Срцето на 22-годишната амбициозна и креативна модна дизајнерка од Неготино, Фросина Кулакова синоќа престана да чука. Фросина на 15 минути пред полноќ прописно се движела по булеварот Партизански одреди, каде во близина на пекарата Силбо била прегазена од автомомобил кој се движел со над 130 километри на час. Автомобилот, без возачка дозвола, го управувал 20 годишниот Васил Јованов од Скопје кој е добро познат на органите на прогонот. Радио Лидер открива детали од истрагата, но и детали за тоа кој е Васил Јованов и каква е улогата на скопската јавно обвинителство, кое со години го штити? Не, ова не е ужасна несреќа! Ова е убиство овозможено од обвинителството!

Помеѓу неговата генерација во Карпош од каде што потекнува, 20 – годишниот Васил Јованов алиас Васо е познат како бесно и богато момче. Од неговите родители за својот 18 – ти роденден добил автомобил Пежо 207 кој веднаш почнал да го управува иако немал положено за возачка дозвола. За возачка дозвола никогаш не положил, ама затоа уште веднаш почнал да предизвикува невољи по скопските улици, невољи кои траат во последните две години и кои кулминираа со синоќешната прерана смрт на неготинчанката Фросина Кулакова.

Во 2023 година, скоро откако го добил автомобилот кој се води на име на неговиот татко, Васил предизвикал сообраќајка која резултирала со тешки телесни повреди на учесниците, дознава Радио Лидер од извори во МВР. Бил виновен за сообраќајката, немал возачка дозвола, добил и кривична пријава од МВР за серијата на кривични дела, но пријавата била одбиена од страна на Основното јавно обвинителство Скопје. Зошто? До овој момент немаме одговор. По вчерашниот настан на Гаврил Бубевски и на скопското обвинителство ќе им биде многу тешко да одговорат како ваков престапник со години оставиле на улица.

Ослободувањето од кривичен прогон го охрабрило младиот Васо да продолжи да вози брзо и бесно. Евиденцијата покажува дека во изминатите две години тој има добиено над 10 прекршочни пријави од сообраќајната полиција за управување без возачка дозвола, брзо возење и кршење на сообраќајни правила. Сепак, никој не му го одземал автомобилот, кој по секоја пријава тој и понатаму си го управувал уште побрзо и уште побесно.

Кривична пријава за недозволена трговија со дрога – притвор – излегување на слобода

Во неколку наврати во изминатите години од полицијата Васил Јованов Васо бил апсен со помала количина на дрога, но, затоа што количината била мала тој излегувал од полиција со образложение дека е зависник кој ја користи за сопствена употреба. Работите се смениле во Март 2024 година, кога по полициската рација во неговиот дом биле пронајдени над 80 паковки со амфетамин и за тоа добил кривична пријава за недозволена трговија со дрога. Станува збор за сериозна количина, за која затворската казна е висока.

Доказите биле јасни и несоборливи, па обвинителството му одредило притвор во траење од 3 месеци кои тој ги поминал во Шутка. Сепак, по само 3 месеци тој излегол од притвор, а обвинителството од тогаш па наваму цели 11 месеци не му поднело обвинение.

По скопските улици се шушка дека Васо месеците на слобода ги искористил повторно да го работи истиот бизнис за кој бил уапсен, недопирлив затоа што и покрај тоа што му заплениле 80 паковки со дрога тој на еден начин бил ослободен и до ден денес нема обвинение.

Какво е учеството на ОЈО Скопје во овој случај?

Редакциски коментар на Радио Лидер е дека обвинителството сноси огромна вина за смртта на 22-годишната Фросина Кулакова. Овој случај не може да биде третиран како несреќа, туку станува збор за очигледно сериско прогледување низ прсти на сериозен престапник од страна на обвинителите. Вината е очигледна, а доколку се погледнат имињата на обвинителите кои до сега ги работеле неговите случаи, кои не и се познати на редакцијата на Лидер, можеби јавноста ќе стигне и до одговорот – Зошто го штителе Васо и со тоа придонеле една 22-годишна девојка да го изгуби својот живот?

Полициските службеници со жалење констатираат дека со години го апсат Васил Јованов Васо, но на крај повторно го наоѓаат на улица како прави уште посериозни дела откако е ослободуван од ОЈО Скопје.

Разгалено детиште заштитено од системот, уби девојка која се борела за подобор живот. Фросина имала живот пред себе, креативната неготинчанка која дошла да студира во Скопје, можеше да биде гордост на Македонија. Наместо тоа, неа ја изгубивме поради корумпираниот судски систем. Сакаме да веруваме дека нејзината смрт не е залудна и дека ќе претставува инијална каписла за реформа на правосудните органи.

Прашање до обвинителите кои го ослободувале Васил Јованов, но и до оние кои кај нас обезбедувале врски: Уште колку деца треба да убиете, за вашите деца да ги направите среќни?

Извор: Lider.mk

Актуелни и поранешни членови на Комисијата за помилување се состанаа на работна средба, каде што дискутираа за досегашната примена на институтот на помилување и можностите за негово унапредување. Средбата ја иницираше претседателката Гордана Сиљановска-Давкова, која истакна дека постојниот закон има недостатоци и дека е неопходна негова ревизија.

„Се согласивме дека е потребен нов закон за помилување, кој ќе ги земе предвид искуствата од примената на актуелниот закон и компаративните примери. Очекувам експертска и широка јавна дебата по ова прашање“, изјави Сиљановска-Давкова.

Средбата, која траеше четири часа, овозможи размена на искуства и ставови меѓу учесниците. Претседателката им се заблагодари на сите за нивниот конструктивен придонес и плодната дискусија.

Наскоро започнува реконструкцијата на водоводната линија Битола – село Поешево – село Логоварди, проект од големо значење за жителите на овие населени места.

Градоначалникот на општина Битола, Тони Коњановски, заедно со тимот од одделението за економски развој, денес одржа работна средба со раководството на ЈКП „Водовод“ и стручните лица од претпријатието, каде што се разгледа динамиката за реализација на проектот.

Проектот опфаќа реконструкција на водоводната линија во должина од 6 километри, вклучувајќи замена на старите азбестно-цементни цевки со нови полиетиленски HDPE цевки и куќни приклучоци. Вкупната вредност на проектот изнесува 29.349.605 денари, обезбедени преку Министерството за транспорт и врски и Владата на Република Македонија.

Директорот на ЈКП „Водовод“, Андреј Гинов, најави дека работите на терен ќе започнат веднаш по подобрувањето на временските услови, а почетната точка ќе биде улица „Бурса“ („Индустриски пат“).

„Со овој проект, значително ќе се подобри водоснабдувањето и ќе се решат долгогодишните проблеми на жителите во оваа област,“ изјави Коњановски, најавувајќи и други значајни проекти кои ќе се реализираат во соработка со ЈКП „Водовод“ во текот на годината.