Познатата руска новинарка Ана Прокофјева (35) загинала на фронтот со Украина, само неколку часа откако на социјалните мрежи ја исмејувала таа земја.

Таа починала во Белгородската област, каде што украинските сили во моментов извршуваат продор.

Нејзината смрт ја потврдија и други воени новинари кои го поддржуваат Кремљ, а подоцна и нејзината телевизиска куќа.

Денот пред тоа, таа објавила дека се наоѓа “некаде на границата со земјата 404”, што асоцира на грешка која се појавува кога не може да се вчита страница на веб-страна. Веројатно со тоа сакала да укаже дека Украина повеќе не постои.

Медиумите пренесоа дека камерманот кој работел со неа е ранет и се наоѓа во болница.

„Ана Прокофјева, воен дописник на Канал 1, загина додека ја извршуваше својата професионална должност. Тоа се случи во Белгородската област на границата со Украина, каде што екипата на Канал 1 беше разнесена од непријателска мина. Камерманот Дмитриј Волков, кој беше со Ана, е повреден“, соопшти портпаролот на медиумот за кој работела.

Ана работела како воен новинар долг период, пишува Mirror.

Денот пред тоа, во Украина беа убиени уште двајца руски новинари кои работеле за медиуми блиски до претседателот Путин.

Ерменскиот парламент денеска го усвои нацрт-законот кој го започнува процесот за пристапување на Ерменија во Европската унија. Законот беше усвоен во последното читање со 64 гласа за и седум против, а текстот ја повикува владата да го започне тој процес.

Во поранешната советска република расте сѐ поголемата недоверба кон Русија, историскиот сојузник на земјата кој се уште има своја воена база во Ерменија.

Ерменија ја критикува Москва за недоволна поддршка во конфликтот со Азербејџан, кој во есента на 2023 година повторно го освоил Нагорно Карабах, регион со претежно ерменско население што сепаратистите го контролирале повеќе од три децении.

Многумина сметаат дека тоа беше клучен момент по кој Ерменија се сврте кон Западот.

Ерменија, меѓу другото, стана земја која официјално ја призна јурисдикцијата на Меѓународниот кривичен суд во Хаг, кој распиша потерница за Путин. Оваа одлука предизвика голем гнев во Русија.

Членови на највлијателната турска опозициска Републиканска народна партија (ЦХП) доставија документи кои се основа за истрага за корупција и криминални активности на градоначалникот на Истанбул, Екрем Имамоглу, кој е од нејзините редови, соопшти денеска турскиот претседател Реџеп Таип Ердоган.

Во своето обраќање тој ја обвини опозицијата за вандализам на улиците и напади врз полицијата.

„Никогаш не сме ги заборавиле и нема да ги заборавиме тие кои се обидуваат да не победат со нелегитимни средства и тие кои се толку очајни што ја туркаат државата во конфликт“, рече турскиот претседател во своето обраќање.

Тој рече и дека за секој обид за саботажа против турската економија, просперитетот и мирот во земјата ќе се одговара пред суд.

Имамоглу, главниот политички ривал на турскиот претседател Реџеп Таип Ердоган, беше уапсен минатата среда, а неговото апсење ги предизвика најголемите улични протести во Турција во повеќе од една деценија.

Судот во неделата одлучи дека Имамоглу треба да остане во притвор до почетокот на неговото судење за наводно основање и водење на криминална организација, давање поддршка на терористичка организација, корупција и примање мито, што тој го негира.