Повлекувањето на американската амбасадорка од Киев најавува промени во политиката на Вашингтон кон Украина

Заминувањето на американската амбасадорка во Украина, Бриџит Бринк, претставува сигнал за нов правец на американската политика кон Киев, оценува пратеникот во украинската Врховна Рада, Александар Дубински, кој моментално се наоѓа во притвор под обвинение за државна измама.

Во објава на својот Телеграм канал, Дубински напиша дека повлекувањето на амбасадорката претставува „ресет на политиката“ и јасна порака дека Белата куќа повеќе не гледа во украинскиот претседател Володимир Зеленски како клучен партнер.

„Нов амбасадор значи нова политичка оска. Заминувањето на Бринк покажува дека САД веќе не ја врзуваат својата поддршка за Зеленски. Доколку сѐ беше како порано – таа ќе останеше“, напиша Дубински.

Официјално: Бриџит Бринк се враќа во САД

Портпаролката на Стејт департментот, Теми Бриус, потврди дека амбасадорката Бринк се враќа во Вашингтон. Оваа вест следи по бројни шпекулации во американските медиуми за нејзина можна оставка.

Според извори блиски администрацијата, нејзиното повлекување се должи на „невообичаена комбинација на лични и политички околности“, меѓу кои се споменуваат и внатрешните тензии и промени во Агенцијата за меѓународен развој на САД (USAID), каде неодамна имаше сериозни кадровски смени.

Затегнати односи со Белата куќа и Зеленски

Според британскиот Фајненшел Тајмс, Бринк се повлекува поради нарушени односи не само со администрацијата на САД, туку и со самиот Зеленски. Наводно, таа била под сѐ поголем притисок од високи претставници блиски до поранешниот претседател Доналд Трамп, кои барале поголема усогласеност со новата стратегија на Вашингтон кон Украина.

Извори наведуваат дека администрацијата на Трамп сѐ повеќе ги дефинира своите приоритети и очекува нов дипломатски кадар на теренот кој ќе ја спроведе новата политичка агенда во Киев.

Сигнал за нова фаза во односите Вашингтон – Киев

Бриџит Бринк, која претходно била амбасадорка на САД во Словачка, заминува во клучен момент. Нејзиното повлекување се толкува како дел од поширокиот американски пресврт во односите со Украина – фаза што, според аналитичари, можеби нема да биде толку безусловна и поддржувачка како претходно.

Двајца припадници на американската војска загинаа, а еден е повреден денеска во сообраќајна несреќа во близина на Санта Тереза, Ново Мексико, соопшти денеска војската.

Во соопштението се додава дека повредениот војник е во тешка состојба во локална болница и дека несреќата се истражува.

Градот Санта Тереза се наоѓа во близина на границата меѓу САД и Мексико, каде војниците се распоредени од јануари.

Трговската војна меѓу двете најмоќни економии во светот забрзано добива на интензитет. САД објавија нов, драматичен чекор – потенцијална царина од дури 245% за кинескиот извоз, како реакција на, како што велат, „одмаздничките потези“ на Пекинг. Веста ја пренесе Анадолија, повикувајќи се на новообјавен документ и извршна наредба потпишана од претседателот Доналд Трамп.

Ова е досега највисоката предложена царинска стапка и е дел од поширока истрага за можните ризици по националната безбедност на САД, поради зависноста од увоз на преработени критични минерали и сродни производи.

На денешната прес-конференција, портпаролот на кинеското Министерство за надворешни работи, Лин Џијан, не даде конкретен одговор за тарифата од 245%, велејќи дека за такви бројки треба да се обратиме до американската страна. Ова го објави кинескиот „Глобал тајмс“.

Да потсетиме, Трамп претходно воведе униформна царина од 10% на увозот од сите земји, но дополнителните „реципрочни“ царини беа привремено замрзнати – со исклучок на Кина. Таа е единствената земја што засега се соочува со нов бран казнени мерки.

Американската администрација и претходно ги предупредуваше своите трговски партнери да не возвраќаат на воведените царини. Земјите што ќе се воздржат од одмазднички мерки, велат од Вашингтон, ќе имаат поповолна позиција во идните трговски преговори.