Францускиот претседател Емануел Макрон денес се обрати на јавноста пред утрешниот самит на Европската унија во Брисел.

„Влегуваме во нова ера, руската закана е реална“, порача Макрон, додавајќи дека ако една земја може да го нападне својот сосед во Европа без последици, никој повеќе не може да се чувствува сигурно. Тој ја истакна реалната закана од Русија, која влијае на европските земји и која веќе ги прекршила претходните ветувања и гаранции.

Макрон потврди дека Русија се обидува да се вооружи и да ги зголеми трошоците за одбрана, нагласувајќи дека претседателот Путин ги крши европските граници со цел да ги убие противниците и да манипулира со изборите.

Претседателот на Франција исто така нагласи дека Европа мора да биде подготвена за иднината, бидејќи, како што рече, „САД повеќе нема да бидат со нас“, па треба да се подготвиме за такво сценарио.

Макрон ја повтори својата подготвеност да испрати француски војници во Украина како мировна мисија, доколку се постигне прекин на огнот. Тој ги изрази своите надежи дека САД ќе продолжат да бидат со Европа, но исто така нагласи дека треба да бидеме подготвени и ако не бидат.

Претседателот на Франција потсети дека земјата располага со нуклеарно оружје, ако тоа биде потребно, и нагласи дека Франција треба да продолжи со инвестирање во одбраната. Во таа насока, Макрон најави нови инвестиции во одбранбениот сектор, без да даде конкретни детали за нивната насока.

Макрон се осврна и на изјавата на Фридрих Мерц, кој минатиот месец повика на разговори со Франција и Велика Британија за можноста за проширување на нивниот нуклеарен штит на Германија. Макрон ја потврди важноста на стратешките дискусии за обезбедување заштита на европските сојузници, додавајќи дека во крајна линија, одлуките ќе бидат во рацете на францускиот претседател и воените команданти.

Украинските и американските тимови започнаа подготовки за претстојниот состанок, објави украинскиот претседател Володимир Зеленски. Според него, шефот на неговиот кабинет, Андриј Јермак, веќе одржал разговор со американскиот советник за национална безбедност, Мајк Валц, а првите резултати се очекуваат следната недела.

Ова е првиот контакт по минатонеделниот прекин на дијалогот меѓу Киев и Вашингтон, откако пропадна обидот за договор за експлоатација на украинските минерали, што требаше да води кон примирје со Русија. Иако Зеленски ја напушти Белата куќа без договор, подоцна испрати писмо до американскиот претседател во кое нагласи дека Украина е подготвена за брзи мировни преговори.

Најновите сигнали наидоа на реакција од Кремљ – портпаролот Дмитриј Песков оцени дека ова е „позитивен чекор“, но нагласи дека сè уште постојат правни и политички пречки. Белорускиот претседател Лукашенко пак, изрази подготвеност Минск да биде домаќин на трилатерална средба меѓу САД, Украина и Русија.

Во исто време, францускиот претседател Емануел Макрон размислува за заедничка посета на Вашингтон со Зеленски и британскиот премиер Кир Стармер, а неговата влада порача дека „се поставуваат основите за дијалог за траен мир“.

Во говор пред Конгресот, претседателот Доналд Трамп потврди дека Зеленски му напишал писмо во кое изразил подготвеност за брзи мировни преговори со Русија, како и прифаќање на договорот за критичните минерали со САД како дел од потенцијалниот компромис.

Во меѓувреме, Макрон телефонски разговараше и со Трамп и со Зеленски, нагласувајќи ја „решителноста на Франција да работи со сите страни за постигнување на цврст и траен мир во Украина“.

Францускиот сенатор Клод Малхурет денеска одржа остар говор во францускиот Сенат, во кој ја критикуваше актуелната состојба на американската политика и нејзиното влијание врз глобалните настани, особено војната во Украина.

Малхурет ја спореди администрацијата на Вашингтон со дворот на римскиот император Нерон, го нарече Доналд Трамп „луд император“ и го опиша Илон Маск како „дворски лудак на кетамин“.

„Бевме во војна со диктатор, а сега сме во војна со диктатор кој е поддржан од предавник“, истакна Малхурет, додавајќи дека верува дека одлуките на Трамп всушност ги ставиле САД на страната на Русија под водство на Путин, што го комплицира конфликтот во Украина.