„Гласањето за руските средства ќе предизвика непоправлива штета“, тврди унгарскиот премиер Виктор Орбан, на најавата за денешното гласање во Брисел, кое се очекува да го реши прашањето за долгорочно замрзнување на средствата на Руската централна банка. Според Орбан, пладневното писмено гласање е директен удар врз правниот поредок на Европската Унија.

Орбан предупреди: „Денеска Брисел го преминува Рубикон.“

Тој истакнува дека прашањето за замрзнатите руски средства досега бараше едногласна одлука од земјите-членки на секои шест месеци. Но, со денешната постапка, Брисел наводно „со еден потег на пенкалото“ го укинува условот за едногласност, што унгарскиот лидер го нарекува „очигледно нелегално“.

Според Орбан, ова е крајот на владеењето на правото во Европската Унија, бидејќи европските лидери се ставаат „над правилата“.

„Наместо да обезбеди почитување на договорите на ЕУ, Европската комисија систематски го крши европското право. Сето ова се случува во сред бел ден, помалку од една недела пред состанокот на Европскиот совет.“ – Виктор Орбан

Унгарскиот премиер остро ја критикува целта на потегот – продолжување на војната во Украина, „војна во која очигледно не може да се победи“.

Најшокантното обвинение е дека овој чин го заменува владеењето на правото со „владеење на бирократите“.

„Воспоставена е диктатура во Брисел,“ рече Орбан, најавувајќи дека Унгарија протестира и ќе стори сè што е во нејзина моќ за да го врати правниот поредок.

Овој контроверзен потег е овозможен со предлогот на Европската комисија да се користи Член 122 од Договорот за ЕУ. Оваа одредба им дава на владите на ЕУ можност да усвојат итни мерки со квалификувано мнозинство за справување со тешка економска состојба.

Со замрзнувањето на руските средства на неопределено време, се елиминира ризикот за планот за нивно користење за финансирање на Украина. Ова е критично бидејќи Унгарија и Словачка веќе нема да имаат право на вето да го блокираат продолжувањето на замрзнувањето на секои шест месеци, како што тоа го правеа досега.

Британските воени и разузнавачки власти предупредија дека Европа мора да биде подготвена за сериозна безбедносна криза, откако министрите и воените началници истакнаа дека заканите драматично се зголемуваат.

На отворањето на новата Британска воена разузнавачка служба (МИС) во базата на Кралските воздухопловни сили Вајтон, министерот за одбрана Ал Карнс изјави дека „сенката на војната тропа на вратата на Европа“. Тој нагласи дека НАТО сојузниците мора да бидат подготвени да реагираат, бидејќи континентот веќе не се соочува со „војни по избор“, туку со „војни од нужда“, како што ја опиша руската инвазија врз Украина.

Началникот на Одбранбената разузнавачка служба, Адријан Берд, откри дека непријателската разузнавачка активност насочена против британскиот воен персонал и инфраструктура пораснала за повеќе од 50% во изминатата година, главно од Иран, Кина и Русија.

Новата служба МИС ќе ги обедини разузнавачките капацитети на Британската армија, Кралската морнарица и Кралските воздухопловни сили со цел побрза размена на информации — препорака од Стратешкиот одбранбен преглед. Во рамки на базата ќе функционира и новата Единица за контраразузнавање за одбрана, задолжена за спречување странски влијанија врз опремата, системите и персоналот.

Во Вајтон веќе работи и Pathfinder – најголемиот разузнавачки центар во рамките на сојузот „пет очи“. Персоналот ќе следи широк спектар податоци: од сателитски снимки и материјали собрани од беспилотни летала до информации од агенти на терен.

По критичкиот извештај на Комитетот за одбрана за подготвеноста на Велика Британија за потенцијален конфликт, Карнс увери дека реорганизацијата ќе помогне „одвраќањето да биде апсолутно безгрешно“.

Тој ја повика и британската јавност да ја сфати сериозноста на ситуацијата, бидејќи надворешните закани директно влијаат врз секојдневниот живот – од цените на храна и гориво до буџетските трошоци.

Предупредувањата доаѓаат по сличниот апел на генералниот секретар на НАТО, Марк Руте, кој во Берлин изјави дека „Русија ја врати војната во Европа“ и дека земјите мора да бидат подготвени за предизвици налик на оние што ги поминале претходните генерации.

Дополнително, високите претставници признаа дека земјата се соочува со сериозни проблеми во регрутирањето кадар за разузнавачките служби. Министерката за ветерани, Луиз Сандер-Џонс, посочи дека состојбата мора итно да се промени, бидејќи резултатите во последните години не ги исполнуваат очекувањата.

Американскиот претседател Доналд Трамп објави дека САД се подготвуваат да започнат операции насочени кон копнените маршрути преку кои, според Вашингтон, се пренесуваат пратки со дрога од Венецуела кон северноамериканскиот континент.

Во последните недели Трамп неколкупати јавно предупреди дека ќе нареди директни акции со цел пресретнување на кокатинските пратки што се движат по копнен пат. Во рамките на пошироката кампања против наркокартелите, американската армија веќе делува и во Карипското Море, каде што пресретнува пловила за кои постојат сомнежи дека се користат за шверц на дрога.

Венецуелскиот претседател Николас Мадуро, пак, тврди дека војната против наркокартелите е само прикритие за поширока геополитичка цел. Според него, вистинската намера на Вашингтон е да го смени режимот во Каракас и да стави рака врз богатите венецуелски нафтени ресурси.

Американската администрација засега ги отфрла ваквите обвинувања, но најавите за офанзива по копнените рути дополнително ги заоструваат веќе напнатите односи меѓу двете земји.