Францускиот претседател Емануел Макрон го повика Кремљ да го прифати предложениот 30-дневен прекин на огнот, инициран од страна на САД и Украина. Макрон за оваа тема разговарал со британскиот премиер Кир Стармер и украинскиот претседател Володимир Зеленски.

Зеленски во своето вечерно обраќање истакнал дека со Макрон се фокусирале на дипломатските напори и техничките детали за евентуалниот прекин на огнот. Украинскиот министер за надворешни работи, Андриј Сибиха, најавил дека Украина веќе формира тим за развој на механизми за мониторинг во случај на прекин на огнот.

Украинскиот претседател Володимир Зеленски изрази сочувство до семејствата и најблиските на жртвите, претседателката Гордана Сиљановска Давкова и македонскиот народ, за трагедијата во Кочани.

– Трагична вест за смртоносен пожар во Кочани… Украина тагува со нашите македонски пријатели на овој тажен ден – напиша Зеленски на социјалната мрежа Х.

Тој на повредените им посака брзо закрепнување.

Американскиот претседател Доналд Трамп изјави оваа недела дека САД би можеле да „извршат разорни потези“ на руската економија за да ја натераат Русија да постигне мировен договор со Украина.

Меѓутоа, постои граница за тоа што Трамп може да направи против Русија, велат аналитичарите за Newsweek.

Тие истакнуваат дека Путин веќе три години води војна против Украина, и покрај тешките економски санкции од Западот. И вчера јасно стави до знаење дека е подготвен за примирје само ако тоа вклучува услови кои Киев многу тешко би можел да ги прифати.

Експертите веруваат дека најдобрата опција за Трамп да изврши притисок врз Москва е нешто што можеби најмалку е подготвен да го направи, а тоа е многу посилен притисок на извозот на руска нафта и гас, кои се главни извори на приходи за Русија и помагаат во финансирање на војната во Украина.

„Ако сакате побрзо решение за конфликтот во Украина, тоа е она што треба да го нападнете, континуираната продажба на руски енергенти“, изјави Емили Килкрис, виш соработник во Центарот за нова американска безбедност, додавајќи дека тоа е единственото што останало.

Но, таа верува дека администрацијата на Трамп можеби ќе се двоуми да преземе таков комплетен пристап за енергетски санкции против Русија, бидејќи тоа би предизвикало дополнителни економски потреси во САД, кои веќе се засилени поради трговската политика на Трамп.

Аналитичарите сметаат дека новото зголемување на цените на горивата предизвикано од построги енергетски санкции против Русија може да се одрази на американските гласачи поради Трамповото ветување да ги намали тие цени.

Марко Финли, експерт за енергија на Институтот Бејкер при Универзитетот Рајс, предвидува дека САД ќе бидат многу внимателни во врска со санкциите кои би можеле да го исфрлат руското нафтено производство од пазарот.

Западот во 2022 година го постави рускиот енергетски сектор како цел на поширок пакет економски санкции, координирани од САД, Европската унија и земјите-членки на Г7. Мерките вклучуваа забрана за извоз на руска сурова нафта преку море и ограничување на цената на руската нафта до 60 долари по барел.

Санкциите имаа за цел да го ограничат профитот на Москва, без да го прекинат целосно снабдувањето на земјите зависни од Русија. Но, и тогаш, Русија најде начин да ги заобиколи санкциите и продолжи да извезува нафта преку морски патишта.

Русија продолжи да извозува природен гас во делови од Европа и го зголеми снабдувањето со Кина, Индија и други земји кои не воведоа санкции.

Според извештајот на Ројтерс, руските приходи од нафта и гас се зголемиле за 26 отсто на 108 милијарди долари минатата година, а ЕУ во 2024 година потрошила повеќе на руска нафта и гас отколку што издвоила за финансиска помош за Украина.

Сега постојат неколку чекори што САД и нивните сојузници би можеле да ги преземат: намалување на горната граница на цените на руската нафта, сузбивање на извозот преку море и воведување вторични санкции за компании и трговски партнери, како што е Кина, кои продолжуваат да купуваат руски енергенси.

Експертите за енергија сметаат дека засилените санкции врз рускиот енергетски сектор ќе го разгневат Кремљ, а тоа ќе бара координација со сојузниците, што би било комплицирано, пишува Newsweek.