Претседателот на Владата, Христијан Мицкоски во своето гостување во „Клик плус“ на ТВ21 истакна дека за разлика од порано, со сегашната Влада има поголема дисциплина и се работи, а сите кои седат дома и земаат плата, нема повеќе да земаат плата за неработење.

Сега има поголема дисциплина и се бара работа. Сите оние политички амнестирани и привилегирани неработници од било која политичка партија кои не одат на работа, а земаат плата, нема повеќе да одат на работа и нема повеќе да земаат плата. Без разлика дали се Македонци, Албанци, Турци, Срби, Власи, Роми, Бошњаци или од било кој друг етникум, потенцираше премиерот Мицкоски.

Премиерот Мицкоски нагласи дека или ќе работат за таа плата или нема да работат и посочи дека во рамки на институциите нема дисипација на енергија, кадри или било што.

Во однос на тоа како граѓаните ја гледаат работата на владата, премиерот Мицкоски истакна дека расте задоволството од работата на оваа влада, односно дека многу е поголем процентот на задоволни граѓани споредено со минатата влада.

„Ако направиме компарација од овие шест месеци на оваа влада и пред една година претходната влада ќе видите дека дури и мнозинството Албанци сега се позадоволни, во коефициент 2 повеќе од тоа што било порано, а генерално 3,5 пати повеќе граѓаните се позадоволни од минатото.“, изјави премиерот Мицкоски.

Лошата економска ситуација во Германија и во девет други земји од Европската унија може да има негативни последици за целиот блок, предупреди во средата Европската комисија.

Макроекономските нерамнотежи во овие земји предизвикаа загриженост во таканаречениот Извештај за механизмот за тревога (Alert Mechanism Report) на Комисијата и ќе бидат подлабоко анализирани.

„ЕУ се соочува со сериозни структурни предизвици кои го загрозуваат нашиот долгорочен просперитет“, рече европскиот комесар за економија Валдис Домбровскис, предупредувајќи дека „потребна е итна акција“.

Целта на извештајот е рано откривање и решавање на ваквите проблеми. Показателите што се земаат предвид вклучуваат стапка на невработеност, нивоа на долгот, кредитните текови и цените на недвижностите.

Макроекономската нерамнотежа во една земја на ЕУ, на пример висок дефицит на тековната сметка или балонот на недвижностите, може да има прелевачки ефекти врз другите земји-членки.

Невообичаено високата инфлација во последните години, вклучувајќи ги и зголемените трошоци за работна сила и цените на недвижностите, го зема својот данок, се вели во соопштението на Комисијата.

Покрај Германија, која долго време се смета за водечка европска економија, во 2025 година низ подлабока анализа на Европската комисија ќе бидат подвргнати Грција, Кипар, Италија, Унгарија, Естонија, Романија, Словачка, Холандија и Шведска.

„Бидете уверени дека ја имате поддршката на Франција која ја споделува Вашата амбиција за спроведување на реформите за членство во ЕУ и дека сме свесни дека таа трка не може да биде бесконечна бидејќи ве очекуваме што поскоро во европското семејство“.

Ова го изјави Претседателката на Националното собрание на Француската Република, Јaел Брон Пиве, на средбата со Претседателот на Собранието, Африм Гаши, која се одржа во Париз.

„Претседателот на Собранието, Африм Гаши, заедно со пратениците Бети Стаменкоска-Трајкоска, Борче Цветков и Саранда Имери Стафаи, денеска остварија средба со Претседателката на Националното собрание на Француската Република, Јaел Брон Пиве. На средбата присуствуваа и потпретседателката на Комсијата за надворешна политика, Елеонор Каруа, потпретседателот на Комисијата за европски прашања, Лоран Мазори, и генералниот секретар на Националното собрание и на Претседателството, Дамиен Шамиси“, соопшти Собранието на РСМ.

Претседателот Гаши, се вели во соопштението, изрази особено задоволство од одржувањето средбата, со оглед на фактот што долги години наназад, отсуствува средба во ваков формат во Париз, и надеж дека истата ќе ја исцрта траекторијата на идни средби и ќе внесе силен импулс на плодна соработка меѓу нашите парламенти на сите нивоа. Беше потенцирано дека Собранието исклучително ја цени активната француска парламентарна заложба и поддршка за нашите евроинтеграции. Во тој контекст, беше посочено дека за донесувањето на уставните измени, потребни се идни гаранции за спроведување на процесот за пристапување во ЕУ и оценување на земјата исклучиво согласно Копенхагеншките критериуми и новата методологија за преговори.

Претседателката Брон Пиве ја потенцираше важноста на парламентарната дипломатија како важен сегмент во надворешната политика, вклучително и во контекст на ЕУ, како и честа да биде домаќин на делегација од Собранието на Република Северна Македонија. Беше пројавен интерес за актуелниот статус на домашната европска агенда, постапката за отворањето на преговарачките кластери и за отворените прашања на патот кон ЕУ, се наведува во соопштението на Собранието.

– Бидете уверени дека ја имате поддршката на Франција која ја споделува Вашата амбиција за спроведување на реформите за членство во ЕУ и дека сме свесни дека таа трка не може да биде бесконечна бидејќи ве очекуваме што поскоро во европското семејство – заклучи Брон Пиве.

Двајцата соговорници, се вели во соопштението, го потврдија взаемниот интерес за континуирано формирање групи за пријателство меѓу двата парламента, како и подготвеност за поблиска соработка на сите парламентарни нивоа на поле на европските прашања.

„Делегацијата, предводена од Претседателот на Собранието, Африм Гаши, во рамки на својата работна посета на Париз, денеска оствари средба и со Претседателот на Сенатот на Француската Република, Жерар Ларше. На средбата присуствуваа и претседателот на Комисијата за надворешни работи, Седрик Перен, претседателот на Комисијата за европски прашања, Жан Франсоа Рапен, претседателот на Групата за пријателство Франција – Западен Балкан, Марта де Сидрак, и заменик-претседателот на Групата за пријателство Франција- Западен Балкан, Арно Базен“, се додава во соопштението.

Претседателот Ларше, се наведува во соопштението, посакувајќи му топло добредојде на својот соговорник, потенцираше на историскиот момент бидејќи ова е првпат, од независноста, Сенатот да биде домаќин на Претседател на Собрание на Република Северна Македонија и дека нејзиното одржување е јасна порака за нашиот интерес да отпочнеме подиректна соработка на теми од взаемен интерес. Тој јасно нагласи дека Сенатот го поддржува членството на земјата во ЕУ, како и средствата од европските фондови за унапредување на тој процес. Беа поздравени сложените компромиси и реформски чекори од наша страна, како и нашата усогласеност со барањата на ЕУ и позициите на Заедничката надворешна и безбедноста политика.

„Претседателот Гаши, искажа особена благодарност за реализацијата на посетата и за придонесот на француските државници во градењето на нашата држава. Темелите на кои почива француската држава, „слобода, еднаквост и братство”, како основни цивилизациски вредности, треба да бидат подеднакво почитувани од сите и негирањето на истите не смее биде дозволено на светско ниво, но и во европски рамки. Во однос на евроинтеграциите, беше истакнато дека одогловлекувањето на процесот, за држава која прва ја потпишала Спогодбата за стабилизација и асоцијација од сите земји регионот, а и усложнувањето на пристапувањето со билатерални прашања, значително го доведува во прашање кредибилитетот на ЕУ, ги зајакнува влијанијата од трети страни и ја намалува поддршката кај граѓаните за членство во Унијата. Гаши апелираше за позасилен француски ангажман, со цел што поскоро отворање на првиот преговарачки кластер“, се додава во соопштението на Собранието на РСМ.

Соговорниците, се вели во соопштението, беа согласни дека значително отсуствува соработката на економски план и степенот на француски инвестиции во земјата, со заложби за нивно зголемување во иднина. Истовремено, на парламентарно ниво, заеднички беше ставот дека соработката треба да се продлабочува на поле на европските прашања, за кои целосно на располагање стои Сенатот на Француската Република.