Гвинеја е следниот противник за нашиот национален тим на СП во ракомет што важи за аутсајдер во групата.

„Уште пред почетокот на првенството, откако ги дознавме противниците, почнавме со подготовки. Очекувано, поголем фокус имавме на Унгарија и на Холандија, искрено жалиме што не забележавме барем една победа на стартот. Многу ќе ни значеше победа на тој дуел со Унгарија, но не се сомневам дека оваа репрезентација на Македонија има многу добар квалитет и тоа ќе го покаже во иднина. Пред нас е дуелот со Гвинеја, меч на кој сакаме да победиме и да одиме во вториот круг. Одиме чекор по чекор, фокусирани сме прво на Гвинеја, а потоа и на следната рунда каде што ќе се бориме со Австрија, Катар и Франција. Верувам во нашата репрезентација, дека со играта што ја прикажуваме и со поддршката од нашите фантастички навивачи ќе стигнеме уште до некоја победа во главната фаза“, истакнува Кузмановски.

Лидерот на националниот тим изрази благодарност до навивачите за поддршката што ја даваат на националниот тим на овој светски шампионат.

Светската Ракометна Федерација ИХФ објави соопштение во врска со синоќешниот дуел меѓу Македонија и Холандија, изрекувајќи санкции поради инцидентите што се случија на трибините на овој натпревар.

Ракометната Федерација на Македонија е казнета парично со 10.000 швајцарски франци за овој инцидент на навивачите од нашата земја, со напомена дека следни вакви случки ќе значат и забрана за присуство на навивачи во арената во Вараждин.

Парична казна е изречена и до Хрватската Федерација за слабата организација на натпреварот. Покрај паричната санкција за организаторите, ИХФ донесе и одлука за забрана на дел од трибините, и тоа делот што се наоѓа веднаш зад клупите на двете селекции.

Покрај тоа, светската куќа на ракометот сугерира овој дел од трибините да остане затворен за сите натпревари до крајот од ова СП што ќе се играат во салата во Вараждин.

ИХФ преку соопштението се заканува и со целосно затворање на оваа арена доколку биде повторен инцидент сличен на оној на синоќешниот дуел меѓу Македонија и Холандија.

за курир.мк од Вараждин, Република Хрватска

Холандија по вторпат за две години ѝ зема скалп на Македонија на еден голем ракометен собир. Но, синоќа во Вараждин беше далеку понеизвесно и повозбудливо за разлика од средбата во Краков, а тензиите од теренот се пресликаа и на трибините од каде имаше огромно незадоволство поради бројните контроверзни одлуки на судиската двојка од Данска.

По средбата во Вараждин, вардарецот Ларс Кој, на домашната јавност ѝ објаснал за страста и љубовта на македонските фанови кон ракометот и репрезентацијата.

„Тоа е сосема поинаков свет и култура. Сè што прават, прават со голема страст, дури и во некои разговори ќе помислите дека се бесни едни на други, но тоа е сосема нормално за нив. Можам да кажам дека се отворени и пријателски луѓе, но во спортот, секогаш сè е прашање на живот или смрт. Ако победиш си Господ, но по секој пораз си никој и ништо. Нe им го разбирам јазикот и не знам што викаат, но можам да кажам дека се фрла со најразлични предмети кон играчите. Во Македонија атмосферата е фантастична, игравме дерби во Скопје пред 4.000 навивачи, тоа беше специјално, прекрасно искуство“, рече Кој за холандски „Телеграф“.

На средбата со Македонија кружниот напаѓач на Вардар постигна четири гола.