Киев го одби Трамповиот предлог, се подготвува за војна без САД

Откако официјален Киев го отфрли најновиот предлог од американскиот претседател Доналд Трамп за прекин на конфликтот, Украина сè посериозно се подготвува за најцрното сценарио – продолжување на војната без американска поддршка. Ова го објави германскиот весник Билд, повикувајќи се на извор во украинската влада.

„Се подготвуваме за најлошото сценарио, а тоа е целосен прекин на американската поддршка“, изјавил добро информиран извор блиски до властите во Киев.

Според истиот извор, постои големо разочарување од мировниот план што го понуди Трамп, кој, според Украинците, остава премногу простор за компромис на сметка на нивниот суверенитет.

„Се надеваме дека ова е само дел од неговата преговарачка тактика. Но реалноста е дека Трамп не врши притисок врз Путин, ниту пак зборува за санкции. Тоа е проблематично“, се наведува во изјавата.

Украинска дипломатија, пак, уште поостро реагира. Еден неименуван дипломат истакна дека условите кои ги наметнува Вашингтон се целосно неприфатливи.

„Она што е напишано, како и тоа што ни се кажува зад затворени врати – не доаѓа предвид. Дури и да сакаше Владата да прифати нешто – што не сака – народот никогаш не би го поддржал тоа. Нема предавање“, изјави дипломатот за Билд.

Истовремено, Фајненшл Тајмс во својот текст од 24 април предупредува дека европските сојузници на САД стравуваат од распад на единството околу Украина. Разликите во ставовите околу Трамповиот мировен план би можеле сериозно да ги разнишаат билатералните односи меѓу Европа и Вашингтон.

Американскиот претседател, пак, тврдеше дека му е важно и двете страни – и Русија и Украина – да седнат на маса и да преговараат. Според него, постои конкретен рок до кој очекува „деескалација“ и можен мир, иако не објави детали за какви отстапки би можел да инсистира.

Кремљ, од друга страна, позитивно реагираше. Портпаролот Дмитриј Песков изјави дека Русија ги цени медијаторските напори на Трамп и неговата администрација, оценувајќи ги како конструктивни во процесот на преговори.

Хутите од Јемен соборија седум американски дронови „MQ-9 Reaper“ – загуба од над 200 милиони долари за Пентагон

Во период пократок од шест недели, Хутите од Јемен успеаја да соборат седум американски борбено-извидувачки дронови од типот MQ-9A „Reaper“, предизвикувајќи сериозна материјална и стратешка загуба за САД. Според проценките, вредноста на уништените летала надминува 200 милиони долари, што претставува еден од најголемите поединечни удари врз американските воздушни капацитети на Блискиот Исток.

Американски официјални лица, кои инсистираа на анонимност поради чувствителноста на информациите, потврдија за агенцијата AP дека три дрона биле соборени минатата недела, додека биле ангажирани во извидувачки или борбени мисии. Дел од дроновите паднале во вода, а дел на копно.

Според изјавите од Пентагон, дроновите биле соборени на 31 март, а потоа и на 3, 9, 13, 18, 19 и 22 април.

Што претставува MQ-9 „Reaper“ – „дрон вреден повеќе од злато“

MQ-9A „Reaper“ е еден од најнапредните борбени дронови на американската армија, развиен од компанијата General Atomics Aeronautical Systems Inc. Првиот лет го остварил во 2001 година, а цената на едно летало денес изнесува околу 30–33 милиони долари.

Изграден врз основа на искуствата со легендарниот „Predator“, моделот „Reaper“ – нарекуван и „Predator B“ – претставува значителен технолошки чекор напред кога станува збор за перформанси, издржливост и флексибилност.

Дронот има автономија на лет до 27 часа, максимална брзина од 445 км/ч и може да достигне висина од дури 15.240 метри. Со распон на крилја од 20 метри и должина од 11 метри, „Reaper“ носи до 1.746 килограми, вклучително и 1.361 килограм надворешно вооружување и опрема – што е петпати повеќе од неговиот претходник.

Леталото користи мотор Honeywell TPE331-10 со дигитално контролирање (DEEC систем), што обезбедува подобра ефикасност и оптимални перформанси, особено на пониски височини.

Клучна карактеристика на овој модел е неговата доверливост: тројно дуплирани системи за управување со лет и робусна архитектура, со што дронот достигнува или дури и ја надминува безбедноста на класичните борбени авиони.

„Reaper“ може да се опреми со широк спектар на сензори и вооружување – вклучувајќи EO/IR камери, радари, електронски системи за поддршка, ласерски обележувачи и повеќенаменски системи според мисијата.

Овој дрон активно го користат Американското воено воздухопловство, Министерството за внатрешна безбедност на САД, НАСА, како и воздухопловните сили на Велика Британија, Италија, Франција и Шпанија.

Градоначалникот на Киев, Виталиј Кличко, изјави дека Украина можеби ќе мора да се откаже од дел од својата територија како дел од можен мировен договор со Русија, поради зголемениот притисок од страна на поранешниот американски претседател Доналд Трамп, кој бара компромис за постигнување мир.

„Едно од сценаријата е да се откажеме од територијата. Тоа не е фер. Но, за мир, привремен мир, можеби тоа може да биде решение, привремено“, рече Кличко во интервју за Би-Би-Си.

Иако ја спомена таа можност, тој беше јасен дека украинскиот народ „никогаш нема да ја прифати руската окупација“, без разлика на околностите.

Оваа изјава доаѓа само неколку часа по еден од најсмртоносните руски напади врз Киев во последните месеци – напад со ракети и дронови во кој загинаа 12 луѓе, а над 80 беа повредени.

Со ова, Кличко стана еден од ретките високи украински функционери што отворено признава дека можеби ќе треба да се размислува за територијални отстапки – барем како привремено решение за да се стави крај на војната.