Судии, обвинители и адвокати од цела Србија денеска се собраа пред Уставниот суд и Правниот факултет во Белград за да протестираат против, како што велат, политичките притисоци врз судството.

Причината за протестот беше забраната на обвинител од Првото основно јавно обвинителство во Белград да изврши увид по инцидент во шаторската населба „Ќациленд“ пред српскиот парламент, каде престојуваат поддржувачи на власта. Дополнителен повод се најавените измени на законот за Обвинителството за организиран криминал, со кои ова обвинителство би станало дел од Вишото јавно обвинителство.

Присутните на протестот истакнаа дека ваквите законски измени би ја ограничиле автономијата и независноста на Обвинителството за организиран криминал и корупција, што, според нив, е јасен сигнал дека државата се откажува од институционалната борба против организираниот криминал.

Протестот заврши пред Правниот факултет во Белград со 16-минутен молк во чест на жртвите кои го загубија животот при падот на натстрешницата на Железничката станица во Нови Сад.

Рано утрово на Обреновачки пункт се случи сообраќајна несреќа во која автомобил БМВ се судри со камион. На социјалните мрежи се појави видео од возачот на БМВ, кој, со цигара во рака и траги од крв на облеката, на прашањето „Што направи?“ одговорил: „Не знам, ме удри камион. Многу силно.“

Според извештајот на станицата „Србија Сад“, возачот на БМВ претходно возел агресивно, менувајќи ленти и речиси предизвикувајќи други инциденти. На крајот, автомобилот удрил во камионот, а наводно возачот дури се фалел со тоа.

Полицијата соопшти дека во несреќата тешко е повреден 46-годишен маж, кој е пренесен во Ургентниот центар. Возачот на камионот (38) се здобил со повреда на раката, но одбил транспорт до болница.

Судирот предизвикал голема материјална штета – предниот дел на БМВ е згмечен, додека камионот е делумно оштетен и завршил со предниот дел деформиран од силата на ударот.

Видеото може да го погледнете тука

Францускиот претседател Емануел Макрон предупреди дека Европската Унија може да воведе царини за кинеските производи доколку Пекинг не преземе конкретни чекори за намалување на трговскиот дефицит. Според француските медиуми, по официјалната посета на Кина, Макрон го заострил тонот и најавил дека Европа нема да остане пасивна.

Како што го цитира „Ле Фигаро“, претседателот истакнал дека ЕУ мора да размислува за протекционистички мерки доколку Кина не се обврзе да го запре економското нерамнотежје, кое го смета за „критично за иднината на Европа“.

„Им порачав дека ако не реагираат, ние Европејците ќе мораме наскоро да преземеме решителни мерки, слични на тие на САД, и да воведеме царини за кинески стоки“, изјави Макрон по враќањето од Пекинг.

Тој предупреди дека европскиот индустриски модел е под закана, особено секторите што историски се потпираат на автомобилската индустрија и машинските алати. Според него, дополнителен проблем се и високите американски царини кон Кина, воведени од претседателот Доналд Трамп, кои, како што вели, ги пренасочуваат кинеските производи кон европскиот пазар.

Макрон подвлече дека намалувањето на трговскиот јаз бара и ангажман од европска страна – преку привлекување кинески инвестиции, но под јасни правила. „Кинеските компании мора да инвестираат во Европа, но без создавање зависност или доминација“, истакна тој.

Секторите во кои се бара рамноправен пристап опфаќаат производство на батерии и електрични возила, преработка на литиум, ветерна енергија, електроника, рециклирачки технологии, индустриска роботика и современи компоненти.

Францускиот претседател смета дека ЕУ мора да ја заштити својата автомобилска индустрија од притисокот на кинеските електрични возила, истовремено вложувајќи во конкурентност и иновации. „Тоа бара поедноставување и зајакнување на единствениот пазар, вложување во нови технологии, фер заштита на границите, довршување на царинската унија и прилагодување на монетарната политика“, додаде Макрон.