Речиси 600 луѓе загинале откако Израел ги обнови борбите во Газа во вторникот, според министерството за здравство, водено од Хамас.

Хамас ги испука првите ракети кон Тел Авив откако по двомесечното примирје повторно почнаа борбите во Газа и цивилите пак мораат да бегаат. Израел кажа дека една ракета била пресретната, а останатите 2 паднале во ненаселено подрачје, објави Би-Би-Си.

Речиси 600 луѓе загинале откако Израел ги обнови борбите во Газа во вторникот, според министерството за здравство, водено од Хамас.

Израелските одбранбени сили (ИДФ) синоќа кажаа дека почнале копнена операција на палестинската територија.

„Нашите војници почнаа да спроведуваат копнени активности во Рафа, како и во централниот и во северниот дел на Газа. Целта е да се растури терористичката инфраструктура“, соопшти ИДФ.

Израелската војска претходно кажа дека спроведува ограничена копнена операција за да се создаде делумна тампон зона меѓу северот и југот на Газа.

Портпаролот на израелската влада, Давид Менцер, го обвини Хамас за продолжувањето на насилствата и дека ја изнудил оваа ескалација поради одбивањето на сите договори за ослободување на заложниците. Според Израел, Хамас држи уште 59 заложници, од кои 24 се живи.

Во исто време, премиерот Бенјамин Нетанјаху го смени шефот на националната безбедносна служба Шин Бет, Ронен Бар, бидејќи не успеал да го предвиди нападот на Хамас на 7 октомври 2023 година. Тој кажа дека помеѓу нив веќе нема доверба. Ова е првпат во историјата на Израел владата да го смени шефот на Шин Бет.

Доналд Трамп потпиша извршна наредба со која започнува укинување на американското Министерство за образование.

Трамп рече дека „ова е вистинскиот чекор“ и дека одделот ќе биде затворен „што е можно побрзо“.

Министерството за образование на САД администрира федерални студентски заеми за студенти од колеџ и универзитет, обезбедува помош за студенти со ниски приходи и ги финансира училиштата за да обезбедат одредени програми за студенти со попреченост.

Во Америка, училиштата најчесто се финансираат и управуваат на ниво на сојузни држави, а тоа особено се однесува на основните и средните училишта, додека само околу 13% од финансирањето на овие училишта доаѓа од државниот буџет.

Белата куќа тврди дека елиминирањето на одделот ќе ги подобри резултатите од тестовите на студентите и ќе заштеди пари, додека демократите и другите критичари велат дека овој потег ќе ги остави најранливите студенти без помошта што им е потребна.

Наредбата на Трамп доаѓа како дел од пошироката стратегија на администрацијата во последните недели за намалување на големината на федералната влада.

Амбасадорот на Македонија во Шпанија, Едмонд Адеми објави дека во Мадрид вечерва пристигнале седумте пациенти повредени во трагичниот настан во Кочани.

Тие се сместени на лекување во две Универзитетски клиники. 

„Благодарност до шпанската влада, шпанското министерство за здравство и Регионот на Мадрид кои го превеземаа лекувањето на овие 7 млади луѓе. Амбасадата ќе биде во целосно располагање во текот на нивното лекување во Мадрид. Посакувам брзо заздравување!“, напиша Адеми.