции и општините, и предвидува бришење на каматите на долгот и можност за оддложено плаќање на 12 рати, што во време на Ковид 19, претставува уште едно олеснување и поддршка кон граѓаните со цел полесно премостување на кризниот период.

– Министерството за труд и социјална политика во декември донесе законски измени на Законот за социјална и Законот за детска заштита со кои го олеснивме пристапот на граѓаните до социјална помош, ги спуштивме критериумите за влез во системот на социјална заштита. Социјалната реформа донесена 2019 година беше ставена на тест токму во време на пандемија и се покажа како можне ефикасна во полесно пребродување на кризата. Таа беше за 300 проценти зголемена, олеснат беше пристапот до образовен додаток и се воведе државната социјална пензија. Пандемијата не научи дека системот мора да функционира, истакна министерката Шахпаска.

Таа на тема пензии и нивна исплата, им порача на пензионерите дека пензиите ќе продолжат да се исплаќаат редовно, зголемени согласно Закон, кое што беше укинато од претодната власт. Тоа значи усогласување на пензиите со растот на тошоците на живот, двапати во годината, раст на пензиите со раст на БДП повеќе од 4 отсто и третата можност за раст е со раст на минималната плата од 15 отсто и просечната 5 отсто.

– Ниту Груевски кој побегна, ниту Заев како актуелен премиер кој се бори во најголемата криза, ниту министерката за труд и социјална политика им ги дава пензиите на пензионерите, тие тоа си го одработиле и заслужиле во нивниот работен век, рече Шахпаска.

Свет

Ердоган: Мирот во Украина не е далеку

Турскиот претседател Реџеп Тајип Ердоган изрази оптимизам дека мирот во Украина е поблиску од кога било, по неговата билатерална средба со рускиот претседател Владимир Путин одржана во Туркменистан. Според Ердоган, засилените дипломатски активности предводени од Москва и Вашингтон отвораат простор за конкретен мировен процес.

Во изјава за новинарите по враќањето од посетата, Ердоган посочи дека Анкара е подготвена активно да се вклучи во напорите за постигнување мир и дека очекува разговори и со американскиот претседател Доналд Трамп за можен мировен план. Тој нагласи дека Турција позитивно гледа на дијалогот инициран од Вашингтон и смета дека актуелниот момент е поволен за дипломатско решение.

Ердоган истакна дека средбата со Путин била фокусирана на војната во Украина, тековните конфликти и потенцијалните чекори кон деескалација. Притоа, биле разгледани и конкретните придонеси што Турција може да ги даде во мировните напори, имајќи ја предвид нејзината позиција и улога како регионален и меѓународен посредник.

Турскиот претседател додаде дека позицијата на Анкара е добро позната и разбрана од сите страни вклучени во конфликтот. Според него, и Москва и останатите релевантни актери се свесни за ставот на Турција, кој се темели на поддршка на дијалогот и дипломатското решавање на кризата.

Осврнувајќи се на регионалната безбедност, Ердоган предупреди дека Црното Море не смее да стане простор на геополитичко надмудрување. Тој нагласи дека стабилноста, безбедноста и слободата на пловидба во овој регион се од заеднички интерес и за Русија и за Украина, но и за пошироката меѓународна заедница.

Свет

Берлин распоредува германски војници на источната граница на Полска

Германија ќе испрати контингент војници во Полска со цел да помогне во зајакнувањето на безбедноста на источната граница, во време на зголемена загриженост поради безбедносните закани од Русија.

Како што соопшти портпарол на германското Министерство за одбрана, ангажманот на припадниците на Бундесверот ќе биде ограничен на инженерски задачи. Тие ќе работат на изградба на утврдувања, копање ровови, поставување бодликава жица и изработка на противтенковски пречки.

Контингентот ќе брои околу 50 војници, а мисијата е планирано да започне во вториот квартал од наредната година и да трае до крајот на 2027 година.

Од Министерството нагласуваат дека за ова распоредување не е потребно одобрување од германскиот парламент, бидејќи војниците нема да бидат изложени на директен вооружен конфликт или ризик по нивниот живот и здравје. Вообичаено, секое испраќање германски сили во странство бара парламентарна согласност, освен во вакви случаи.

Полска, која важи за еден од најгласните поддржувачи на Украина во конфликтот со Русија, во мај најави дополнителни мерки за зајакнување на границите со Белорусија и руската енклава Калининград.

Балкан

Превртен чамец во реката Сава: Загинаа три лица при обид за нелегален премин во Хрватска

Три лица го загубија животот при превртување на чамец утрово на реката Сава, во близина на Славонски Брод, за време на обид за нелегален премин од Босна и Херцеговина во Хрватска. Во чамецот имало вкупно 14 странски државјани, потврди полицијата на прес-конференција.

Според официјалните информации, станува збор претежно за државјани на Кина, како и еден државјанин на Турција. Меѓу спасените е и државјанин на Босна и Херцеговина, кој веднаш бил приведен под сомнение дека бил вклучен во шверц на мигранти.

Еден маж се удавил на самото место, додека две жени им подлегнале на повредите во болница. Останатите патници се здобиле со полесни повреди и симптоми на хипотермија. Меѓу нив има шест мажи и седум жени, сите возрасни лица.

„Сите преживеани се под постојан надзор на медицинскиот персонал и полицијата. Третманот е во тек, а дополнителен предизвик претставуваат комуникациските бариери“, изјави директорот на болницата во Славонски Брод, Јосип Самарџиќ.

Полицијата соопшти дека на местото на настанот веднаш биле испратени патроли и служби за итна помош, кои успеале да извлечат 13 лица од студената вода на Сава, од кои едно без знаци на живот. Сите хипотермични лица биле пренесени и згрижени во болницата во Славонски Брод.

Во врска со трагедијата се истражува улогата на едно лице, државјанин на Босна и Херцеговина, кое моментално е хоспитализирано и се наоѓа под полициски надзор. Полицијата информира и дека продолжува потрагата по уште едно лице, откако неговиот пасош бил пронајден, а тоа лице не се наоѓа меѓу мигрантите кои биле донесени во болница.