Инфо +

Левица и СДСМ со заеднички предлог за локалните избори

СДСМ ќе поддржи една изборна единица за следните парламентарни избори

Премиерот Зоран Заев денеска изјави дека СДСМ ќе даде поддршка на предлогот на помалите политички партии за избор на пратеници во една изборна единица, што, како што нагласи е и нивно изборно ветување, бидејќи тоа, според него, значи унапредување на демократијата и давање шанса на помалите партии за рамноправност.

– Ние сме за една изборна единица. Уште еднаш напоменувам тоа е унапредување на демократијата и давање шанса на помалите партии, особено, посебно што во државата покрај помали политички партии, имаме и политички партии со етнички признак. Така што тоа дава поголема шанса за поголема застапеност во самиот Парламент, рече Заев.

Со ова, нагласи тој, губат СДСМ, ВМРО-ДПМНЕ, а во мал дел и ДУИ, како поголеми партии, веројатно и Алијансата за Албанците, но добива државата и демократијата.

– Но, исто така, даваме и поддршка на консензуално носење Изборен законик, затоа што не сакаме да бидеме први што ќе прекршат правило и по пат на надгласување да се наметне врз опозиција или врз која било партија и да се надгласа за Изборниот законик. Традиција во нашата земја е дека секогаш се прават напори заради рамноправно учество на сите во изборен процес, Изборниот законик да се носи по пат на консензус, рече премиерот Заев, одговарајќи на новинарско прашање по посета на реконструирана градинка во Карпош.

Тој додаде дека има некакви сигнали дека и опозициската ВМРО-ДПМНЕ би разговарала за ова прашање.

– Испраќам порака да се седне и да се разговара. Навистина со ова добива демократијата. Да го прифатиме тоа што помалите политички партии доминатно го бараат. Ние го прифативме и заради нив, но го прифативме и заради демократското унапредување на изборниот процес. Ред е да седнат ВМРО-ДПМНЕ да се изјаснат со свој став и ако направат подобри проценки, калкулации, верувам дека можат да изградат и позитивен став. Секако тоа останува на нив. И ДУИ се крши, не знаат дали да прифати, дали не, но дефинитивно верувам дека на крајот сите имае должност за демократијата да направиме еден исчекор повеќе и сега тоа го носиме за изборите 2024, рече премиерот Заев.

Дотогаш, нагласи тој, има време сите да се подготват и соодветно да се постават.

Заев истакна оти би сакал претстојните локални избори наесен да се спроведат со отворени листи, затоа што, како што рече, граѓаните покрај тоа што ќе гласаат за своја определба на политичката понуда, ќе гласаат и за личност.

– Со тоа директно се созадава обврска советниците да им должат на граѓаните, да бидат отчетни кон нив и тоа исто така е унапредување на процесот на демократијата. Но, тоа се само ставови на СДСМ, рече Заев.

Пратеници од Деморатскиот сојуз, Левица, ВМРО-НП и ЛДП, поддржани од СДСМ, до Собранието денеска поднесоа Предлог закон за измени и дополнувања на Изборниот законик, со кој се предвидува земјава да биде една изборна единица на следните парламентарни избори, наместо шесте изборни единици во коишто досега се бираа пратеници.

Свет

Чешкиот премиер повикува на проширување на Шенген зоната за Западен Балкан

Новиот чешки премиер,Андреј Бабиш, изјави дека ЕУ треба итно да ја прошири Шенген зоната кон земјите од Западен Балкан, истакнувајќи дека тоа е неопходно за заштита на Европа од шверцери кои злоупотребуваат мигранти. „Не разбирам зошто ЕУ одамна не одлучи да ја прошири Шенген зоната за земјите од Западен Балкан, за да можеме да ја браниме нашата Европа“, рече Бабиш.

Тој објави дека на агендата на првата работна седница на новата чешка влада ќе бидат вклучени итни европски прашања, меѓу кои и отфрлање на новите дозволи за емисии од ЕТС2, новиот зелен данок, како и пактот за миграција. Бабиш истакна дека Чешка ќе учествува на самитот на земјите што ги отфрлаат новите европски решенија за миграцијата, организиран од Данска, а во среда ќе се сретне со лидерите на земјите од Западен Балкан.

Во однос на Украина, Бабиш најави дека Чешка ќе продолжи со хуманитарна помош, но не се изјасни за користењето на замрзнатите руски средства за поддршка на Украина. Премиерот апелираше за прекин на огнот и за мировни решенија, нагласувајќи дека илјадници војници продолжуваат да умираат секоја недела. „Секоја војна е лоша и треба да се потсетиме на Втората светска војна, која однесе огромен број жртви. Европа треба да почне да зборува за мир, а не за војна“, додаде Бабиш.

Балкан

Хрватскиот парламент изгласа центар за нуклеарен отпад во чувствително подрачје

Хрватскиот Сабор денеска го усвои Законот за изградба на Центар за отстранување на радиоактивен отпад на подрачјето Трговска Гора, на самата граница со Босна и Херцеговина. За законот гласаа 77 пратеници, 21 беше против, додека 36 пратеници останаа воздржани.

Со оваа одлука, Хрватска формално го отвори патот за реализација на проект што со години предизвикува остри реакции и загриженост во Босна и Херцеговина. Властите и експертите од БиХ континуирано предупредуваат дека локацијата претставува сериозна закана за здравјето на стотици илјади жители, како и за водата, почвата и животната средина во поширокиот регион.

И покрај апелите од Сараево и предупредувањата за висок ризик од контаминација, хрватските власти решија радиоактивниот отпад да се складира на подрачјето на општина Двор, во непосредна близина на границата со БиХ. Прашањето за Трговска Гора како потенцијална локација за нуклеарен отпад е присутно уште од 1990-тите години, но институциите на БиХ поинтензивно се вклучија во овој проблем во последните пет години.

Според плановите на Хрватска, центарот за складирање на нуклеарен отпад треба да биде ставен во функција до 2028 година. Локацијата се наоѓа на само неколку стотини метри од куќи, училишта, земјоделски површини и извори на вода за пиење, од кои зависат повеќе од 250.000 жители во сливот на реката Уна.

Експертите предупредуваат дека покрај директните здравствени ризици, постои сериозна опасност и за заштитеното подрачје на реката Уна, кое може трајно да биде загрозено. Дополнителна загриженост предизвикува фактот што Хрватска сè уште нема завршено целосна студија за влијанието врз животната средина, а Босна и Херцеговина не е вклучена во процесот на истражување.

И покрај тоа, работите на терен веќе се во тек. Од јуни годинава, на локацијата на поранешниот воен складишен комплекс Черкезовац се изведуваат активности за уривање на постојните објекти, подготовка на теренот и обработка на градежен и земјен материјал.

Европа

Аеродромот во Стразбур под блокада поради сомнителен куфер – во авионот патувале и европратеници

На аеродромот во Стразбур се одвиваше вистинска драма денес, кога патниците на авионот на авиокомпанијата ТАРОМ, меѓу кои и неколкумина членови на Европскиот парламент, беа принудени да останат затворени во леталото цели 40 минути поради сомнителен куфер пронајден во близина на пистата.

Авионот, кој полета во 9 часот наутро од Букурешт, слета помеѓу 10 и 11 часот по локално време. Веднаш по пристигнувањето, на патниците им беше соопштено дека нема да им биде дозволено да се симнат од строги безбедносни причини.

Напнатоста кулминираше кога еден дел од аеродромскиот терминал беше целосно блокиран откако службите открија неидентификуван куфер. Следеше брза реакција на безбедносните власти, кои спроведоа детален преглед на сомнителниот багаж во текот на критичните десетици минути, како што јави Диги 24.

По 40-минутното мачно чекање и безбедносното испитување, олеснувањето конечно пристигна: се покажа дека станува збор за безопасен заборавен багаж. Аеродромот веднаш беше отворен, а заложниците од авионот, вклучувајќи ги и високите функционери на ЕУ, можеа да излезат од авионот.

Инцидентот уште еднаш ја нагласи крајната сериозност со која аеродромските власти пристапуваат кон секоја безбедносна закана, дури и кога зад неа стои обична негрижа.