Во пресрет на одлуката на Уставниот суд за Законот за употреба на јазици и во ек на жестоки политички препукувања за наводно загрозување на албанскиот јазик се одбележа Денот на албанската азбука. 

Од ДУИ одржаа посебна јавна дебата за значењето на албанскиот јазик и Рамковниот договор со порака дека албанскиот јазик е црвената линија во, според нив, политичките битки за демонтирање на Охридскиот договор. 

-Посебно поради фактот што се предизвикува официјалноста на јазикот преку иницијативите поднесени пред Уставен суд од политичари и политички партии. Ние сметаме дека официјалниот албански јазик е еден од најважните елементи на Рамковниот договор. Тој е столбот на кохезијата, меѓуетничката хармонија во Република Македонија и сакаме оттука од еден мултиетнички панел, едногласно да дадеме порака дека албанскиот јазик е линијата што не смее да се пречекори, во овие политички битки за демонтирање на Рамковниот договор, изјави Османи.

Критиките кон Уставниот суд се неосновани со цел да се создаде вештачка криза таму каде што ја нема, одговори првиот вицепремиер Изет Меџити на свечената академија што ја организираше Владата. Очекува од Уставниот суд да не се впушта во политички размислувања туку да остане непристрасен арбитер. Според премиерот Мицкоски, пак, време е за сплотеност и просперите, наместо теми кои ги делат граѓаните, наметнати од поедници.

-Оваа година манифестацијата нè дочека во жестока дебата околу службената употреба на албанскиот јазик. Ова е за дефокусирање на јавниот интерес и произведување вештачка криза таму каде што нема. Оваа дебата предизвикува непотребни тензии во регионот. Сум повторил и ќе кажам повторно – ниту едно право не може да се укине. Уставниот суд за жал, денеска се претвори во змеј и сите фрлаат со стрели кон оваа институција, на која треба да се гледа со почит како гарант за правата на граѓаните, изјави Меџити.

-Денот на албанската азбука е потсетник за тоа како писменоста и образованието можат да бидат мостови меѓу луѓето. Не темите кои не разделуваат, не политичките барања на поединци кои многу години претходно се криеја позади народот кого го крадеа. Јасното фокусирање кон приоритетите, кон реалните потреби за образование, економија и напредок ни помагаат да ги надминеме разликите, да ги споделиме нашите вредности и да изградиме посилна, поединствена заедница, изјави Мицкоски.

Честитки до албанската заедница по повод празникот меѓудругите упати и претседателката Гордана Силјановска Давкова со порака дека почитувањето на јазичните разлики нѐ прави демократско мултикултурно општество. На меѓусебна соработка и градење мостови за подобра држава повика и лидерот на СДСМ Венко Филипче во неговата честитка.

Силниот снег во регионот на Горски котар, Лика и делови од континентална Хрватска, како Загорје, Меѓумурје и Славонија, предизвика големи проблеми во сообраќајот. На Јадранот, пак, силниот ветер турка дрвја и телефонски столбови, создавајќи дополнителни тешкотии.

Автопатот А6 Риека-Загреб е целосно затворен меѓу клучките Делница и Равна Гора во правец на Загреб, како и преку тунелот Рожман Брдо кон Риека, поради неповолни зимски услови. На автопатот А2 Загреб-Мацељ, делницата меѓу клучките Крапина и Тракошчан е блокирана во двата правци поради сообраќајна незгода.

Зимските служби се активни, но нивното работење предизвикува застои зад сервисните возила. Учесниците во сообраќајот се замолуваат за трпение.

Поради снежната покривка, сите патни правци од внатрешноста кон Јадранот – вклучувајќи ги Далмација, Риека и Истра – се недостапни за камиони со приколки и возила без зимска опрема. Истовремено, поморскиот сообраќај е во прекин, што ги вклучува и траектните линии меѓу островите и копното.

На автопатот А7 Рупа-Крижишќе и јадранската магистрала меѓу Бакр и Сењ, сообраќајот е забранет за автобуси, мотоцикли и возила со камп-приколки. Слични забрани важат и на државните патишта Карловац-Ждихово и Дуга Реса-Јосипдол-Капела.

„Зимските служби беа изненадени од снегот“, пишува еден читател, кој додаде: „На патот ДЦ1 преку Лика возиме по завеани патишта, слалом меѓу возила со летни гуми.“

Состојбата останува критична, а властите апелираат на внимателност и користење соодветна зимска опрема.

Oд утрово се нормализира автобускиот превоз во Скопје, откако синоќа во базните станици на ЈСП беше испорачана нафта за автобусите.

Вчера главниот град остана без јавен превоз поради недостиг на нафта. Возеа само 25 автобуси на гас.

За денеска во 13 часот пред бараките на Град Скопје е најавен протест организиран од градоначалникот на Општина Шуто Оризари Курто Дудуш, а во 14 часот ќе се приклучат и студентите од УКИМ.

Советот на Град Скопје вчера одржа вонредна седница поради состојбата со автобусите, при што кКоординаторите на советничките групи постигнаа консензус и донесоа заклучок со којшто ја поздравија одлуката на Владата за позајмување на нафта од државните резерви за потребите на Јавното сообраќајно претпријатие (ЈСП) и побараа заедно во координација со ЗЕЛС, да продолжат разговорите со Град Скопје за нормализирање на состојбите во градот.