На 20-тина км јужно од Скопје, во непосредна близина на с. Маркова Сушица, сместен во живописен пејсаж, со векови опстојува Марковиот манастир со црква посветена на св. вмч. Димитриј Мироточив. Манастирот, кој го добил своето име по Крале Марко, е една од најголемите градби од периодот на неговото владеење кој и ден денес е активен.

Едно од подобрите места за викенд, прошетка, возење велосипед или пикник во природа со семејството.

Уште однадвор, импозантниот комплекс ве кани да ги откриете неговите скриени богатства. Портата искована од масивно дрво води кон дворот каде е сместена црквата, изградена во 1345 г. Во дворот можете да им се восхитувате на прекрасните конаци распоредени како венец околу црквата. Комплексот го украсуваат и камбанерија, помала црква посветена на cв. Апостол Марко, музеј, галерија за икони, фурна, казани за печење ракија, бунар со студена вода и мошне стара воденица која е сочувана како сеќавање на времето кога житото се мелело на таков начин. Тука секој е добредојден да се помоли и да слушне убави зборови за историјата на манастирот.

Ова духовно жариште е воедно и книжевно-просветен центар. Со времето, манастирот стекнал богат имот и се здобил со големо културно-историско богатство: стари икони, стари ракописи и книги, многу црковни предмети и реликвии.

Народното предание говори дека во реновирањето на манастирот учествувал и скопскиот заповедник Хавзи Паша. Тој тргнал кон манастирот со намисла да го извади оловниот покрив од црквата и да го претопи во куршуми. Но, изморен од долгиот пат, во близината легнал да се одмори и заспал. На сон му се јавил војник, облечен во златна одора и јавајќи на коњ го застрашувал со долгото копје. Исплашен, пашата се прашувал кој е тој воин што сакал да го убие. Кога влегол во црквата и ја видел фреската на cв. Димитриј, го препознал воинот од сонот и веднаш се откажал од својата намера, па наместо да го извади оловниот покрив, го реновирал манастирот и на црквата ѝ доградил трем.

Сместен по долината на Маркова Река, манастирот е едно од најпривлечните излетнички места во околината, а тоа што го прави уникатен е самата местоположба, затскриен под пазувите на дрвјата нудејќи питома средина, во комбинација со свежината од реката, зеленилото и сончевите зраци. Ќе ве маѓепсаат шумските патеки прекриени со лековити билки, низ кои додека чекорите и се искачувате, постојано ќе ве следи дебела сенка, опоен мирис и жубор на реката. Овој редок македонски бисер е совршено место за одмор, релаксација и душевен мир, каде ќе стекнете спомени кои долго ќе ги паметите, уживајќи во културно-историските знаменитости и убавини што ги нуди ова волшебно место.