Американскиот претседател Доналд Трамп пред телефонскиот разговор со Владимир Путин изјави дека „многу елементи“ од мировниот договор во Украина се веќе договорени со неговиот руски колега.

Трамп на платформата Truth Social најави дека утрово ќе разговара со Путин. Тој рече дека иако се постигнати договори за некои прашања, „се уште треба да се договорат многу работи“.

„Секоја недела носи 2.500 загинати војници, од двете страни, и мора да престане СЕГА. Со нетрпение очекувам да разговарам со претседателот Путин“, напиша Трамп. 

„Ќе видиме дали можеме да постигнеме мировен договор, прекин на огнот и мир, и мислам дека ќе можеме да го направиме тоа“, изјави тој за новинарите еден ден претходно на „Ер Форс 1“.

Во своето ноќно обраќање во понеделникот, украинскиот претседател Володимир Зеленски го обвини Путин за продолжување на војната. „Овој предлог можеше одамна да се спроведе“, рече тој, додавајќи дека „секој ден во време на војна значи човечки животи“.

Францускиот претседател Емануел Макрон ја пофали „храброста“ на Зеленски во прифаќањето на предлогот за прекин на огнот и ја предизвика Русија да го стори истото. „Доста е смрт. Доста е со уништени животи. Доста е уништување. Оружјето мора да замолчи“, рече Макрон во објавата на платформата X.

Австрија изрази солидарност со граѓаните на Македонија по трагичниот пожар во ноќен клуб во Кочани, во кој имаше повеќе жртви и повредени. Австриските вооружени сили спроведоа прв медицински евакуациски лет, при што двајца пациенти во критична состојба беа пренесени на специјализиран третман во Австрија.

Австриската амбасада во Скопје активно координира дополнителни мерки за поддршка, а властите од двете земји се во постојан контакт за обезбедување на потребната помош.

Овој хуманитарен ангажман е потврда за блиските односи меѓу Австрија и Македонија и за подготвеноста на Виена да помогне во итни ситуации.

Денес во Белград пристигнаа уште 12 пациенти од Македонија, кои беа повредени во пожарот во дискотеката „Пулс“ во Кочани.

Авион со пациентите слета попладнево на аеродромот во Батајница, каде што беше организиран брз и координиран транспорт до здравствените установи.

Тимови на Брзата помош ги пречекаа повредените и веднаш ги пренесоа до болниците, со цел да им биде обезбедена што поитно неопходната медицинска грижа.

Во Ургентниот центар, медицинските екипи беа подготвени за прием и веднаш им пружија соодветна нега на пациентите. Посветеноста и професионалноста на српските здравствени работници уште еднаш дојдоа до израз, обезбедувајќи брза и ефикасна реакција во духот на медицинската солидарност.