Поради снегот и појавата на голомразица, од 11 јануари до вчера, скопската Итна медицинска помош имала вкупно 254 интервенции.

Доктор Рихад Реџепи, шеф на смена во скопската Итна медицинска помош, за МИА изјави дека во овие 254 интервенции имало и сообраќајки, повредени граѓани кои паднале лизнувајќи се по мразот, лица во алкохолизирана состојба кои се здобиле со повреди, но и некои кои завршиле со повреда во тепачка.

– Евидентирани се шест интервенции поради паѓање на снегот, луѓе повредиле нога, глава … Да не се излегува без потреба, ова важи особено за децата и повозрасните. Секогаш да се почитуваат советите од АМСМ. Да се вози внимателно, да се носи зимска опрема, да не се надминува дозволената брзина со возилото, апелира доктор Реџепи.

Од обвинителството информираат дека судијката од Основниот суд Велес е обвинета за фалсификување на службената исправа како продолжено кривично дело која во текот на истрагата била и разрешена од судиската функција, додека управителката на ланецот аптеки и нејзиниот сопруг се обвинети за поттикнување при извршувањето на кривичното дело и за употреба на исправите со невистинита содржина.

„Првообвинетата, постапувајќи во предмет во кој тужители се останатите обвинети, донела пресуда со која им го усвоила тужбеното барање и им утврдила право на сопственост на деловен простор и земјиште под зграда. Иако пресудата не била правосилна и извршна, а тужените навреме изјавиле жалби, судијката поттикната со умисла од сообвинетите, ја заверила со службен печат за правосилност и извршност со што свесно внела невистинит податок во службената исправа. Ваквата службена исправа со невистинита содржина таа ја дала на рака на управителката на правното лице, наместо преку судска достава“, велат од Јавното обвинителство.

Дополнително, како судија во вонпарнична постапка, обвинетата надвор од АКМИС системот за електронско управување со предметите во судот во Велес, составила решение со кое на истите подносители им го усвоила предлогот за привремени мерки за обезбедување непарично побарување, со кое им овозможила на предметниот имот да впишат прибелешка во јавните книги со забрана за отуѓување и оптоварување. Потоа решила привремената мерка веднаш да биде извршна и примерок веднаш да биде доставен до Агенцијата за катастар на недвижности – одделение за катастар на недвижности Велес. Решението било со невистинита содржина во поглед на податоците за наводно одржаното рочиште, а документот спротивно на судскиот деловник било доставено само до предлагачот, соопштуваат од кавадаречкото обвинителство.

Според обвинението, судијката со посебно решение, ја задолжила спротивната страна да ги надомести парничните трошоци на предлагачите во износ од 1.124.308 денари, повторно веднаш давајќи и својство на правосилност и извршност на исправата, иако знаела дека се исполнети законските услови за повлекување на привремената мерка со што парничните трошоци би паднале на товар на подносителот. И ова решение не го доставила до останатите странки во постапката, туку единствено до предлагачот, со што ги оневозможила да користат правен лек – жалба.

„За да ги прикрие сите противправни дејствија во предметите, обвинетата судијка свесно ги уништила службените документи – повратници и не ги споила сите документи во списите на предметот. Обвинетите сопственици ги употребиле ваквите исправи со невистинита содржина пред Агенцијата за катастар на недвижности за да внесат промени во имотните листови во корист на обвинетото правно лице. Со лажно прикажување факти од судските постапки тие нанеле значителна имотна штета на спротивната страна, а за себе прибавиле значителна имотна корист. Парничните трошоци за постапката ги наплатиле преку извршител, иако знаеле дека барањето за извршување им е засновано на исправа со невистинита содржина“, се наведува во соопштението на Јавното обвинителство.

Германската економија е во најголемата криза во повоената историја. Инвестициите се намалуваат веќе пет години, што значи недостиг на работни места во иднина, додека економијата се поддржува исклучиво од државните трошоци кои се зголемени за околу 12 проценти. Со овие зборови д-р Мирослав Којадиновиќ, член на експертската комисија на BDSF за енергетска ефикасност, за Курир.рс ја опишува моменталната состојба во една од најсилните европски економии.

– Без оглед на тоа што изборните програми никогаш не се спроведуваат 1:1, водечките економисти претпоставуваат дека изборната програма на ниту една партија нема да може да стави крај на слабиот раст на Германија. Многу од предлозите на партиите одат во вистинската насока, но изгледаат несоодветни со оглед на среднорочните предизвици. Наместо да се борат за создавање богатство, партиите имаат тенденција да се борат за распределба на богатството. Тие се фокусираат на мали изборни ветувања, гарантирајќи им на граѓаните вообичаени зони за удобност, т.е. просперитет без напор. На пример, се ветуваат стабилни пензии и даночни олеснувања, но како тоа ќе се финансира не се прецизира.

Тој наведува дека се работи за зачувување на концепти кои не се одржливи. Според него, нема храброст да почне да прават промени. Ниту една партија не го опишува „моделот на просперитет“ на иднината и кој каков придонес ќе даде за тоа.

– Конкретно, нема убедливи одговори за двојната криза со која се соочува германската економија: почетокот на 15-годишната фаза на стареење на општеството и промената на глобалните економски услови го ставаат под притисок германскиот бизнис модел. Притискањето на глобализацијата, кое е на сила од 1990 година, привршува. Германија веќе нема корист од динамично растечкиот бруто домашен производ на нејзините партнери. Во исто време, Кина започнува извозна офанзива. Да дадеме само еден важен пример, Кина произведува речиси половина од сите продадени автомобили во светот секоја година и ги турка германските производители на автомобили од пазарот. Од друга страна, потенцијалната тарифна војна се заканува и да ја наруши глобалната трговија – вели Којадиновиќ.

Тој понатаму истакнува дека Германија може да изгуби и до половина милион работници годишно поради стареењето на нејзиното општество. Резултатот е намалување на обемот на работа:

– Без зголемување на продуктивноста, тоа значи тренд на опаѓање на растот, губење на додадена вредност и на крајот проблеми со финансирањето на социјалното осигурување. Ниту една изборна програма не содржи сеопфатен концепт за да се спротивстави на ова. Демографскиот проблем не може да се реши само со имиграција, а како што е познато, имиграцијата може да биде опасна доколку не се направи преку правилен процес. Зголемувањето на старосната граница за пензионирање врз основа на очекуваниот животен век изгледа табу. На пример, се зборува за мобилизирање повеќе жени, но недостига сигурна грижа за децата.

Според мислењето на Којадиновиќ, недостига насока за иден раст, како што се промовирање на иновативни технологии и бизнис модели ориентирани кон иднината:

– Недостигаат практични стимулации за инвестиции кои генерираат долгорочен раст. Останува нејасно како точно да се инвестира во дотраената инфраструктура и како да се намали бирократијата, што би довело до зголемена продуктивност.

Курир.рс