На денешен ден се прославува преображението на Христос,, кога Господ Се појави во сета Негова слава пред апостолите Петар, Јаков и Јован кратко време пред неговото страдање во Ерусалим.

Важноста на овој настан за човечкиот род е одлично искажана во зборовите што апостол Петар ги кажува во некакво изумување, а кои сведочат за значењето на непосредниот однос на човекот со Бога. Тие зборови се: Господи, добро ни е овде. Во црквата смислата и значењето на празникот секогаш најдобро се искажуваат во тропарот на денот, кој за овој празник гласи: Си се преобразил на гората Христе Боже, покажувајќи им ја својата слава (божественоста) на твоите ученици, колку што можеа да примат; и нам грешните да ни заблеска твојата вечна светлина, т.е. светлината на вистинското знаење, богопознание.

Манастирскиот комплекс Св. Преображение – Крушево

На пространите јужни падини на Бушева планина, обдарени со природни убавини, се наоѓа манастирскиот комплекс Св. Преображение. Лоциран е на надморска височина од 1662 метри на ридот Голоманица, околу 8 км северозападно од градот. Манастирот вандалски е разрушен во почетокот на 19 век, а возобновувањето е започнато во 1986 година, а при подготовките на теренот се пронајдени темели од еднокорабна и една трикорабна базилика. Од таму може да се види целото Прилепско поле.

Граѓаните на Крушево сеуште го градат манастирскиот комплекс со многу љубов и восхитувачки ентузијазам, а голема улога во неговата обнова игра трагично загинатиот Тоше Проески кој донира многу средства за негово возобновување.

По заминувањето на Тоше од овој свет, овој храм е утеха за неговото семејство. Најблиските секојдневно доаѓаат да го посетат и да помогнат во работата. Иако по несреќата со секој вграден камен ја вградуваат и својата тага, тој за нив е светост и аманет што го остави синот. Денес манастирот со својот раскош му пркоси на крушевското небо.