Песков: Мировен договор е можен ако Украина се повлече од регионите во состав на Русија

Портпаролот на Кремљ, Дмитриј Песков, изјави дека клучен услов за постигнување мир во Украина е повлекување на украинските трупи од териториите на Донбас и таканаречената Новорусија, кои Русија ги смета за дел од својата територија.

„Ако Украина ги повлече своите трупи од овие четири региони – тогаш, да, мирот е можен“, изјави Песков за францускиот неделник Le Point, одговарајќи на прашање дали постои реална можност за прекин на војната под такви услови.

Песков исто така нагласи дека американскиот претседател Доналд Трамп досега не поставил конкретен рок за прекин на огнот во Украина, нарекувајќи ги таквите идеи „неприфатливи“.

„Трамп никогаш не поставил рокови. А и ние сметаме дека тоа не е соодветно“, изјави Песков, додавајќи дека претседателот Владимир Путин останува отворен за идејата за прекин на огнот. Сепак, според него, мировните разговори за Украина треба да се разгледуваат одвоено од можните преговори за обновување на односите меѓу Москва и Вашингтон.

„Нема решение за конфликтот без нормализација на односите меѓу Русија и САД“, додаде Песков.

Запрашан за ставот на Путин кон Доналд Трамп, Песков одговори дека рускиот претседател има почит кон Трамп, нарекувајќи го „силна политичка и лична фигура“.

Тој откри и дека подготовките за нова средба меѓу Трамп и Путин се веќе во тек, и истакна дека се очекува таквиот состанок да биде продуктивен.

„И двајцата лидери пред сè ги штитат интересите на своите држави, но споделуваат и подготвеност најтешките прашања да ги решаваат преку дијалог“, заклучи Песков.

Припадници на Агенцијата за истраги и заштита (СИПА) на Босна и Херцеговина денеска се обиделе да го приведат претседателот на Република Српска (РС), Милорад Додик, но биле спречени од Министерството за внатрешни работи на српскиот ентитет кој е дел од БиХ, објави регионалниот сервис на Радио Слободна Европа (РСЕ).

Тимовите на СИПА, како што се наведува, се обиделе да влезат во зградата на Административниот центар на Владата на Република Српска во Источно Сараево, каде што во тек е средба на Додик со претставници на Градот Источно Сараево, но биле запрени од припадници на Министерството за внатрешни работи на ентитетот.

Како што дознава Klix.ba, членовите на СИПА се обиделе да го приведат Додик, но припадниците на Министерството за внатрешни работи на Република Српска се спротивставиле на таа акција.

Како што беше видливо на лице место, припадниците на МУП на РС излегоа со долги пушки и на тој начин ги запреа. Ова кривично дело извршено од припадници на МУП на РС треба да се оквалификува како вооружен бунт, пишуваат босанските медиуми.

Ситуацијата за РСЕ ја потврдиле од СИПА, од каде соопштиле дека членовите на државната Агенција сакале да постапат по наредба на судот на Босна и Херцеговина.

За време на настанот не била употребена сила, рекле од СИПА.

За Милорад Додик, како и за претседателот на парламентот на Република Српска, Ненад Стевандиќ и премиерот на РС, Радован Вишковиќ од средината на март е распишана централна потерница, откако не се јавија на повикот за распит во Обвинителството на БиХ.

Тие се осомничени за напад на уставниот поредок на земјата.

Претходно, судот на Босна и Херцеговина побара од Интерпол да ја ревидира одлуката за одбивање на барањето за издавање црвена потерница за претставниците на раководството на Република Српска.

Украинските вооружени сили денеска соопштија дека извршиле напад врз руски објект за производство на беспилотни летала во градот Јелабуга, над 1.000 километри оддалечен од границата со Украина.

„Познато е дека е оштетена производствената линија за финално склопување на беспилотни летала“, стои во соопштението на украинската армија објавено на Телеграм.

Фабриката, според украинските податоци, има капацитет за производство на 300 дрона дневно.