Актуелната претседателката на Советот на Град Скопје, Љубица Јанчева утрово беше непријатно изненадена кога на паркингот во Аеродром си го најде автомобилот испрскан со пур пена, со „затворени“ врати и хауба.

„Вака ли мои сограѓани во Европа – со заплашување? Почнавте со чкртање…утрово ова? Ваквиот чин е одраз на немоќ, градоначалнику Тимчо Муцунски безбедноста на граѓаните од другата опција е загрозена, објави Јанчева на својот Фејсбук профил покрај фотографијата од својот оштетен автомобил.

Јанчева за „Слободен печат“ инцидентот го опиша како „варварски чин“.

-Што и да е позадината на ова, во 21 век не може вака да се комуницира со вакви пораки, не сме животни. Ова е варварски чин и не гледам причина за вакво однесување. Автомобилот беше паркиран на обележан паркинг простор во општина Аеродром. Со оглед на тоа што овој автомобил го вози и мојата ќерка сметам дека со ова е загрозена и безбедноста на моето семејство, изјави Јанчева.

Таа утрово случајот го пријави во полиција и инспектори од ПС Аеродром извршија увид и составија записник на паркингот каде и претходно бил оштетуван нејзиниот автомобил.

-Само пред неколку месеци, додека бев на состанок во општинската организација на СДСМ Аеродром на која сум претседател, колата ми ја изгребаа со клуч. Можеби тоа било и случајно, но сега пред мојот дом во Аеродром, на уредно одбележан паркинг и уредно паркирано возило, ова е навистина непријатна глетка. Пред неколку години кога станав претседател на Градскиот совет ми беа избушени гумите на автомобилот, вели Јанчева која 27 години е член на СДСМ и извршува партиски и функции во локалната власт.

Новиот Совет на Град Скопје по локалните избори се уште не е конситуиран поради што Јанчева се уште е претседателка до изборот на нов претседател. По конституирањето на новиот Градски совет таа и понатаму ќе негов член откако на локалните избори освои советничко место преку листата на матичната партија СДСМ.

Таа е децидна дека случајот со оштетувањето на возилото ќе го истера до крај за да не се повторува повеќе.

„Како градоначалник на Општина Аеродром и како граѓанин пред сè го осудувам овој вандалски чин. Во нашата општина ова не смее да се случува.  Почитувана г-ѓа Јанчева, досега неколку пати реагираме како општина до МВР во врска со нивното дејствување во Аеродром и слабите контроли и неприсуството на терен на полицијата и не добиваме никаков одговор. Во мојата програма нема опции од една или друга страна, сите се исти и затоа работиме со сите сили за една поинаква општина на која сите ќе сме горди. Ги повикувам институциите да преземат мерки, а ние ќе ги интензивираме нашите соработки со институциите за еден безбеден Аеродром за сите“, порача Муцунски.