Над илјада македонски граѓани се заглавени во дијаспората поради истечени пасоши и немаат можност да извадат нови. Проблемот е најголем во Австралија и Кина, но има наши граѓани со истечени пасоши и низ цела Европска унија. На социјалните мрежи веќе има и група „Нова процедура за пасош“ во чиј состав се потпишува петиција за решавање на проблемот во најкус можен рок. Петицијата е потпишана од над 3.000 луѓе.

Министерот за надворешни работи, Бујар Османи за 24 Инфо изјави дека денеска во Собранието на РСМ ќе се иницираат законските измени за решавање на проблемот.

-Запознати сме со проблемот. Денес во Собранието ќе се иницираат законските измени со дел рокот на пасошите да се продолжи до 31. декември 2021, изјави Османи.

Но Македонците велат дека голем дел од нив немаат слободни страници во пасошот каде треба да се стави печат.

Во текстот од петицијата стои дека повеќе од 1.000 граѓани – државјани на Република Македонија, поради ситуацијата со ковид – пандемијата, не се во можност да извадат нови пасоши.

– Оставени на милост од страна на Македонската Влада,  која до ден денес не покажува ни малку интерес за решавање на овој сериозен проблем. После неколку без успешни обиди да се најде решение за овој проблем, и никаков одговор од страна на Македонските институции, решивме да ја покренеме оваа петиција со надеж дека ќе допре до Македонските власти.

Петицијата има за цел да се најде и обезбеди брзо решение, со кое би се решил овој проблем во најбрз можен рок .Поради неможноста да се извади нов пасош, многу Македонци се наоѓаат во неизвесна ситуација и немаат можност за продолжување на нивните ( работни, студент) визи, а со самото тоа и неможност да го продолжат својот живот како што планирале- стои во текстот.

Дел од граѓаните велат дека повеќе од една година се без пасош.

-Јас и мојата фамилија живееме во Холандија и веќе 9 месеци не можеме да ги обновиме патните исправи. Мојот пасош истече во Октомри 2020, а започнав да ја контактирам Амбасдата во Хаг уште во почетокот на летото. Постојано добивав одговор дека не се знае, нема информација, нема никакви гласини кога ќе дојде екипа за сликање?!! На почетокот на Март оваа година, конечно не поканија на термин за сликање, кој требаше да се изведе на 7ми април (пред два дена). На 10 мин пред влез во Хаг, каде што се наоѓа Амбасдата, добивме повик дека состанокот е откажан бидејќи системот паднал. Ни беше кажано да си се вратиме назад и да чекаме за нареден термин, кој најверојатно ќе биде по 3-4 месеци. Јас навистина не разбирам за што служи оваа Амбасада кога на крај сум приморана да најдам начин и да се вратам во Македонија и таму да ја завршам цела процедура. Ве молам пишете ми, доколку знаете надлежни институции каде би можела да го пријавам ова- вели една членка на групата.

Дел од амбасадите, пак,top се недостапни за нашите граѓани.

-Повеќе од еден месец се обидуваме да воспоставиме контакт со македонската амбасада во Берлин. Ниту одговараат на повик, ниту враќаат на емаил, па сакаме да одиме директно во амбасадата. Дали некој е запознаен дали треба дополнителни документи да се однесат и сл. Ни треба само закажување на термин за издавање на нов пасош- вели една Македонка од Германија.

Проблем имаат и наши сограѓани кои живеат и работат во Кина. Тие објаснуваат дека и да им го продолжат пасошот до крајот на годинава немаат слободни страници каде ќе може да им стават печат кога патуваат.

Валентина Ангеловска

Текст и Фото:

24инфо.мк