Центарот за управување и контрола на сообраќајот на Град Скопје, известува дека на булеварот Партизански Одреди, во насока на движење од улицата Шекспирова кон крстосницата со булеварот 8ми Септември, во близина на Хотел Карпош, пред малку се случи сообраќајна незгода.

ЦУКС апелира до сите возачи да бидат внимателни ако се приближуваат кон овој потег и да ја прилагодат својата брзина на движење според условите на патот.

Приведен е државјанин на Република Турција од полициски службеници на СВР Скопје оти се однесувал агресивно во казино и со остар предмет се заканувал на вработените во едно казино на подрачјето на Центар. 

„На 17.11.2024 во 03:00 часот, полициски службеници од СВР Скопје го лишиле од слобода О.Г.(34) од Република Турција затоа што во казино на подрачјето на Центар во Скопје агресивно се однесувал и со остар предмет се заканувал на вработените“, информира МВР.

Лицето било задржано во полициска станица и по целосно документирање на случајот, против него ќе биде поднесена соодветна пријава.

Постарите генерации сигурно се сеќаваат на изгледот на старото градско лизгалиште под Кале. 

Во Фејсбук групата „Стари скопјани“, членот Стрезо Вубалевски, споделил фотографии токму од таа локација. Фотографии на кои е прикажано едно друго време, различно функционирање на секојдневието.

Со фотографиите, напишал и опис во кој се зборува за историјатот на градското лизгалиште.

-Лизгањето во градот еволуирало од замрзнатото скопско езерце во Градскиот парк. Тогаш никој немал вистински лизгалки, туку се импровизирало. Се носеле високи чевли, а над нив штици кои се подесувало со штраф. Првото лизгалиште во Скопје е отворено во почетокот на седумдесетите години на минатиот век. Првите лизгалки во Скопје ги донел некој Словенец, а потоа се појавиле во продавниците на тогашната „Македонија шпорт“. Имало машки и женски, според големината и бојата и женските обично биле бели, а хокејските биле само за привилигираните. Нив почнале да ги носат од странство – од познатите соц-ексукрзии по Чехословачка, Полска, Русија родителите се враќаа со лизгалки на голема радост на своите деца.

Во доцните седумдесети години хокејот на мраз бил актуелен во Македонија. Во Скопје тогаш постоеле два клуба – Вардар и Скопје кои се натпреварувале во тогашната единствена Прва сојузна лига, а потоа и во Втората лига. Иако знаеле да губат и со 40 разлика од тогашните најдобри екипи од Словенија, Јесенице и Олимпија, сепак ќе остане забележано во аналите дека и на овие простори се играло хокеј.

Во тоа време во Скопје се одржале и Ц-квалификации за Светско првенство, кога трибините околу лизгалиштето во Кале биле полни. Во почетокот на осумдесетите години и двата клуба се распаднале. Најпознати хокеари биле браќата Грчевски – Васко, Ѓорѓи и Блаже, потоа браќата Аиновски – Ристо, Павел и Перо, голманот Чупевски, бекот Ѓорги Ковачевски и други. – се вели во описот на фотографиите.