Стопанската Комора на Македонија – Турција МАТТО и нејзините членки донираат 3 300 000 денари за поддршка на семејствата погодени од трагедијата во Кочани.

-Голема тага и жал не обви сите нас. Посакуваме повредените што побрзо да се опорават и да се вратат во прегратките на своите најблиски. Длабоко сочувство до семејствата на загинатите, воедно и искрени желби за брзо опоравување на повредените. Молитвите на членовите на МАТТО се со семејствата на настраданите и семејствата на жртвите во Кочани, наведува Комората.

МАТТО нагласува дека ќе продолжи да го поддржува Црвениот крст и неговите хуманитарни иницијативи за еднакво општество.

Активностите на полицијата и на Обвинителството за истрагата за пожарот во Кочани во кој починаа 59 млади лица, а околу 200 се повредени, продолжија синоќа со акција за приведување на лица за кои постои сомнение за инволвираност.

Според првичните информации, приведени се поранешните градоначалници на Кочани, Николчо Илиев и Ратко Димитровски и градоначалникот во оставка Љупчо Папазов.  Јавното обвинителство најави дека денеска ќе информира за акцијата на полициските екипи спроведена по наредба на ОЈО Кочани, каде работи обвинителскиот тим за истрагата.

Папазов беше на сослушување пред обвинител во ОЈО Кочани на 17 март, а Обвинителството по завршување на неговиот распит најави дека дополнително ќе биде донесена одлука за неговиот натамошен статус во постапката.

Се очекуваат следните чекори од обвинителскиот тим и поради истекувањето на мерката краткотраен притвор што беше определена за 18 лица во предистражна постапка. Со истражните активности до пред приведувањето на тројцата поранешни градоначалници беа опфатени 28 лица.

Веќе е отворена истрага и е определен 30-дневен притвор за седум службени лица, вработени во СВР Штип и ПСОН Кочани, кои се осомнични дека како соизвршители,  изготвувајќи, потпишувајќи и одобрувајќи позитивна согласност, му овозможиле на правно лице да се стекне со лиценца за вршење угостителска дејност – кабаре иако објектот не ги исполнувал законските услови за работа.

Полициски службеници од одделот за крим полиција и организиран криминал завчера влегоа и во Општина Кочани, за обезбедување на документација поврзана со дискотеката. Претреси се извршени и на две лица, вработени во Министерство за економија, при што одземени се техничка опрема, документација, оружје, муниција… а, исто така, претреси извршени се и кај управителот и одговорното лице на дискотеката. Меѓу лицата на кои им е определен краткотраен притвор се и поранешен министер за економија и поранешен директор на Државниот пазарен инспекторат.

Според јавниот обвинител Љупчо Коцевски, сите докази за дискотеката „Пулс“ упатуваат на кривично дело – тешки дела против општата безбедност, за што е предвидена казна затвор до 20 години.

-Доказите кои секој ден ги собираме укажуваат на тоа дека коренот всушност е една општа ерозија на системот, култура на непочитување на законот и правилата, но и длабока системска корупција. Обвинителството, за жал, не е орган на превенција, туку на репресија. Дали и како може да се спречеше ваков епилог? Би рекол, можеби. Но, сега е на нас да се соочиме со последиците, да ги казниме одговорните за оваа катастрофа и да спречиме да се повтори ваква трагедија, вели Коцевски, во вчерашното интервју за белградска „Политика“.

Како што укажува, заедничко за трагичните настани со кои се соочивме изминатите години е тоа што покрај директната причина за катастрофата, често постои и дополнителен причинител во вид на непочитување на законот и системска корупција, што, потенцира, значително ги зголемува катастрофалните последици.

Во однос на прашањето дали надлежните органи биле известени за овој настан и дали ја извршиле својата професионална должност која овој настан ја наметнувал, одговори дека сето тоа ќе се провери во рамки на истрагата.

– Сè тоа ќе провериме во рамки на истрагата. Сите тие закони и прописи постоеле на хартија, а до сега не сме пронашле скоро ниеден кој бил почитуван. До овој момент, во статус на осомничени се 28 лица, од кои три се во болница, 18 се притворени во предистражна постапка, а против седум полициски службеници се води истрага и тие се исто така во притвор. Доказите се собираат во изјави и во материјален облик, но и во форма на експертизи и стручни мислења од одредени области. Сите овие докази до сега упатуваат на сомневање за основно кривично дело – тешки дела против општа безбедност поради директно загрозување на животот и телото на лица, за што е предвидена казна до 20 години. Истражуваат и давање и примање на мито, незаконитости во набавката на пиротехнички средства, како и неколку други кривични дела, посочува Коцевски.

Најавува дека истрагата ќе биде брза, ефикасна и сеопфатна и оти ќе одговараат и тие кои со неработење и непочитување на службените должности сносат дел од вината за катастрофата.

Според последните информации од Министерството за здравство, состојбата на повредените лица во пожарот е стабилна и се подобрува. Од вкупно 20 што беа критични, 10 се во потешка состојба, но се надвор од животна опасност.  Во државава се лекуваат 62, а во странство 111. Од тие на лекување во државава, тројца се пуштени на домашно лекување, а најавено е испишување на уште тројца. Веќе в понеделник се очекува враќање во државава и на првите пациенти од странство.

– Сите пациенти кои се лекуваат тука и надвор од државата се во стабилна и добра состојба, повеќето се подобруваат. Од идната недела се надевам ќе ве известуваме за тоа колку пациенти го продолжуваат лекувањето дома и за такви што ќе се враќаат од странските држави, изјави вчера министерот за здравство Арбен Таравари.

Пациенти од пожарот во државава се хоспитализирани во Клинички центар Скопје, ГОБ „8 Септември“, во Градската општа болница „Св. Наум Охридски“, Клиничката болница во Штип, како и во приватните клиники „Систина“ и „Жан Митрев“. Таравари најави дека ќе им бидат направени токсиколошки анализи пред да бидат пуштени на домашно лекување. На домашните лекари им помагаат колеги од Израел и Чешка, а тим од Велика Британија ќе помага за следната фаза од лекувањето.

Уште тројца пациенти вчера беа испратени во Турција и седум во Шпанија, со што вкупниот број на лица со повреди од пожарот на лекување во странство достигна 111. Министерството за здравство вчера го објави и  списокот со медицински центри во странство каде се лекуваат пациенти од пожарот. Листата содржи медицински центри во Србија, Бугарија, Словенија, Хрватска, Грција, Италија, Австрија, Белгија, Литванија, Турција, Шведска, Унгарија и Полска.

Како што најави директорот на Фондот за здравствено осигурување Сашо Клековски, последниот транспорт со двајца повредени ќе биде во Чешката Република. Тој очекува в понеделник во државава да бидат вратени првите пациенти од пожарот во Кочани кои се лекуваат во странство.

-Траумата е огромна во цела земја, посебно во Кочани, Облешево, Виница, местата каде има погинати. Има потреба од психосоцијална работа, и кај здравствените работници, посебно во Кочани. Сега заедно со дефинирање на планот за враќање на повредените веќе размислуваме за следните фази. И британската Влада и изралеското МЗ понудија да ни помогнат да го конципираме планот што ќе правиме следната една – две години бидејќи оваа трагедија ќе дава последици кои ќе траат подолго, рече Клековски вчеравечер во телевизиско гостување.

Финансирањето на лекувањето на пациентите е прашање на кое во првите денови од несреќата не размислувала Владата, а ниту го покренале соседите, но Клековски кажа дека тоа дополнително ќе се отвори бидејќи дел од лекувањата ќе бидат исклучително долготрајни, гледано од досегашни искуства на Фондот.

Како што соопшти директорот на Служба за општи и заеднички работи на Владата (СОЗР), Ивица Томовски, досега за 142 лица од семејствата на повредените од пожарот на лекување во странство државата обезбеди авионски карти и сместување потрошени се почетно околу 3,5 милиони денари.

Одлуката на Владата е да се покриваат трошоците за по две лица за еден повреден, но, како што посочи, ќе бидат покриени трошоците ако заминале и по тројца-четворица.

– Со сите телефонски оператори е одлучено сите телефонски броеви кои ги имаат од лицата кои се надвор од Македонија, да бидат ослободени од роаминг и интернет, за да можат непречено да контактираат со своите најблиски  кои се останати во земјава, а и со институциите, рече Томовски синоќа во интервју за ТВ 21.

Преку Црвениот крст заклучно со вчера се обезбедни 42.739.931 денар за поддршка на настраданите во пожарот во Кочани. Останува повикот да продолжи хуманоста и солидарноста за обезбедување помош за настраданите семејства преку сметката на Фондот на солидарноста на Црвениот крст на РСМ: 300000001327966, даночен број: 4030984271620 АД Комерцијална банка со назнака: помош за настраданите граѓани во пожарот во Кочани, како и со повик на телефонските броеви на Македонски телеком и А1 Македонија143 400 (донација од 100 денари од телефонски повик).

Несреќата се случи рано неделата во дискотеката „Пулс“ каде настапуваше групата „ДНК“. Починатите во пожарот се на возраст од 16 до 48 години. Најголем број се на возраст на 24 и 26 години. Шестмина се на возраст од 21 година, а на возраст од 18 и 36 години загинати се по четири лица. На 16-годишна возраст загинати се тројца, исто толку и на 17-годишна возраст и на 25 години. По двајца загинати има на 20, 23, 27, 31, 38 и 44 години. По еден загинат има на возраст од 19, 29, 32,33, 43, 47 и 48 години. Во несреќата животот го загубија и три лица од бендот ДНК.

Починатите во пожарот вчера беа погребани во Кочани, Штип, Облешево и Скопје. 

Средношколците од училишната заедница на средното општинско училиште „Ѓорче Петров“, Крива Паланка, утрово поставија кутии за донации за помош на семејствата на настраданите и повредените од трагедијата во Кочани.

Десетина ученици од различни наставни години од денеска до недела, во период од 7.30 до 19 часот ќе бидат на пунктот на плоштадот „Карпошово востание“ пред зградата на Општина Крива Паланка, во знак на сочувство и солидарност со сите погодени од оваа трагедија.

– Ние сме длабоко трогнати од она што се случи, тоа беа наши врсници, млади луѓе со соништа и визии за иднината кои неповратно се изгубија за миг. По неколкуте денови од трагедијата во кои излегувавме во вeчерните часови на мирни собири и палевме свеќи, одлучивме да продолжиме со оваа акција за донации насловена „Денови на солидарност“. Ќе се менуваме по редоследот на училишните смени и овде ќе бидеме вечер до 19 часот, но и утре и задутре, рече Невена Стефановска, ученичка во втора година, медицинска струка , СОУ „Ѓорче Петров“, Крива Паланка.

Младите се емпатични и тажни. Со своите акции, рекоа, само изнаоѓаат начин, да бидат ангажирани за да не ги обзема поголема тага, зашто , како што велат, секој од нив деновиве живее со онаа порака што одекна на мирните собири „Денес тие-утре ние“.