Најголемите грчките синдикати на вработените во државниот сектор (АДЕДИ) и на вработените во приватниот сектор (ГСЕЕ), утрово започна 24-часовен генерален штрајк и бараат колективни договори и реални зголемувања на платите за справување со поскапувањата, а паралелно во низа градови ќе се одржат и протести, јави дописничката на МИА од Атина.

Штрајкот ќе ја парализира земјата со оглед на тоа што учествуваат и голем број синдикати, здруженија асоцијации и сл.

Грција денеска е без бродски и железнички сообраќај, штрајкуваат и контролорите на летање со што повеќето летови од и кон земјата се откажани, а проблеми ќе има и во јавниот превоз во Атина.

Во штрајкот учествуваат и синдикатите на вработените во државните болници, како и студентски здруженија и организации.

Во Солун, во Атина и во други грчки градови за претпладнево закажани се протести.

Генералниот штрајк го поддржаа и новинарите, организирани од нивните здруженија и како што е пракса во изминатите години, нивниот 24-часовен прекин со работата беше ден претходно, односно вчера, за денеска да можат да ги покријат протестите и демонстрациите и да информираат за нив.

Главното барање на медиумските работници е потпишување на колективни договори во сите медиумски сектори, односно телевизии, весници, списанија, интернет, радија.

Грција вчера беше без вести и информативни емисии, а новинарите, штрајкот го завршија во пет часот утрово.

Сезонската работа во Хрватска станува се попопуларна меѓу Македонците, особено во туризмот и угостителството. Во 2024 година, повеќе од 10.000 наши граѓани заминале за сезонска работа во Хрватска.

Годинава, потребата од сезонски работници во туристичкиот сектор се проценува на околу 70.000 работни места. Најчесто се бараат готвачи, слаткари, келнери, велнес терапевти и други слични позиции.

Платите за сезонските работници во Хрватска зависат од секторот, позицијата и искуството. Според податоците за 2025 година, просечната месечна плата во Хрватска е околу 1.361 евра.

Позициите како собарки, помошници во кујна и келнери обично заработуваат меѓу 1.000 и 1.400 евра нето месечно во врвот на сезоната. Најплатени се позициите како готвачи и менаџери, кои можат да заработат од 1.500 до 2.000 евра месечно, во зависност од локацијата и нивото на искуство.

Зголемената побарувачка за работна сила, особено во туризмот и угостителството, натерала работодавците да понудат повисоки плати за да привлечат квалификувани работници.

Претседателот на ХДЗ и хрватски премиер Андреј Пленковиќ изјави дека е уверен оти ЕУ нема да воведе санкции за претставниците на Република Српска, а тоа нема да го направи ниту Хрватска.

-Ми се чини дека иницијативата за усвојување санкции на ниво на ЕУ нема да помине. Следејќи ги позициите на земјите-членки, тоа не е реално, изјави синоќа Пленковиќ во Мостар по средбата со претседателот на ХДЗ БиХ Драган Човиќ, пренесе агенцијата Срна.

Пленковиќ изјави дека Хрватска не е во иста позиција како некои земји од ЕУ.

-Ние сме првите соседи, Бањалука е буквално на час и половина од Загреб и од таа страна сакаме да испратиме смирувачки пораки кои ќе поттикнат дијалог, ќе ги вратат работите на вистинското место, а вистинското место е да се најдат решенија за иднината на БиХ меѓу политичките партии и институциите во БиХ, рече Пленковиќ.

Тој посочи дека се друго не е добро, бидејќи тоа би довело до поголеми тензии, забавување на европскиот пат и лоша економска состојба.

Пленковиќ истакна дека Босна и Херцеговина нема друг пат освен европскиот, кој ќе обезбеди хармонично функционирање на БиХ.