Трамп: Во тек се „многу добри“ трговски разговори со Кина

Американскиот претседател Доналд Трамп денеска изјави дека САД водат „многу добри“ разговори со Кина, додека трговскиот конфликт меѓу двете земји, кој трае веќе подолго време, сè уште не покажува знаци на смирување.

„Инаку, во тек се одлични разговори со Кина… Навистина, оди многу добро“, рече Трамп пред новинарите во Белата куќа, пренесува агенцијата Ројтерс. Тој не изнесе повеќе детали околу содржината на разговорите.

Инаку, Белата куќа на 16 април најави дека САД размислуваат за воведување царини кон Кина во висина и до 245 отсто. Ова доаѓа како дел од продолжениот трговски спор, каде што двете страни досега во повеќе наврати си воведуваа реципрочни царини.

Зеленски: Украинскиот народ заслужува заштита – бара повеќе системи „Патриот“

Украинскиот претседател Володимир Зеленски вчера повторно упати апел до САД за итна испорака на системи за противвоздушна одбрана „Патриот“, особено поради последниот руски ракетен напад врз Харков. Според него, украинскиот народ има еднакво право на заштита како и секоја друга нација.

„Кога се обраќаме до нашите партнери, пред сѐ до САД, со барање за ‘Патриот’ системи кои можат да нѐ заштитат од руските крстосувачки и балистички ракети, ние не бараме нешто повеќе – туку правична заштита. Помошта треба да биде праведна. Ова е и христијанскиот начин – да помогнеме“, напиша Зеленски на Телеграм.

Тој остро ги осуди нападите, оценувајќи дека „не може терористот да помине неказнето кога уништува животи“. Русија, вели тој, заслужува најмалку остри санкции како одговор на нејзините постапки.

Според Зеленски, нападите врз Харков биле изведени со крстосувачки ракети од типот „Искандер“ – од кои една експлодирала директно над станбено населено место, додека друга удрила во индустриски објект во близина на стамбена зграда.

„За да се извршат такви напади врз цивилно население, на Велики Петок, пред Велигден, треба да си без грам човечност и совест“, изјави тој.

Тој додаде дека Украина веќе проширила санкции врз речиси сто физички и правни лица од Русија и Кина – дел од нив поврзани со производство на вакви ракети – и дека работи со меѓународни партнери за нивна координација.

„Секој што учествува во продолжување на оваа агресија мора да сноси одговорност. Благодарен сум на сите што ја поддржуваат таа позиција“, додаде Зеленски.

Според информациите на украинскиот Интерфакс, руските сили вчера лансирале три ракети со високоексплозивни боеви глави врз Харков. Една личност загина, а најмалку 103 се повредени – меѓу нив осум деца, од кои четири се во тешка состојба. Нападите предизвикале сериозна материјална штета – оштетени се повеќе станбени згради, како и објекти на едно цивилно претпријатие.

Најмалку 74 загинати во американски воздушни напади врз нафтено пристаниште во Јемен

Најмалку 74 лица загинаа, а повеќе од 170 беа повредени во американски воздушни напади врз пристаништето Рас Иса во Јемен, кое се наоѓа под контрола на хутските бунтовници. Според податоци од самите Хути, ова е најсмртоносниот напад на САД откако Доналд Трамп повторно стапи на функцијата претседател на САД.

Воениот ангажман на САД против хутите започна на 15 март, но засега неговиот ефект останува нејасен бидејќи Пентагон досега не сподели детали ниту за конкретните цели, ниту за бројот на жртви. Од друга страна, хутските сили строго го контролираат пристапот до погодените области и ретко објавуваат информации за причинетата штета.

„Со овие удари американските сили имаа за цел да го елиминираат изворот на гориво за хутските терористи и да ги лишат од нелегалните приходи со кои го финансираат теророт во регионот последната деценија. Целта не беше да му се нанесе штета на јеменскиот народ,“ соопштија од Централната команда на американската војска.

Видеа од местото на настанот покажуваат силни експлозии и загинати тела расфрлани околу пристаништето. Според изјавите на хутските претставници, меѓу жртвите има и цивили, како и припадници на спасувачките служби.

САД најавија дека ќе продолжат со воздушните напади врз Хутите сè додека не престанат со нападите врз трговските и воените бродови во Црвеното Море.