Зголемен е бројот на пациенти заболени од сезонски вируси, пациенти со проблеми во дишењето, но и со цревни инфекции.

– Во овој дел на годината доминираат тие сезонски вируси кои се сѐ почести и тоа е речиси секоја година. Во овој дел од годината имаме зголемен број пациенти со респираторна симптоматологија и цревни инфекции кои се третираат на нашата клиника и ја добиваат потребната нега. Секако дека работиме со полн капацитет, се обидуваме да направиме максимална тријажа и тие потешки пациенти да ги задржиме на болничко лекување – вели директорот на Детската клиника д-р Реџеп Мемети.

И Институтот за јавно здравје во својот извештај за периодот од 30 декември 2024 до 5 јануари годинава посочува дека е зголемен бројот на заболени од грип. Од вкупно 331 заболени, 101 се деца на возраст од 5 до 14 години и 42 деца на возраст од 0 до 4 години.

Вчера беше регистран првиот случај на заболен пациент со метапневмовирусот во Грција, па алармот и кај нас беше подигнат, иако како што посочуваат лекарите тоа е стар вирус, присутен  во земјава од 2001 година и не треба да се очекува да биде нов Ковид-19.

Доктор Злате Мемедовиќ од Комисијата за заразни болести, вели дека нема простор за паника ниту кај нас, ниту каде било. Вирусот е стар и вообичаено циркулира во зимските месеци.

Со смирувачки тонови и директорката на Институтот за јавно здравје, Марија Андоновска, посочува дека вирусот е присутен но дека по однос на истиот не треба да се крева паника бидејќи истиот бил присутен и претходната сезона, односно дека истиот вирус не е нов туку веќе постоечки. Апелира на смиреност и без потреба од било какви паники. Вакцина за овој вирус не постои, а смртноста е исклучително ниска, многу пониска од таа на грипот. Симптомите се како кај грипот – секреција, кашлање, кивање, телесна температура, болки во зглобови. Метапневмовирусот најчесто се пренесува преку близок контакт.

Лидерот на СДСМ, Венко Филипче, ја обвини ДУИ за политички практики кои го спречуваат напредокот на Македонија и нагласи дека коруптивната стигма, која со години ја носи неговата партија, е нешто од што СДСМ јасно и недвосмислено се дистанцира.

Претседателот на СДСМ Венко Филипче ја отфрли можноста за поврзување со ДУИ и ја нагласи потребата од политики кои обединуваат, а не, како што вели, кои делат.

– СДСМ никогаш повеќе нема да дозволи да биде ставен во истата рамка или да биде подреден на било која партија, особено не на ДУИ. Коруптивната стигма, која со години ја носи оваа партија, е нешто од што јасно и недвосмислено се дистанцираме. Нивната реторика и постојаното подигање етнички тензии, како алатка за политичко делување, е неприфатлива и опасна. Таквите политики немаат место во нашето мултиетничко општество – изјави Филипче во интервју за „Независен“.

Тој ја обвини ДУИ за политички практики кои го спречуваат напредокот на Македонија.

– ДУИ продолжува со овие практики, а ВМРО-ДПМНЕ само профитира и ја подгрева ситуацијата. Иако јавно ги осудуваат и тврдат дека се во конфликт, нивната неформална соработка е повеќе од очигледна. Претходните заеднички гласања во Собранието, како и мистериозното бегство на Артан Груби, за кое добивме смешни објаснувања од МВР, само ги потврдуваат сомнежите дека имаат задкулисни договори – рече Филипче.

Претседателот на СДСМ, Филипче, истакна дека оваа соработка создава политичка нестабилност и ги нарушува меѓуетничките односи.

– Последните настани, како инцидентите на Денот на албанското знаме, се директен резултат на ваквата политика на поделби и на провокации. Ова не е патот што Македонија треба да го оди. Наместо да зборуваме за економски напредок, интеграција во ЕУ и за подобар живот за граѓаните, постојано се враќаме на теми кои создаваат тензии и конфликт – изјави Филипче.

Во однос на идната соработка со албанските партии, Филипче подвлече дека ќе се базира на заеднички вредности и на транспарентност.

– СДСМ ќе работи со партии кои ги споделуваат нашите заложби за транспарентност, реформи и градење политики кои ги обединуваат граѓаните, а не ги делат. Нема да дозволиме етничките прашања да се користат како алатка за прикривање на корупцијата или на неспособноста – заклучи Фужилипче.

Во неколку државни универзитети веќе се одземени неправилно стекнати звања. Одредени луѓе се отпуштени од работа. Вчера го затворивме шестиот институт, соопшти министерката за образование Весна Јаневска.

Појавата на нарачана изработка на магистерски и докторски трудови мора да запре, порача денеска министерката за образование, Весна Јаневска. Таа нагласи дека Министерството веќе работи на воведување стандарди и мониторинг во високото образование и истакна дека во неколку државни универзитети се одземени неправилно стекнати звања и дека одредени лица се отпуштени од работа.

– Таа појава мора да запре. Како Министерство веќе сериозно работиме на тоа да воведеме стандарди, но и мониторинг на случувањата во високото образование. Веќе е јавна тајна во Македонија дека се случуваат вакви неправилности. Она што го правиме секојдневно според можностите кои ни ги дава законот и според човечките капацитети кои ни се на располагање, е да сме присутни во сите високообразовни институции и научни институции. Во неколку државни универзитети веќе се одземени неправилно стекнати звања. Одредени луѓе се отпуштени од работа. Вчера го затворивме шестиот институт. Сериозно разговараме со универзитетите, кои повторувам, имаат своја автономија која максимално ја почитуваме и ќе ја почитуваме, да направат сериозни промени и во студиските програми, но и во начинот на кој ги избираат кадрите кои треба понатаму да ги образуваат младите – рече министерката на денешната прес-конференција во МОН.

Таа додаде дека Министерството, во соработка со универзитетите, работи на нов Закон за високо образование и на нов Закон за научни истражувања, кои, според неа, се очекува да придонесат за подобрување на квалитетот на високото образование.

– Новиот Закон за високо образование на мое големо задоволство е веќе при крај, а го работи работна група која е формирана во новото национално координативно тело за реформи во високото образование. Исто така, и Законот за научни истражувања како и националната рамка за квалификација на полиња, подрачја и области, кои треба да се донесат како пакет заедно. Кога ќе бидат готови, уште еднаш комисија од МОН ќе ги помине сите три документи, ќе направиме повеќе јавни расправи во универзитетите. Доколку има потреба овојпат ќе имаме јавна расправа и во Собрание и потоа ќе го предадеме во владина и во собраниска постапка – дополни таа.