Руската војска се обиде да го врати градот Суџа, кој е под контрола на Украина, во западниот руски регион Курск, испраќајќи војници преку гасовод, соопштија украински воени власти.

Генералштабот на украинската армија доцна синоќа соопшти дека руските сили биле „навреме откриени“ од тим за воздушно извидување и одбиени со проектили, артилерија и со дронови, пренесе ДПА.

Информациите не можат да се потврдат од независни извори. На руските воени блогови претходно беше јавено за обид за напад врз Суџа.

Гасоводот што се користел, наводно, бил дел од системот што ја снабдувал Европа со руски гас до почетокот на годинава. Цевките се со дијаметар од 1,4 метри.

Прорускиот воен блогер роден во Украина, Јуриј Подољак, изјавил дека руските специјални сили поминале околу 15 километри долж главниот гасовод и дека некои од нив поминале неколку дена во цевката пред да ги изненадат украинските сили во близина на Суџа. Во Суџа се наоѓаат главните мерења на гасоводот што пренесувал руски природен гас во украинскиот гасен транспортен систем за понатамошен транспорт во Европа.

Прорускиот воен блогер Two Majors изјавил дека се води голема битка за Суџа и дека руските сили ги изненадиле украинските војници влегувајќи во градот преку главниот гасовод. Руски Телеграм канали прикажале специјалци во гасни маски и со светла, со нешто што изгледало како голема цевка, објави хрватски Вечерњи.

„Борбите продолжиле цела ноќ во Суџа. Борбите не престанале“, рекол Подољак.

Друг воен блогер, Јуриј Котенок, изјавил дека украинските сили ја префрлуваат опремата од Суџа кон границата.

„Во овој момент нашите единици напаѓаат североисточниот дел на Суџа и се борат во областа на улицата Ломоносов и во индустриската зона на Суџа“, изјавил Котенок.

Украинскиот упад во Курск минатото лето бил најсериозниот напад на руска територија од нацистичката инвазија на Советскиот Сојуз 1941 година. Во последните недели и месеци руските сили ги истиснаа украинските сили од Курск, ставајќи десетици илјади украински војници во опасност од опколување.

Русија лансирала 119 дронови во напад врз Украина

Руските сили продолжуваат да окупираат приближно една петтина од територијата на Украина.

Најмалку 6 лица загинале во руски напади врз Украина во последните 24 часа, соопштија регионалните власти.

Русија во текот на ноќта лансирала 119 дронови врз Украина, а украинската противвоздушна одбрана соборила 73.

Гувернерот на регионот Доњецк, Вадим Филашкин, соопшти дека 2 лица загинале во градовите Покровск и Сиверск, додека, пак, 23 лица се повредени.

Во регионот Харков, 14-годишно дете загинало во руско гранатирање на селото Кившаривке, потврди регионалниот гувернер.

Според гувернерот на Херсонската област, Олександр Прокудин, во напади во областа Херсон загинале 3 лица, а девет се ранети.

Украина се соочува со сериозни предизвици поради прекинот на разузнавачката соработка со САД

Украина 3 години се брани од руска инвазија. Минатото лето, украинските сили зазедоа делови од регионот Курск во ненадеен контранапад. Меѓутоа, во последниве месеци, тешките борби ги потиснаа назад.

Украинските трупи во регионот, наводно, се соочуваат со дополнителни тешкотии, веројатно поради прекинот на размената на разузнавачки информации од страна на САД, вклучително и сателитски снимки.

Претседателот на Украина, Володимир Зеленски, ја нарече офанзивата на Курск важен адут во потенцијалните преговори со Москва.

Во своите коментари за Украина и Русија синоќа, американскиот претседател Доналд Трамп изјави дека му е потешко да се справува со Украинците отколку со Русите, коментирајќи ја тековната ситуација во војната. Тој истакна дека „Путин прави тоа што секој би го направил“.

На прашањето дали Путин ја користи ситуацијата по повлекувањето на американската помош, Трамп одговори:

„Мислам дека тој прави тоа што секој би го направил. Мислам дека сега ги напаѓа посилно. Тој сака ова да заврши. Мислам дека и Украина сака војната да заврши, но не знам.“

Трамп го повтори својот став дека е подготвен целосно да ја прекине помошта за Украина.

„Треба да знам дека тие сакаат договор. Не знам дали сакаат. Ако не, се повлекуваме – затоа што сакаме ова да се реши“, додаде тој.

Тој, исто така, неколкупати нагласи дека војната немаше да започне ако тој бил претседател.

Турските власти привеле 112 лица во Истанбул за време на демонстрациите по повод Меѓународниот ден на жената, но сите, освен еден, биле ослободени од притвор, соопштија денеска организаторите. Демонстрациите, кои се одржале вчера, веќе со години се забранети во Истанбул. Оваа година, властите образложија дека тие може да го нарушат „јавниот ред и општествениот мир“, пренесува ДПА.

Стотици луѓе се собраа на мирен протест во центарот на градот, пркосејќи на забраната и извикувајќи слогани како „Да живее нашата феминистичка борба“. Според платформата „Ќе ги запреме фемицидите“, во Турција до сега годинава мажи убиле 59 жени.

Демонстрации беа одржани не само во Истанбул, туку и во други турски градови, против насилството врз жените и ЛГБТК+ заедницата. Турската влада јавно се спротивставува на ставовите на ЛГБТК+ заедницата, прогласувајќи 2025 година за „Година на семејството“, што многумина го протолкуваа како отворено противење на нетрадиционалните семејни структури.

Потпретседателот на турското тело за надзор на медиумите РТУК најави програма за „борба“ против сексуалните малцинства во медиумите, истакнувајќи дека РТУК ќе ги следи и казнува радио, телевизиски, онлајн и печатени медиуми.