Рафиња искрено пред финалето: „200 милиони? Секој би размислил!“

Во пресрет на големото финале во Копа дел Реј против Реал Мадрид, капитенот на Барселона, Рафиња, без влакна на јазикот зборуваше за вртоглавата понуда од Саудиска Арабија. Бразилецот ја отвори душата за TNT Sports Brasil, признавајќи дека ретко кој би останал рамнодушен на бројката од 200 милиони евра.

„Вчера ме информираа за таа понуда. Искрено, бев шокиран – сумите се луди. Ако ми беше дадена ваква шанса минатото лето, кога бев ментално истрошен и изгубен, сигурно ќе ја прифатев. Тоа се пари што го менуваат животот – не само мојот, туку и на моето семејство,“ изјави Рафиња.

Тој искрено додаде:

„Секој што ќе каже дека не би размислил – лаже. Ваква понуда не се игнорира. Невозможно е да не застанеш и да се запрашаш што понатаму.“

Но, и покрај искушението, Рафиња денес размислува поинаку:

„Сега не се водам по парите. Тие се во втор план. Фокусот ми е на моите соништа – на Барселона, на фудбалот и на трофеите.“

Формата на Бразилецот оваа сезона е извонредна, а многумина веќе го гледаат меѓу најсериозните кандидати за Златната топка. Вечерашниот натпревар против Реал Мадрид може да биде уште еден чекор кон тој сон.

Паралелно со завршниците во сениорските натпреварувања, викендов започнуваат и одлучувачките мечеви во младинските категории. Денеска Битола е домаќин на Фајнал Фор турнирот за кадетки, додека момците ќе бидат активни на неколку локации низ Македонија.

Во младинската конкуренција сите четири четвртфинални натпревари ќе се одиграат во Скопје, а улогата на домаќини ја имаат третопласираните и четвртопласираните екипи од групната фаза.

Распоредот е следниот:

26 април, 14:00 ч.: Скопје – Мулти Есенс 27 април, 13:00 ч.: Бутел Скопје – Еурофарм Пелистер 2 28 април, 20:00 ч.: Пролет – Еурофарм Пелистер 30 април, 19:00 ч.: Вардар – Алкалоид

Кај кадетите веќе беше одигран првиот четвртфинален натпревар во кој Пролет убедливо го совлада Куманово со 32-20, и со тоа е на чекор до пласман на завршниот турнир. Денеска и утре ќе се одиграат останатите три дуели:

26 април, 13:00 ч.: Борец ФЛ – Струга 26 април, 19:30 ч.: Охрид – Еурофарм Пелистер 27 април, 19:00 ч.: Македонија ЃП – Мулти Есенс

Најголема неизвесност се очекува во Охрид, каде што домашната екипа ќе се обиде да му парира на силниот тим на Еурофарм Пелистер. Струга е фаворит во Велес против Борец ФЛ, а Македонија ЃП ќе се обиде да ја искористи предноста на домашен терен против Мулти Есенс.

Младинскиот ракомет во Македонија викендов нуди вистинска ракометна треска, со натпревари што носат директни визи за завршните турнири.

Управниот одбор на ФФМ донесе одлука ОФС ОХРИД поради грубо кршење на одредбите од Статутот и актите на ФФМ да добие суспензија.

УО на ФФМ по темелна постапка и по претходни сознанија од Одделот за интегритет, а во врска со нарушување на интегритетот во целост од страна на овластени службени лица од ОФС Охрид, едногласно одлучи да го суспендира Општинскиот фудбалски сојуз Охрид (ОФС Охрид).

Главните причини за донесената одлука се:

– Изготвување и употреба на фиктивни записници од натпревари (фалсификување на записници за натпревари кои не се одиграни, а се заведени како одиграни со конкретни резултати);

– Увидот во КОМЕТ системот на ФФМ покажа дека дури и лице починато пред повеќе години е заведено како учесник во овие фиктивни записници од натпреварите;

– Судии имаат писмени изјави дека истите биле внесувани во записници без нивно знаење и согласност, односно воопшто не суделе на натпреварите, а некои од нив не се ниту судии, а се заведени на тие натпревари како да суделе;

– Комлетната „Б“ општинска лига во рамки на ОФС Охрид не постои, односно е измислена;

Со ваквите дејствија е нарушен интегритетот на натпреварувањето и довербата во работењето на сојузот. ФФМ ќе поднесе дисциплинска пријава против претседателот и секретарот на ОФС Охрид до соодветната дисциплинска комисија, со предлог за преземање дополнителни мерки, согласно Дисциплинскиот правилник и Статутот на ФФМ.

Од ФФМ истакнаа дека остануваат цврсто посветени на правилно и транспарентно функционирање на фудбалските структури и нема да толерираат никакви обиди за злоупотреба.

gol.mk