Околу 15 милиони турски граѓани учествуваа на симболичните внатрешни избори организирани од опозициската Републиканска народна партија (ЦХП), изразувајќи поддршка за градоначалникот на Истанбул, Екрем Имамоглу, кој беше уапсен и префрлен во затвор.

Според градската управа на Истанбул, 13,2 милиони гласови биле дадени во знак на солидарност со Имамоглу, кој денеска требаше да биде официјално номиниран како кандидат на партијата за претседателските избори во 2028 година.

Имамоглу ја поздрави оваа поддршка од затворот во Силиври, каде што е притворен заедно со неколку соработници. „Оваа влада ќе добие незаборавна шлаканица од нацијата на следните избори“, изјави тој преку своите соработници.

Неговото апсење, кое опозицијата го смета за политички мотивирано, предизвика масовни протести низ Турција. Во девет градови беа приведени неколку стотици демонстранти, а тензиите меѓу владата и опозицијата продолжуваат да растат.

Во сообраќајна несреќа што утрово се случи во центарот на Осиек, повредени се 20 лица, но за среќа никој не е во животна опасност.

Несреќата се случила околу 6:40 часот на крстосницата на Вуковарска улица и улицата Добриша Цесариќ, кога автобус од линијата Тенја – Чепин удрил во задниот дел на автобус што стоел на семафор.

„Во автобусот кој стоел на семафор имало 10 патници, а во автобусот што удрил имало 20 патници. Дваесет лица се пренесени во КБЦ Осиек, но сите се надвор од животна опасност“, изјави градоначалникот на Осиек, Иван Радиќ.

Возачите на двата автобуса не се повредени. Автобусот што удрил во другиот ќе биде подложен на технички преглед, иако според Радиќ, возилото веќе поминало технички во февруари.

Полицијата сè уште врши увид, а официјални информации за бројот и тежината на повредите се очекуваат во текот на денот.

Повеќе простор за пешаци, помалку за автомобили изгласаа парижаните викендов. Стотици улици треба да се пренаменат во пешачки зони. Малиот одѕив во гласањето остава неодговорени многу прашања.

Во Париз граѓаните гласаа за затворање на стотици градски улици за автомобили. Во граѓанскиот референдум, мнозинството беа за создавање на нови 500 улици без автомобили. Но, само четири проценти од речиси 1,4 милиони регистрирани гласачи учествуваа во гласањето.

Ова може да резултира со губење на 10.000 паркинг места во Париз во наредните години. Кои улици ќе станат зелени пешачки зони сега треба локално да се разјасни, во секој од градските квартови можат да бидат околу 25.

Париз под социјалистичката градоначалничка Ана Идалго со години се стреми кон зелена транспортна транзиција и многумина го гледаат како пример. Околу 220 од повеќе од 6.000 улици во Париз веќе се без автомобили. Особено во близина на училиштата,  автомобилите делумно не смеат да возат. Ограничувањето на брзината е 30 километри во поголеми делови од градот, а сега има зона во центарот на градот каде што е целосно забранет сообраќајот.

Тоа беше трет пат Париз да побара од своите жители да гласаат за сообраќајната политика. Во април 2023 година, градот гласаше за забрана за изнајмување е-скутери и во февруари 2024 година за  повисоки такси за паркирање за тешки автомобили. Учеството беше многу мало во двата случаи.

Градското собрание на Париз го прогласи гласањето и за избор за или  против бучавата и загадувањето. Идалго нагласи дека зазеленувањето на улиците може да се искористи и за борба против последиците од климатските промени.

Дел од жителите го критикуваат сообраќајниот пресврт во градот – на пример во Монмартр, каде една група се бори против  затворањето на патиштата за моторни возила. Тие го обвинуваат градот дека дејствува првенствено во интерес на туристите и дека ги заборава потребите на локалните жители. „На ридот во Монмартр има луѓе кои живеат овде педесет или шеесет години, стари луѓе, семејства“, објаснува еден од засегнатите.

Конзервативната опозиција ја обвинува градската власт за пропаганда, високи трошоци и комуникациска кампања. Таа предупредува дека затворањето на улиците може да ги ограничи трговците на мало, па дури и службите за итни случаи. Доколку опозицијата победи на изборите во Париз во 2026 година, претворањето на улиците во пешачки зони би можело да биде во опасност.