Првиот вицепремиер и министер за животна средина и просторно планирање, Изет Меџити, денешниот ден во Вашингтон го започна со учество на традиционалниот „Молитвен појадок“. Овој значаен настан собира политички лидери и влијателни личности од целиот свет, создавајќи простор за размислување, дијалог и градење на меѓусебни односи.

„Ова беше посебна прилика за мене, особено во напорите за продлабочување на партнерството со САД, нашиот стратешки сојузник,“ истакна Меџити.

Во рамките на својата посета на Вашингтон, тој активно работи на зајакнување на врските на Северна Македонија со демократскиот свет. Според него, вербата, вредностите и пријателството меѓу народите претставуваат мостови што ги поврзуваат државите и врз кои треба да се гради иднината на инклузивност и соработка.

Посетата на Вашингтон е дел од пошироките напори на Владата на Северна Македонија за унапредување на меѓународната соработка и продлабочување на релациите со партнерите од САД.

Градоначалникот на Општина Кисела Вода и претседател на ЗЕЛС, Орце Ѓорѓиевски, оствари средба со шефот на политичкиот и економскиот оддел во Амбасадата на САД во Македонија, Дејвид Маерс, и политичкиот асистент, Митко Бурчевски. На средбата беше потенцирано значењето на соработката со САД во насока на развојот на општините, привлекување инвестиции и реализација на проекти од заеднички интерес.

Ѓорѓиевски ја истакна Општина Кисела Вода како пример за модерна и ефикасна локална самоуправа, која преку дигитализација, транспарентност и иновативни политики работи во интерес на граѓаните. Како претседател на ЗЕЛС, тој нагласи дека неговиот фокус останува на зајакнување на локалната самоуправа и создавање поволни услови за економски раст.

Во рамките на средбата, Ѓорѓиевски му ја честиташе победата на новоизбраниот претседател на САД, Доналд Трамп, со надеж за натамошно продлабочување на билатералните односи и партнерството меѓу двете земји.

Маж од тетовско е тешко повреден откако излетал од пат со четирицикл.

Како што соопштија од полицијата вчера во 13.15 часот во СВР Тетово било пријавено дека на регионалниот пат Тетово-с.Јажинце, кај село Џепчиште, тетовско, Р.Р.Р.(57) од село Шемшево, тетовско, управувајќи четирицикл „јамаха“ со струшки регистарски ознаки, изгубил контрола и излетал надвор од коловозот.

Во несреќата со тешки телесни повреди се здобил возачот, констатирани во Клиничката болница Тетово.

Извршен бил увид од увидна екипа од СВР Тетово.