Бугарија се соочува со сериозна политичка криза предизвикана од масовните протести против предложениот буџет за 2026 година, кој вклучува контроверзни зголемувања на даноците и социјалните придонеси. И покрај тоа што владата двапати го повлече документот, незадоволството ескалира, со десетици илјади граѓани кои излегоа на улиците на Софија, најавувајќи нови демонстрации низ целата земја.

Особено е впечатливо рекордното учество на младите, кои јасно порачаа: „Генерацијата Z нема да молчи“. Протестното движење го надмина почетниот фокус на буџетот и се прошири во израз на длабоко разочарување од системските проблеми во државата: Граѓаните бараат одговорност за долгогодишната корупција и подобрување на економската состојба. Изразен е и силен револт поради недостатокот од независно судство и падот на слободата на медиумите.

Предложениот буџет беше едногласно оценет од организациите на работодавачи и синдикатите како „најлош во последните 30 години“. Опозициските партии ја искористија оваа масовна мобилизација за да побараат оставка од владата и веќе иницираа гласање недоверба.

Голем дел од гневот е насочен кон клучните политички фигури: поранешниот премиер Бојко Борисов и олигархот Делјан Пеевски, кои демонстрантите ги сметаат за носители на долгогодишен политички и економски притисок.

Насилството се засили пред седиштето на партијата ДПС, каде беа фрлани шишиња и петарди, што резултираше со материјални оштетувања. Забележани се и контроверзии во односот со безбедносните сили, со дел од демонстрантите кои ја обвинуваат полицијата за намерно дозволување провокации, додека други сугерираат дека многу полицајци ја симпатизираат протестната кауза.

И покрај повлекувањето на буџетот, протестното движење не покажува знаци на смирување. Нови собири се координираат преку социјалните мрежи, а претседателот Румен Радев повика на предвремени парламентарни избори како излез од кризата.

Оваа најголема граѓанска мобилизација во поновата историја на Бугарија ги обединува сите генерации под заеднички именител: барање за подобра и поправедна иднина во сопствената држава.

Извор: https://www.dw.com/mk/vo-bugarija-se-podgotvuvaat-novi-protesti-gnevot-protiv-budetot-i-politickata-elita-ne-se-smiruva/a-75010271?maca=maz-rss-maz-all-1489-xml-mrss

Претставниците на бугарските организации од шест македонски градови (Скопје, Битола, Охрид, Прилеп, Кавадарци и Кочани) категорично се изјаснија против уставни измени со одложено дејство во однос на внесувањето на Бугарите во Уставот на Република Македонија.

Својот став го презентирале пред бугарскиот претседател Румен Радев, нагласувајќи дека станува збор за гарантирање на основните човекови права.

Од друга страна, бугарскиот претседател Радев вчера повтори дека впишувањето на Бугарите во Уставот на РМ значително ќе го забрза патот на земјата кон Европската Унија.

„Вклучувањето на Бугарите во Уставот на РМ значително ќе го забрза патот на земјата кон ЕУ и се надевам дека нашиот југозападен сосед ќе го стори тоа што е можно поскоро за да си ги отвори вратите за преговори за полноправно членство“, изјави Радев на приемот за претставниците на бугарските организации од Македонија.”

Радев изрази надеж дека македонските власти ќе го спроведат „европскиот компромис“ од 2022 година, потенцирајќи дека иако сите се надеваат на што поскора интеграција на РМ, тоа не смее да биде на сметка на правата на бугарската заедница во земјата.

Блокадите на грчката граница поради бесните протести на земјоделците продолжуваат да го тресат регионот, предизвикувајќи застој на клучните точки кон Бугарија и Македонија! Иако на Кулата-Промахон засега владее релативен мир и сообраќајот се одвива нормално (иако таа „милост“ трае само до 10:00 часот денес, по што се очекува ново затворање), ситуацијата е сериозно непријатна.

Граничниот премин Евзони (Богородица) е повторно мета! Вчера вечер, околу 18 часот, грчките земјоделци повторно го спуштија „клучот“, оставајќи голем број возила заглавени. Иако претходно беше отворен само неколку часа за да се овозможи минување на колоните камиони и заглавените автомобили, овој премин останува несигурна зона.

Гневот стигна и на граничниот премин Ники (Меџитлија)! Конвој трактори утрово кратко го блокираше влезот и излезот од Грција. На грчката страна веќе четврти ден стојат над 150 трактори, а денеска пристигнаа и дополнителни 130 од Јаница, најавувајќи уште пожестоки акции!

Поради немилосрдните блокади, на граѓаните кои планираат пат кон јужниот сосед најстрого им се препорачува да го користат граничниот премин Дојран.

Земјоделската тактика е позната: нема однапред најава! Тракторите се паркирани, а на секојдневни состаноци се решава кога и колку долго ќе се блокираат прекуграничните патишта. Оваа пракса ќе продолжи, а земјоделците, барем засега, се непоколебливи.

Протестите се шират низ целата земја. Кај Никеа, во близина на Лариса, околу 1.800 трактори го затворија автопатот Солун-Атина! Во Кардица, над 2.000 трактори учествуваат во блокадите. Исто така, на излезот од Солун, блокада има на патот кон Атина.

Со поставувањето на новогодишни елки на местата на блокадите, демонстрантите испраќаат јасна порака: Нема да отстапиме! Доколку е потребно, празниците ќе ги минат на улица.

Протестите, кои почнаа во неделата со најава за интензивирање до 5 декември, немаат дефинитивен крај. Иако се очекуваат преговори, дополнителна тензија може да предизвика прогнозираниот црвен код за обилни врнежи од дожд низ поголемиот дел од Грција, што може да ја принуди ситуацијата барем привремено да се измени!