Актуелни и поранешни членови на Комисијата за помилување се состанаа на работна средба, каде што дискутираа за досегашната примена на институтот на помилување и можностите за негово унапредување. Средбата ја иницираше претседателката Гордана Сиљановска-Давкова, која истакна дека постојниот закон има недостатоци и дека е неопходна негова ревизија.

„Се согласивме дека е потребен нов закон за помилување, кој ќе ги земе предвид искуствата од примената на актуелниот закон и компаративните примери. Очекувам експертска и широка јавна дебата по ова прашање“, изјави Сиљановска-Давкова.

Средбата, која траеше четири часа, овозможи размена на искуства и ставови меѓу учесниците. Претседателката им се заблагодари на сите за нивниот конструктивен придонес и плодната дискусија.

Наскоро започнува реконструкцијата на водоводната линија Битола – село Поешево – село Логоварди, проект од големо значење за жителите на овие населени места.

Градоначалникот на општина Битола, Тони Коњановски, заедно со тимот од одделението за економски развој, денес одржа работна средба со раководството на ЈКП „Водовод“ и стручните лица од претпријатието, каде што се разгледа динамиката за реализација на проектот.

Проектот опфаќа реконструкција на водоводната линија во должина од 6 километри, вклучувајќи замена на старите азбестно-цементни цевки со нови полиетиленски HDPE цевки и куќни приклучоци. Вкупната вредност на проектот изнесува 29.349.605 денари, обезбедени преку Министерството за транспорт и врски и Владата на Република Македонија.

Директорот на ЈКП „Водовод“, Андреј Гинов, најави дека работите на терен ќе започнат веднаш по подобрувањето на временските услови, а почетната точка ќе биде улица „Бурса“ („Индустриски пат“).

„Со овој проект, значително ќе се подобри водоснабдувањето и ќе се решат долгогодишните проблеми на жителите во оваа област,“ изјави Коњановски, најавувајќи и други значајни проекти кои ќе се реализираат во соработка со ЈКП „Водовод“ во текот на годината.

Фудбалската федерација на Македонија го спроведе годишниот семинар за доктори и физиотерапевти на тема „Ургентни состојби и траума во фудбалот“.

Настанот го проследија тимските доктори и физиотерапевти од националните репрезентации, како и клупските доктори и физиотерапевти од Прва и Втора МФЛ и од Прва ЖФЛ.

Организирана од Секторот за медицина и антидопинг и поддржана од УЕФА, медицинската работилница се одржа на 25. и 26. јануари 2025 година во хотел „Хилтон“ и истата имаше за цел да им ги презентира на тимските и клупските лекари и физиотерапевти најновите знаења и техники поврзани со ургентните медицински состојби во фудбалот.

Утринските сесии беа посветени на суштински теми и понудија теоретско знаење кое му е неопходно на секое медицинско лице за да биде добро подготвено да се справи со низа критични ситуации, вклучително и формулирање на акциони планови за итни случаи, спроведување на првични проценки на повредени играчи, решавање на инциденти со ненадеен срцев удар на теренот и практични демонстрации на процедури за итни случаи на теренот.

Предавањата од областа на трауматологијата ги држеа д-р Михајло Ивановски, д-р Александар Милески и д-р Небојша Настов, додека обуката за основно и напредно животно одржување и раната реанимација и брзата дефибрилација ја држеа д-р Азби Агуши и д-р Игор Неделковски. Брифинг за итни случаи на теренот даде и д-р Невзат Јонузи.

https://youtu.be/IqUlDEp_rFs?feature=shared