Русија официјално ги отвора вратите за соработка со Талибанците

По две децении во кои ги третираше како терористичка организација, Русија денес направи драматичен пресврт – официјално ја укина забраната за Талибанците. Одлуката ја донесе Врховниот суд, со што практично се отвора пат за нормализација на односите со авганистанското раководство, кое е на власт од 2021 година.

Иако ниту една земја сè уште не ја признава владата на Талибанците, Москва веќе извесен период ја гради оваа нова стратегија – соработка со некогашните непријатели, сега во име на заедничката борба против тероризмот. Владимир Путин веќе минатата година го најави овој курс, нарекувајќи ги Талибанците „сојузници против заканите од екстремизам“.

Русија ваквиот чекор го оправдува со растечката безбедносна закана од радикални исламски групи што делуваат низ Авганистан, Средниот Исток и Централна Азија. Особено по нападот во март 2024 година, кога милитанти убија 145 лица во концертна сала кај Москва – напад за кој одговорноста ја презеде Исламската држава.

Американските разузнавачи укажаа дека нападот го извела авганистанската ќелија на Исламска држава – позната како ИСИС-К (Корасан). Талибанците, пак, тврдат дека активно работат на искоренување на оваа група од територијата на Авганистан.

Но, патот до меѓународно признавање за нив не е ни малку лесен. Западните земји и понатаму се остро критички расположени, особено поради ограничувањата што ги наметнаа врз жените. Девојчињата и жените во Авганистан се соочуваат со забрани за средно и високо образование, како и строги правила за движење без машки старател.

И покрај ова, Русија очигледно одлучи дека моментот бара прагматизам наместо идеологија – и ја отвора нова страница во својата авганистанска политика.

Русија воведе нова тактика на фронтот во Украина, која вклучува поголеми напади со стотици војници, што претставува значителна промена во стратегијата што ја користела повеќе од две години. Оваа промена сигнализира можен прекин на претходната тактика, која се состоеше од мали пешадиски групи што бавно продираа низ украинските линии.​

Според објавата на јужната команда на украинската војска, прикажан е видео-снимка од руски напад во кој учествувале 320 лица и 40 оклопни возила во близина на неколку села на јужната линија на фронтот во регионот Запорожје. Нападот се случил во средата навечер и траел околу два и пол часа, пред да биде одбиен, при што Русите претрпеле големи загуби. Ројтерс не можел да ги потврди овие тврдења од бојното поле.​

Рускиот начин на напад со мали, лесно вооружени пешадиски единици претставува еволуција во однос на начинот на кој Москва водеше војна на почетокот на конфликтот, кога нејзините огромни оклопни колони претрпеа големи загуби од маневрирачките украински единици. Масовната употреба на дронови во војувањето, кои можат многу по-прецизно да погодуваат цели отколку минофрлачи или артилерија, исто така ја направи ситуацијата многу потешка за оклопните возила.​

“Приближно пет до седум луѓе би се подготвиле за овие напади, создавајќи таканаречен коридор со опрема за електронско војување (анти-дронови) и обидувајќи се да напредуваат со пешадиските групи”, изјави Владислав Волошин, портпарол на украинската војска, за тактиката на Русија во последните месеци.

Според него, во текот на типичен ден се изведувале околу 10 вакви мали напади на дел од линијата на фронтот во Запорожје. Тој додаде дека Руската Федерација, покрај масовниот напад во средата, извршила сличен голем напад и во неделата.​

“Целиот напад беше изведен од целосни јуришни водови, кои потоа се обидоа да се распаднат во јуришни групи. Секоја јуришна група ја изврши својата задача, обидувајќи се да заземе една од нашите позиции”, рече тој.​

Командантот на Националната гарда на Украина, Олександар Пивненко, изјави дека една од неговите бригади одбила голем напад во кој учествувале оклопни возила и стотици пешадијци, на друг дел од линијата на фронтот во близина на градот Покровск во источниот дел на земјата.​

Оваа нова тактика на Русија претставува значителна промена во стратегијата на фронтот и има големо влијание врз текот на конфликтот.

Украина и САД подготвени за потпишување Меморандум за редки минерали

Претседателот на Украина, Володимир Зеленски, денеска во Киев изјави дека Украина и САД би можеле уште денес да потпишат Меморандум за намери во врска со идниот договор за соработка во областа на ретките минерали.

– Пред неколку дена, американската страна предложи да направиме еден чекор наназад и да започнеме со Меморандум за намери. Нашите намери се позитивни, и затоа може да биде потпишан онлајн уште денес. Нашата страна рече „во ред“. Знам дека потпретседателката на Владата работи на финалниот текст. Овој меморандум е важен прв чекор, па зошто двете земји да не се согласат? – истакна Зеленски на прес-конференција, пренесе Ukrinform.

Тој додаде дека техничките состаноци со САД се одвивале и онлајн и офлајн, при што состаноците биле продуктивни и позитивни.

– Тимовите работеа и вчера и денес. Нашата потпретседателка на Владата соработува директно со тимот на Скот Бесент (американски министер за финансии) – рече Зеленски.

Според него, веќе се работи на содржината на сериозен меѓудржавен договор, кој ќе треба да биде разгледан во украинскиот парламент и да помине низ сите неопходни процедури.

– Правните тимови имаат задача да осигураат дека договорот ќе биде успешен за двете страни. Затоа сметаме дека состаноците се охрабрувачки – додаде тој.

Премиерот на Украина, Денис Шмигал, денеска соопшти дека специјална техничка работна група ќе отпатува во САД оваа недела за да продолжи со преговорите за договорот за редките минерали. Тој посочи дека Киев веќе го добил првиот нацрт на договорот од американската страна.

– Работната група ќе замине најдоцна до утре и ќе ги продолжи техничките разговори со тимот на американското Министерство за финансии за да се дефинираат техничките услови на договорот – изјави Шмигал, додавајќи дека Украина ќе продолжи да бара најдобро можно решение.